कोकणवासीयांसाठी एक गुड न्यूज समोर आलीय. बस, रेल्वे आणि खासगी गाड्यांसोबत आता कोकणात जाण्यासाठी विमानाचा पर्यायही उपलब्ध झालाय. कोकणवासीय ज्याची आतुरतेने वाट पाहत होते ती विमानसेवा अखेर सुरु होतेय. याचं वेळापत्रकही जाहीर झालय. पालकमंत्री नितेश राणेंनी यासंदर्भात घोषणा केलीय. याबद्दल सविस्तर जाणून घेऊया.
सिंधुदुर्ग जिल्ह्यातील चिपी विमानतळ आणि नवी मुंबई आंतरराष्ट्रीय विमानतळ यांच्यातील थेट विमानसेवा 16 नोव्हेंबर 2026 पासून सुरू होतंय. पालकमंत्री नितेश राणे यांनी याबाबत माहिती दिली. ही सेवा आठवड्याचे सातही दिवस उपलब्ध असेल. प्रादेशिक विमान कंपनी FLY91 या मार्गावर विमान चालवणार आहे. त्यामुळे सिंधुदुर्ग आणि मुंबई महानगर प्रदेशादरम्यान प्रवास करणाऱ्या नागरिकांना रस्ते वाहतुकीबरोबरच हवाई प्रवासाचा पर्याय मिळणार आहे.
या मार्गावरील विमानांचे वेळापत्रकही जाहीर झाले आहे. नवी मुंबई ते सिंधुदुर्ग: विमान क्रमांक IC 6001, सकाळी 7.55 वाजता प्रस्थान, सकाळी 9.5 वाजता चिपी येथे आगमन.सिंधुदुर्ग ते नवी मुंबई: विमान क्रमांक IC 6002, सकाळी 9.25 वाजता प्रस्थान तर सकाळी 10.35 वाजता नवी मुंबईत आगमन होणार आहे. दोन्ही दिशांचा नियोजित प्रवास सुमारे 1 तास 10 मिनिटांचा आहे. सध्या या मार्गावर दररोज एक फेरी उपलब्ध असेल. त्यामुळे त्याच दिवशी मुंबईतून सिंधुदुर्गला जाऊन संध्याकाळी विमानाने परत येण्याची सुविधा या वेळापत्रकात नाही.
सिंधुदुर्ग जिल्हा समुद्रकिनारे, किल्ले, निसर्गरम्य पर्यटनस्थळे आणि कोकणी खाद्यसंस्कृतीसाठी ओळखला जातो. थेट विमानसेवा सुरू झाल्यामुळे मुंबई, नवी मुंबई आणि परिसरातील पर्यटकांना जिल्ह्यात पोहोचणे अधिक सोयीचे होऊ शकते. हॉटेल व्यवसाय, स्थानिक वाहतूक, होमस्टे, पर्यटन मार्गदर्शक आणि स्थानिक खाद्यव्यवसायांना याचा फायदा होणार असल्याचे राणेंनी सांगितले. तसेच नोकरी, वैद्यकीय उपचार आणि व्यावसायिक कामांसाठी मुंबईत येणाऱ्या सिंधुदुर्गवासीयांनाही या सेवेचा उपयोग होणार असल्याचे नितेश राणे म्हणाले.
चिपी विमानतळाचे उद्घाटन 9 ऑक्टोबर 2021 रोजी झाले होते. सुरुवातीला मुंबई-सिंधुदुर्ग मार्गावर अलायन्स एअरची सेवा सुरू झाली होती. मात्र ही सेवा ऑक्टोबर 2024 मध्ये बंद झाली. त्यानंतर विमानतळावरून पुणे, बंगळुरू आणि हैदराबादसारख्या शहरांसाठी FLY91 सेवा चालवत आहे. आता नवी मुंबईशी थेट संपर्क सुरू झाल्यामुळे चिपी विमानतळाच्या नियमित वापराला चालना मिळण्याची शक्यता आहे.
या मार्गावरील विमानसेवा सुरू करण्यासाठी महाराष्ट्र सरकारने व्यवहार्यता तूट निधी (Viability Gap Funding - VGF) अंतर्गत आर्थिक मदतीला मंजुरी दिली आहे. 27 ऑक्टोबर 2026 रोजी झालेल्या मंत्रिमंडळ बैठकीत या मार्गासाठी १०० टक्के VGF मंजूर करण्यात आले. प्रति आसन दोन्ही दिशांसाठी 6200 रुपयांची मदत देण्याची तरतूद करण्यात आली आहे. प्रवाशांनी तिकीट बुक करण्यापूर्वी FLY91 च्या अधिकृत संकेतस्थळावर उपलब्ध भाडे, सामानाची मर्यादा आणि रद्द करण्याचे नियम तपासावेत.