नॅनो युरिया पाजलं, नंतर तोंडात कापड कोंबलं अन् त्याच अवस्थेत...; गर्भवती महिलेच्या मृत्यू प्रकरणात धक्कादायक ट्विस्ट, गुगल सर्च हिस्ट्री हादरवणारी

पतीने आपल्या आई, भावजय आणि भावासोबत मिळून गर्भवती पत्नीची अत्यंत निर्दयीपणे हत्या केल्याची धक्कादायक घटना घडली आहे. गुजरातच्या खेडा जिल्ह्यातील महुधा तालुक्यातून ही घटना घडली आहे. पीडिता 13 आठवड्यांची गर्भवती होती. पोलिसांच्या तपासात काही धक्कादायक खुलासे झाले आहेत. सुरुवातीला महिलेने आत्महत्या केली असल्याचं भासवले गेलेले हे प्रकरण प्रत्यक्षात हत्या असल्याचं निष्पन्न झालं.

चारित्र्यावरील संशय आणि इतर वैयक्तिक वादांतून निर्माण झालेला तणाव

17 ऑक्टोबरच्या पहाटे, महुधा पोलिसांना माहिती मिळाली की, अरुणाबेन मितुलभाई सोढा हिने आपल्या घरी गळफास घेऊन आत्महत्या केली आहे. मृत महिलेच्या माहेरच्यांनी पहिल्या दिवसापासूनच ही हत्या असल्याचा संशय व्यक्त केला होता. पोलीस तपासात असे समोर आले की, घटनेच्या रात्री 13 आठवड्यांची गर्भवती असलेली अरुणाबेन पोटदुखीने तीव्र वेदनेत होती. तिने पती मितुलला तिला रुग्णालयात नेण्याची विनंती केली, परंतु मितुलने त्याकडे दुर्लक्ष करून तो मोबाईल फोनमध्ये व्यग्र होता.

या जोडप्यामध्ये आधीच तणाव होता. कारण तीन-चार दिवसांपूर्वीच मितुल आपल्या मेहुणीला (पत्नीच्या बहिणीला) बँकेच्या कामासाठी बाहेर घेऊन गेला होता. त्यात आता गर्भवती पत्नीला रुग्णालयात नेण्यास तो टाळाटाळ करत होता. त्यांच्यात चारित्र्याबाबतच्या संशयावरून आणि इतर वैयक्तिक कारणांमुळे आधीपासूनच वाद सुरू होते.

एका वादादरम्यान, वैतागलेल्या अरुणाबेनने रागाच्या भरात "मी मरून जाईन!" असे म्हटले. यानंतर मितुलच्या मनात हत्येचा कट शिजला. त्याने लगेच गुगलवर शोधले, "जर पत्नीने आत्महत्या केली, तर पतीला जबाबदार धरले जाते का?" त्यानंतर, अरुणबेनचा जीव घेण्यासाठी संपूर्ण कुटुंबाने मिळून एक कट रचला.

घरात आधीच उपलब्ध असलेले 'नॅनो युरिया'चे 500 मिलीचे पाकीट बाहेर काढण्यात आले. सासू आणि नणंदेने गरोदर अरुणबेनचे हात-पाय घट्ट पकडून ठेवले. मितुलने तिला सोफ्यावर पाडले आणि बळजबरीने तिच्या तोंडात युरिया ओतला. ती ओरडू नये किंवा प्रतिकार करू नये म्हणून त्यांनी तिच्या तोंडात कापडाचा बोळा कोंबला. युरिया पोटात गेल्यावर त्याचे रूपांतर अमोनिया गॅसमध्ये झाले, ज्यामुळे तिचे श्वसन स्नायू निकामी झाले. अवघ्या 15 ते 20 मिनिटांत अरुणाबेन आणि तिच्या गर्भातील निष्पाप बाळाचा मृत्यू झाला. शवविच्छेदन अहवालातून हे सत्य समोर आले.

हत्येनंतर, संपूर्ण कुटुंब रात्रभर एकत्र बसून हा गुन्हा लपवण्याची योजना आखत होते. रात्री उशिरा, मितुलने आपला मेहुणा विपुल याच्या मदतीने अरुणबेनचा मृतदेह नायलॉनच्या दोरीने लटकवला, जेणेकरून पोलिसांना तिने आत्महत्या केली आहे असे वाटावे. मात्र शवविच्छेदन अहवालातून सत्य उघड झाले. गळ्यावरील खुणांवरुन हत्या झाल्याचे आणि विषारी पदार्थ पोटात गेल्याने मृत्यू झाल्याचे निष्पन्न झाले. याव्यतिरिक्त, तांत्रिक पुरावे आणि गुगलवरील सर्च हिस्ट्रीमुळे मितुलचा खरा चेहरा उघड झाला.

पोलिसांनी या भीषण दुहेरी हत्याकांडाचा काही तासांतच छडा लावला आहे. पोलिसांनी मुख्य आरोपी पती मितुल सोढा आणि त्याचा मेहुणा विपुल सोढा यांना अटक केली आहे. पोलिसांनी गुन्ह्यात वापरलेली नायलॉनची दोरी, तसेच मोबाईल फोन आणि एक ब्लेडही जप्त केले आहे. मात्र, या भीषण गुन्ह्यात मदत करणाऱ्या सासू आणि नणंद अजूनही फरार आहेत.