भाजपाला रोखण्यासाठी सर्वात मोठी युती! थेट ओवेसींच्या MIM सोबत हातमिळवणी, सर्व जागा लढवण्याचा निर्णय
भाजपाला रोखण्याच्या हेतूने देशात आणखी एक मोठी युती झाली आहे. असदुद्दीन ओवेसी यांचा एमआयएम (AIMIM) आणि चंद्रशेखर आझाद यांचा आझाद समाज पक्ष यांनी आगामी 2027 उत्तर प्रदेश विधानसभा निवडणुकीच्या पार्श्वभूमीवर हातमिळवणी केली आहे. यासंदर्भात त्यांनी अधिकृत घोषणा केली आहे.
भाजपाला रोखण्याच्या हेतूने देशात आणखी एक मोठी युती झाली आहे. असदुद्दीन ओवेसी आणि चंद्रशेखर आझाद यांनी राजकीय आघाडीची घोणषा केली आहे. आगामी 2027 उत्तर प्रदेश विधानसभा निवडणुकीच्या पार्श्वभूमीवर त्यांनी आपण एकत्र येत असल्याची अधिकृत घोषणा केली आहे. असदुद्दीन ओवेसी यांचा 'ऑल इंडिया मजलिस-ए-इत्तेहादुल मुस्लिमीन' (AIMIM) आणि चंद्रशेखर आझाद यांचा 'आझाद समाज पार्टी (कांशीराम)' या दोन्ही पक्षांनी 'सामाजिक परिवर्तन मोर्चा' नावाची आघाडी स्थापन केली आहे. ही आघाडी राज्यातील सर्व 403 विधानसभा जागांवर निवडणूक लढणार आहे. या आघाडीत चंद्रशेखर आझाद हे मुख्यमंत्रीपदाचे उमेदवार असतील.
लखनऊमध्ये संयुक्त पत्रकार परिषद घेत दोन्ही नेत्यांनी युतीची घोषणा केली. ओवेसी म्हणाले की, नवीन आघाडी भाजपाला सलग तिसऱ्यांदा सत्तेत परत येण्यापासून रोखण्याचा प्रयत्न करेल. तसंच ही एक मजबूत आघाडी असल्याचं त्यांनी एक उत्तम राजकीय पर्याय असल्याचं म्हटलं आहे. दलित, अल्पसंख्याक, मागास समुदाय आणि इतर उपेक्षित घटकांशी संबंधित समस्यांवर आपण लक्ष केंद्रीत करणार असल्याचं त्यांनी म्हटलं आहे.
भाजपला तिसऱ्यांदा सत्तेत येण्यापासून रोखण्यासाठी उत्तर प्रदेशमध्ये हा एक मजबूत पर्याय असेल, असे मी आत्मविश्वासाने सांगू शकतो, असं ओवेसी म्हणाले. त्यांनी आझाद यांना युतीचा मुख्यमंत्री पदाचा चेहरा म्हणून घोषित करताना म्हटले आहे की, "आमचा भाऊ चंद्रशेखर आझाद हे एसपीएमचे प्रमुख अध्यक्ष आणि उत्तर प्रदेशमध्ये मुख्यमंत्रिपदाचे उमेदवार असतील हे जाहीर करताना मला आनंद होत आहे."
ओवेसी यांनी राजकीय पक्षांवर असा आरोप केला की, ते मागासवर्गीय, दलित आणि इतर शोषित घटकांना केवळ व्होट बँक म्हणून पाहतात. ही आघाडी शिक्षणाची खालावलेली स्थिती, राज्यातील तरुणांमधील बेरोजगारी आणि शेतकऱ्यांसमोरील समस्या यांसारखे प्रश्न उपस्थित करेल असं त्यांनी म्हटलं आहे.
"आम्ही भविष्यासाठी राजकारण करू. आम्हाला आशा आहे की उत्तर प्रदेशातील जनता एक उत्तम भविष्य घडवण्यासाठी चंद्रशेखर आझाद यांच्यासोबत येईल," असे सांगताना त्यांनी या युतीचे यश म्हणजे राज्यातील जनतेचेच यश असेल असं म्हटलं.
उत्तर प्रदेशात 'एसपीएम' (SPM) ला तिसरा राजकीय पर्याय म्हणून सादर केले जात असताना आझाद म्हणाले की, हा केवळ निवडणुकीचा आणखी एक पर्याय नसून सामाजिक परिवर्तनासाठीचे एक व्यासपीठ आहे.
403 जागांवर निवडणूक लढवण्याची घोषणा
चंद्रशेखर आझाद यांनी सांगितले की, त्यांची आघाडी केवळ 100 किंवा 150 जागांवर नव्हे, तर उत्तर प्रदेशातील सर्व 403 विधानसभा मतदारसंघांत निवडणूक लढवेल. त्यांनी नमूद केले की, 2014 पासून भाजपला सत्तेतून हटवण्याबाबत चर्चा सुरू आहे, परंतु तसे अद्याप घडलेले नाही.
ते म्हणाले, "भाजपला सत्तेतून मुळासकट उखडून टाकण्याचे आश्वासन देण्यात आले होते. आम्ही 2014 पासून 2024 पर्यंत वाट पाहिली, पण भाजप सत्तेतून बाहेर गेला नाही; उलट, तो अधिक शक्तिशाली झाला आहे. दलित आणि उपेक्षित समाज, ज्यांना दीर्घकाळ अपमान सहन करावा लागला आहे, त्यांना आता अशा प्रकारचा अपमान सहन करण्याची गरज नाही."