ज्ञानेश कुमारांविरोधातील आंदोलन सोडून राहुल गांधी व्हिएतनामला निघून गेले? विमानातील VIDEO शेअर करत भाजपाचा दावा

भाजपने पुन्हा एकदा विरोधी पक्षनेते राहुल गांधींच्या वारंवार होणाऱ्या परदेश दौऱ्यांचा मुद्दा उपस्थित करत लक्ष्य केले आहे. विरोधी पक्षाचे आंदोलन सुरू असतानाच राहुल गांधी पुन्हा एकदा परदेश दौऱ्यावर गेल्याचा दावा भाजपाने केला आहे. आपल्या दाव्याला दुजोरा देत भाजपाने विमानातील एक व्हिडिओ शेअर केला आहे. या व्हिडीओत राहुल गांधी विमानात बसलेले दिसत आहेत. राहुल गांधी या विमानातून व्हिएतनामला जात असल्याचा दावा भाजपाने केला आहे. आंदोलनांमुळे राहुल गांधी कदाचित खूप थकले असावेत, म्हणूनच ते सुट्टीवर निघून गेले आहेत असा टोला भाजपाने लगावला आहे.

"खोटं पसरवून खूप थकले आहेत. थोडा काळ व्हिएतनामला फिरुन येतो, कोणाला काय कळणार आहे?", अशा उपरोधिक शब्दांत भाजपाने एक्सवर पोस्ट केली आहे. यावेळी त्यांनी एका प्रवाशाने शूट केलेला व्हिडीओही शेअर केला आहे.

भाजपचे प्रवक्ते आर. पी. सिंग यांनी टीका केली आहे की, "बघा, राहुल गांधी नेहमीच असं करतात. बिहारमध्ये यात्रा केल्यानंतर ते दोन महिन्यांच्या सुट्टीवर परदेशात गेले होते. कदाचित तेव्हा ते व्हिएतनामला गेले असतील आणि कदाचित यावेळीही ते व्हिएतनामलाच गेले असावेत."

भाजपच्या एका नेत्याने म्हटले की, राहुल गांधींना इतकी राजकीय मेहनत झेपत नाही आणि ते वारंवार सुट्ट्यांवर निघून जातात. भाजपच्या शाझिया इल्मी म्हणाल्या, "राहुल गांधींना आता अधिक कष्ट करणे शक्य नव्हते. ते किती मेहनत करणार? मतांच्या चोरीचा मुद्दा तर केवळ एक निमित्त आहे. ते किती आळशी आहेत, हे सर्वांनाच माहीत आहे. आता पुन्हा त्यांचा पर्यटन प्रवास सुरू झाला आहे. दोन आठवडेही काम न करता ते पुन्हा एकदा निघून गेले आहेत. यावेळी ते व्हिएतनामच्या दौऱ्यावर गेले आहेत."

काँग्रेसने यावर भाजपाला प्रत्युत्तर दिलं असून, विरोधी पक्षनेत्यांच्या परदेश दौऱ्यांवरून भाजप विनाकारण वाद निर्माण करत असल्याचं म्हटलं आहे. काँग्रेस नेते संदीप दीक्षित म्हणाले, "कोणी, कुठे आणि कधी प्रवास करावा... यात अडचण काय आहे? इतर लोक परदेशात प्रवास करत नाहीत का? राहुल गांधी एक व्यक्ती आहेत, विरोधी पक्षनेते आहेत; त्यांची काही कर्तव्ये आहेत. ते येल विद्यापीठातील विद्यार्थ्यांशी संवाद साधतात, लंडनमध्ये विद्यार्थ्यांशी चर्चा करतात आणि तिथल्या विचारवंतांना भेटतात. ते पत्रकारांना मुलाखतीही देतात, जे काम पंतप्रधान करत नाहीत."

यावेळी काँग्रेसने संसदेचं अधिवेशन सुरु असतानाही पंतप्रधान नरेंद्र मोदी परदेश दौऱ्यावर जात असल्याचा मुद्दा अधोरेखित केला. "मग, भाजपला यात काय अडचण आहे? आपल्याकडे अशीही एक परंपरा आहे की, लोकसभेचे अधिवेशन सुरू असताना पंतप्रधानांनी परदेशात जाऊ नये. परंतु, आपल्या पंतप्रधानांनी ही परंपरा मोडली. तेव्हा असा प्रश्न का उपस्थित केला जात नाही?," असं काँग्रेसने म्हटलं आहे.