'नालायक अधिकारी....', भाजपा नेता पोलिसांवर संतापला, IGP ला सुनावलं, VIDEO व्हायरल
जम्मू-काश्मीरमध्ये भाजपा नेते आणि विधानसभेतील विरोधी पक्षनेते सुनील शर्मा यांनी पोलिसांना अक्षम आणि नालायक संबोधून वाद निर्माण केला आहे. जम्मू क्षेत्राचे पोलीस महानिरीक्षक (IGP) तेजिंदर सिंग यांच्या उपस्थितीतच त्यांनी पोलिसांच्या कार्यपद्धतीवर प्रश्नचिन्ह उपस्थित केले.
जम्मू आणि काश्मीरमध्ये विधानसभेतील विरोधी पक्षनेते आणि भाजपचे ज्येष्ठ नेते सुनील शर्मा यांनी केलेल्या एका विधानामुळे वाद निर्माण झाला आहे. शनिवारी त्यांनी जम्मू आणि काश्मीर पोलिसांना अकार्यक्षम आणि नालायक म्हटलं. विशेष म्हणजे, त्यांनी हे विधान जम्मू क्षेत्राचे पोलीस महानिरीक्षक (IGP) तेजिंदर सिंग यांच्या उपस्थितीत केले. या घटनेचा एक व्हिडिओ सध्या सोशल मीडियावर फिरत आहे.
ही घटना किश्तवाड जिल्ह्यातील दुर्गम अशा दच्छन भागात घडली. बुधवारी दहशतवाद्यांनी रशपाल कुमार आणि बॉनी चंद या दोन विशेष पोलीस अधिकाऱ्यांचे (SPOs) अपहरण करून त्यांची हत्या केली. गुरुवारी सकाळी धर्ना येथील जंगलातून त्यांचे गोळ्यांनी छिन्नविच्छिन्न झालेले मृतदेह सापडले. या घटनेनंतर, पोलीस महानिरीक्षक तेजिंदर सिंग यांनी पीडितांच्या कुटुंबीयांची भेट घेऊन त्यांचं सांत्वन केलं.
यादरम्यान, किश्तवाडच्या आमदार शगुन परिहार यांच्यासोबत उपस्थित असलेल्या सुनील शर्मा यांनी परिसरातील सुरक्षेचा प्रश्न उपस्थित करत नाराजी व्यक्त केली. त्यांनी पोलिसांच्या कार्यपद्धतीवर प्रश्नचिन्ह उपस्थित करत, अधिकाऱ्यांवर गंभीर निष्काळजीपणाचा आरोप केला. सोशल मीडियावर व्हायरल झालेल्या एका व्हिडिओमध्ये, ते आयजीपी (IGP) यांच्या उपस्थितीतच स्थानिक पोलीस व्यवस्थेला जाब विचारताना दिसत आहेत.
सुनील शर्मा यांनी आरोप केला की, दहशतवाद्यांचे माजी 'ओव्हर ग्राउंड वर्कर्स' (OGWs) असलेल्या व्यक्तींची 'स्पेशल पोलीस ऑफिसर' (SPO) म्हणून नियुक्ती केली जात आहे. त्यांनी एका स्थानिक पोलीस अधिकाऱ्याचे OGW नेटवर्कशी कथित संबंध असल्याबाबतही प्रश्न उपस्थित केले. शर्मा यांनी या प्रकरणाची तातडीने चौकशी करण्याची आणि दोषी अधिकाऱ्यांवर कठोर कारवाई करण्याची मागणी केली आहे.
सुरक्षा कर्मचारी आणि स्थानिक रहिवाशांनी आपला जीव गमावलेला असतानाही, चार सक्रिय दहशतवाद्यांना अजूनही का मारले गेलेले नाही, असा प्रश्नही त्यांनी उपस्थित केला.