दिल्लीतील यमुना नदीत मोठ्या प्रमाणावर मासे मृत अवस्थेत आढळल्याने खळबळ उडाली आहे. ईशान्य दिल्लीतील सोनिया विहार परिसरात नदीच्या पाण्यावर मृत मासे तरंगताना दिसले. याचे व्हिडीओ सोशल मीडियावर व्हायरल झाल्यानंतर नदीच्या प्रदूषणाबाबत चिंता व्यक्त होऊ लागली. विशेष म्हणजे, छठपूजेच्या पार्श्वभूमीवर ही घटना घडलीय. 15 आणि 16 नोव्हेंबरला यमुना घाटांवर मोठ्या संख्येने भाविक पूजा करण्यासाठी येण्याची शक्यता आहे. त्यामुळे नदीच्या पाण्याच्या सुरक्षिततेबाबतही प्रश्न उपस्थित झाले आहेत. काय घडलंय नेमकं? सविस्तर जाणून घेऊया.
मृत माशांच्या घटनेनंतर दिल्ली सरकारच्या सिंचन आणि पूरनियंत्रण विभागाने पोलिसांकडे तक्रार दाखल केली. काही अज्ञात व्यक्तींनी जाणीवपूर्वक नदीत मृत मासे टाकल्याचा संशय विभागाने व्यक्त केला. यामुळे सरकारची प्रतिमा खराब करण्याचा आणि छठपूजेच्या पार्श्वभूमीवर धार्मिक भावना दुखावण्याचा प्रयत्न झाल्याचा आरोप तक्रारीत करण्यात आलाय. या तक्रारीच्या आधारे वजीराबाद पोलीस ठाण्यात अज्ञात व्यक्तींविरोधात एफआयआर दाखल करण्यात आली. भारतीय न्याय संहितेच्या कलम 353, 352 आणि 240 अंतर्गत गुन्हा नोंदवण्यात आला.
या घटनेने दिल्लीतील भाजप आणि आम आदमी पक्षातील राजकीय संघर्षालाही तोंड फुटले आहे. दिल्लीचे जलमंत्री प्रवेश वर्मा यांनी काही लोक जाणीवपूर्वक नदीत मृत मासे टाकत असल्याचा आरोप केला. यामागे सरकारला बदनाम करण्याचा हेतू असल्याचे त्यांनी म्हटले. या प्रकरणात आम आदमी पक्षाच्या कार्यकर्त्यांचा सहभाग आहे का?, याची चौकशी करण्याची भूमिकाही त्यांनी मांडली. दुसरीकडे, आम आदमी पक्षाने हे आरोप फेटाळले. यमुनेतील संभाव्य प्रदूषणाची निष्पक्ष चौकशी करण्याची मागणी आपने केली आहे.
स्थानिक नागरिकांनी हथनीकुंड बॅरेजजवळील एका चामड्याच्या कारखान्यातून सोडल्या जाणाऱ्या सांडपाण्यामुळे माशांचा मृत्यू झाल्याचा संशय व्यक्त केला आहे. माशांचा मृत्यू रासायनिक प्रदूषणामुळे झाला की अन्य कारणामुळे?, हे स्पष्ट करण्यासाठी पाण्याचे आणि मृत माशांचे प्रयोगशाळेत परीक्षण आवश्यक आहे.
यमुनेत मृत मासे आढळण्याची ही अलीकडच्या काळातील दुसरी घटना आहे. ऑक्टोबरमध्ये उत्तर दिल्लीतील बुराडी परिसरातही शेकडो मृत मासे आढळले होते. त्यामुळे नदीतील प्रदूषण नियंत्रण, औद्योगिक सांडपाण्यावर देखरेख आणि पाण्याच्या गुणवत्तेची नियमित तपासणी याबाबत प्रश्न उपस्थित होत आहेत. सध्या पोलिसांकडून सोशल मीडिया पोस्ट आणि संबंधित व्यक्तींची चौकशी सुरू आहे.