दिल्लीतील आंदोलनामुळं 3 हजार कोटींचे नुकसान, दिवाळीपर्यंत नुकसान 10 हजार कोटींपर्यंत जाणार? काय घडतंय नेमकं?

दिल्लीत विविध राजकीय पक्ष व विद्यार्थी संघटनांनी मुख्य निवडणुक आयुक्त ज्ञानेश कुमार यांच्या राजीनाम्याची मागणी करत आंदोलन पुकारले आहे.

Written ByMansi KshirsagarEdited ByMansi Kshirsagar

Published: Oct 17, 2026, 12:32 PM IST|Updated: Oct 17, 2026, 12:35 PM IST

join share

दिल्लीतील आंदोलनामुळं 3 हजार कोटींचे नुकसान, दिवाळीपर्यंत नुकसान 10 हजार कोटींपर्यंत जाणार? काय घडतंय नेमकं?

Image Credit: Delhi traders seek protest

मुख्य निवडणुक आयुक्त ज्ञानेश कुमार यांच्या राजीनाम्यासाठी दिल्लीत कॉकरोच जनता पार्टी आणि विरोधकांनी आंदोलन उभारले आहे. दिल्लीत जंतरमंतर आणि इतर प्रमुख परिसरांमध्ये जमावबंदी लागू करून कडेकोट सुरक्षा व्यवस्था हजारो पोलीस आणि निमलष्करी दल तैनात करण्यात आली आहे. मात्र दिल्लीत सुरू असलेल्या आंदोलनांमुळं व्यापाऱ्यांचे सुमारे 3 हजार कोटींचे नुकसान झाले आहे. चेंबर ऑफ ट्रेड अँड इंडस्ट्रीने याबाबत माहिती दिली आहे. दिवाळीपर्यंत नुकसान 10,000 कोटींच्या पुढे जाण्याची भीती CTIने व्यक्त केली आहे.

दिल्ली आणि देशातील व्यापारी व उद्योजकांची प्रमुख संघटना असलेल्या चेंबर ऑफ ट्रेड अँड इंडस्ट्री (CTI) चे अध्यक्ष बृजेश गोयल यांनी सांगितले की, ऑक्टोबर महिन्यात दिल्लीत सुरू असलेल्या सलग धरणे आणि आंदोलनांमुळे दिल्लीतील व्यापाराचे आतापर्यंत सुमारे ३,००० कोटी रुपयांचे नुकसान झाले आहे.

१० ऑक्टोबर रोजी झालेल्या पहिल्या आंदोलनामुळे २,००० कोटी रुपयांचे नुकसान झाले. त्यानंतर १३ ते १६ ऑक्टोबरदरम्यान मध्य दिल्लीत झालेली नाकेबंदी, मेट्रो सेवा बंद ठेवणे आणि सेंट्रल पार्क बंद केल्यामुळे आणखी १,००० कोटी रुपयांचे नुकसान झाल्याचा दावा CTI ने केला आहे.

क्षेत्रनिहाय नुकसानीचा तपशील

1. किरकोळ व्यापार : 1,800 कोटी रुपये (60 टक्के)

दिल्लीतील किरकोळ व्यापाराला सर्वाधिक फटका बसला आहे. सदर बाजार, चांदणी चौक, काश्मिरी गेट, चावडी बाजार, भागीरथ प्लेस, गांधी नगर, नया बाजार, खारी बावली, करावल नगर, करोल बाग, लाजपत राय मार्केट आणि कनॉट प्लेससह 700 हून अधिक बाजारपेठा प्रभावित झाल्याचे CTI ने म्हटले आहे.नवरात्रोत्सव आणि दिवाळीच्या काळातील खरेदीवर याचा मोठा परिणाम झाला आहे.

2. घाऊक व्यापार आणि बाहेरील खरेदीदार : 600 कोटी रुपये (20 टक्के)

सोनीपत, पानिपत, गुरुग्राम, फरीदाबाद, नोएडा, गाझियाबाद आणि राजस्थान येथून येणारे 3 ते 4 लाख घाऊक खरेदीदार दिल्लीत आले नसल्याचा दावा करण्यात आला आहे. ट्रकची वाहतूक विस्कळीत झाली असून पुरवठा साखळीवर परिणाम झाला आहे. सणांसाठी आणलेला माल गोदामांतच पडून राहिला आहे.

3. हॉस्पिटॅलिटी आणि सेवा क्षेत्र : 300 कोटी रुपये (10 टक्के)

हॉटेल, रेस्टॉरंट, चित्रपटगृहे, ब्युटी पार्लर, सलून, जिम आणि क्लब यांना मोठा फटका बसला आहे. या क्षेत्रातील 80टक्के बुकिंग रद्द झाल्याचा CTI चा दावा आहे.

कनॉट प्लेस आणि खान मार्केटमधील रेस्टॉरंटमध्ये संध्याकाळच्या बुकिंगवर परिणाम झाला. परदेशी पर्यटकांसह इतर पर्यटकही मध्य दिल्लीत जाणे टाळत असल्याचे संघटनेने म्हटले आहे.

4. वाहतूक, ऑटो-टॅक्सी आणि पर्यटन : 180 कोटी रुपये (6 टक्के)

20 हून अधिक मेट्रो स्थानके बंद ठेवणे, 10 ते 12 किलोमीटरपर्यंत वाहतूक कोंडी आणि बस मार्गांतील बदल यामुळे ऑटो, टॅक्सी आणि ई-रिक्षाचालकांच्या उत्पन्नावर परिणाम झाला आहे. वाहतूक कोंडीत 5000 हून अधिक ट्रक आणि टेम्पो अडकल्याचा दावा CTI ने केला आहे.

5. असंघटित क्षेत्र : 120 कोटी रुपये (4 टक्के)

रोजंदारीवर काम करणारे मजूर, कारागीर, माल चढवणारे-उतरणारे कामगार, विक्रेते आणि फेरीवाल्यांनाही मोठा फटका बसला आहे. गांधी नगर आणि सदर बाजार परिसरात 50 हजारांहून अधिक रोजंदारी कामगारांना काम मिळाले नसल्याचे CTI ने म्हटले आहे.

दिवाळीपर्यंत नुकसान 10 हजार कोटींच्या पुढे जाण्याची भीती

CTI चे अध्यक्ष बृजेश गोयल म्हणाले, “10 ऑक्टोबर रोजी दिल्लीत लॉकडाऊनसारखी परिस्थिती निर्माण झाली होती. 16 ऑक्टोबर रोजी सेंट्रल पार्क बंद होते. 10 हजार पोलिस तैनात करण्यात आले होते आणि 150 हून अधिक लोकांना ताब्यात घेण्यात आले होते. यामुळे संपूर्ण दिल्लीत भीतीचे वातावरण निर्माण झाले.”

ते पुढे म्हणाले, “नवरात्रोत्सव, रामलीला आणि दिवाळी हा व्यापाऱ्यांसाठी वर्षभरातील कमाईचा अत्यंत महत्त्वाचा काळ आहे. दर आठवड्याला आंदोलने सुरू राहिली, तर दिवाळीपर्यंत व्यापाराचे नुकसान 10 हजार कोटी रुपयांच्या पुढे जाईल.”

CTI च्या सरकारकडे चार प्रमुख मागण्या

1. दिवाळीपर्यंत मध्य दिल्ली, नवी दिल्ली आणि लुटियन्स परिसरात धरणे व आंदोलनांवर पूर्ण बंदी घालावी.

2. भविष्यातील आंदोलनांसाठी बाह्य दिल्लीतील बुराडी, रोहिणी आणि द्वारका येथे कायमस्वरूपी आंदोलन क्षेत्रे निश्चित करावीत.

३. ऑक्टोबरमध्ये झालेल्या 3,000 कोटी रुपयांच्या नुकसानीच्या पार्श्वभूमीवर व्यापाऱ्यांना मदत पॅकेज द्यावे. तसेच वीज-पाणी बिलांमध्ये आणि GST मध्ये सवलत द्यावी.

४. पोलिस प्रशासनाने दुकानदारांवर जबरदस्तीने दुकाने बंद करण्यासाठी दबाव आणू नये. त्याऐवजी बाजारपेठा सुरू ठेवण्यासाठी आवश्यक सुरक्षा व्यवस्था करावी.

CTI च्या मते, दिवाळीच्या महत्त्वाच्या खरेदीच्या काळात वारंवार होणाऱ्या आंदोलनांमुळे दिल्लीतील व्यापारी, वाहतूकदार, सेवा क्षेत्र आणि रोजंदारी कामगारांच्या उत्पन्नावर गंभीर परिणाम होत आहे.

Add Zee News as a Preferred Source

TAGS:

india

BJP

About the Author

Mansi Kshirsagar

मानसी क्षीरसागर झी 24 डिजीटलमध्ये सब एडिटर म्हणून कार्यरत आहेत. त्यांन मीडिया क्षेत्राचा 10 वर्षांचा अनुभव आहे. महाराष्ट्र टाइम्स डिजीटल या वृत्तसंस्थेपासून कारकिर्दीची सुरुवात केली. राजकीय, मनोरंजन आणि जनरल बातम्यांमध्ये हातखंडा आहे. पायाभूत सुविधा म्हणजेच infrastructure, मुंबई लोकल संबंधित बातम्यांमध्ये विशेष रुची आहे. महाराष्ट्र व मुंबईतील महत्त्वाचे प्रकल्पाचे अपडेट वाचकापर्यंत पोहोचवतात.त्याचबरोबर, बातमीमागची बातमी म्हणजेच घडामोडींचा विश्लेषणात्मक कव्हरेज करण्याची विशेष आवड आहे. गुन्हेविषयक बातम्या आणि त्याचे विश्लेषणात्मक लेख आणि त्याचा अभ्यासपूर्ण मसुदा वाचकांना समजेल अशा भाषेत लिहिण्याची विशेष आवड आहे. त्याचबरोबर, लाइफस्टाईल आणि हवामानासंदर्भातील बातम्यांमध्येसुद्धा त्यांचा विशेष हातखंडा आहे.डिजिटल मीडियातील कारकीर्दमानसी यांनी त्यांच्या कारकीर्दीची सुरुवात डिजीटल मीडियापासून केली. ग्रुम अँड ग्रो या अॅपसाठी कंटेट रायटर म्हणून काम करण्यास सुरुवात केली. त्यानंतर महाराष्ट्र टाइम्स ऑनलाइनमध्ये रुजू झाल्या. मनोजरंन बातम्यांपासून सुरुवात केल्यानंतर जनरल बातम्या, अर्थविषयक बातम्या, क्राइम आणि लाइफस्टाईल विषयाशी निगडीत विषयांवर लिहिण्यास सुरुवात केली. मानसी या आता झी 24 तासमध्ये राजकीय, सामाजिक आणि इन्फ्रासंदर्भातील बातम्या प्रामुख्याने करतात.शैक्षणिक पात्रतामानसी क्षीरसागर यांची शैक्षणिक पात्रता पाहायची झाल्यास त्यांनी बॅचलर ऑफ मास मीडिया (BMM) मध्ये पदवी घेतली असून मास्टर ऑफ आर्ट्स इन कम्युनिकेशन अँड जर्नालिझम (MACJ) असे पदव्यूत्तर शिक्षण घेतलं आहे. शिवाय डिजिटल मार्केटिंग या विषयाचा सुद्धा त्यांचा अभ्यास आहे. डिजिटल मीडियातील बदलते ट्रेंड तसेच बदलती वाचकवृत्ती लक्षात घेऊन बातमी अथवा लेखांचे सादरीकरण कशा प्रकारे करू शकतो याचा अभ्यास करून त्या आपल्या कामात काळानुरुप बदल करतात.