'रस्ता नाही, तर विमानाने जायला हवं होतं...,' टायगरच्या हल्लेखोरांना कारने घेऊन गेल्याने मुंबई पोलिसांवर संतापले युपीचे माजी DGP

बॉलिवूड अभिनेता टायगर श्रॉफवर जीवघेणा हल्ला करणाऱ्या तिन्ही आरोपींना मुंबईला आणलं जात आहे. मुंबई पोलीस त्यांना घेऊन निघाले आहेत. हल्ल्यानंतर रिहान, फूल सिंग आणि हृतिक कुमार (उर्फ रोशन) या तिन्ही हल्लेखोरांना राजस्थानमधील कोटा येथून अटक करण्यात आली. स्थानिक न्यायालयातून ट्रान्झिट रिमांड मिळाल्यानंतर, पोलीस या तिन्ही आरोपींना दोन  गाड्यांमधून मुंबईला घेऊन जात होते. सुरुवातीला फूल सिंग आणि हृतिक कुमार एका वाहनात होते, तर रिहान दुसऱ्या वाहनात होता. मात्र वाटेत पोलिसांनी रिहानला इतर दोघांच्या वाहनात हलवले. पोलिसांच्या ताफ्यामागे प्रसारमाध्यमांची वाहनेही आहेत.

'आरोपींना रस्तेमार्गे मुंबईला नेणं योग्य नाही'

उत्तर प्रदेशचे माजी पोलीस महासंचालक विक्रम सिंह यांनी 'झी न्यूज'शी संवाद साधताना मुंबई पोलिसांच्या कार्यपद्धतीवर प्रश्नचिन्ह उपस्थित केलं आहे. आरोपींना अशाप्रकारे नेण्यावर त्यांनी आपली नाराजी बोलून दाखवली. इतक्या हायप्रोफाइल प्रकरणातील आरोपींना अशाप्रकारे रस्त्याने घेऊन जाणं योग्य नाही. यासाठी विशेष विमानाची व्यवस्था करायला हवी होती असं मत त्यांनी व्यक्त केलं आहे.

'विमानाची करायलाहवी होती व्यवस्था'

त्यांनी म्हटलं आहे की, "प्रत्येक राज्य सरकारकडे राजकीय विमानं असतात. त्यातील एका विमानाचा अशा प्रकरणात वापर केला पाहिजे.  जेणेकरुन आरोपींना 24 तासात स्थानिक न्यायालयात हजर केलं जाऊ शकतं. अशाप्रकारे रस्तेमार्गे हल्लेखोरांना राजस्थानहून मुंबईला घेऊन जाणं धोकादायक आहे".

दरम्यान, पोलीस तपासातून समोर आले आहे की, हल्लेखोरांनी 11 ऑक्टोबर रोजी टायगर श्रॉफवर हल्ला करण्याची योजना आखली होती. मात्र, त्या दिवशी टायगर फुटबॉल खेळण्यासाठी मैदानावर न आल्यामुळे त्यांची योजना अयशस्वी ठरली. त्यानंतर, 18 ऑक्टोबरला त्यांना पुन्हा एक संधी मिळाली होती.

18 ऑक्टोबरला टायगरवर हल्ला

रविवारी संध्याकाळी, मुंबईतील जुहू येथील एका मैदानावर फुटबॉल खेळून टायगर श्रॉफ कारने घरी परतत होता. यावेळी बाहेर वाट पाहत थांबलेल्या हल्लेखोरांनी त्याच्या कारवर गोळीबार केला. हल्लेखोरांपैकी एक जण मोटारसायकलवरच थांबला होता, तर इतर दोघे खाली उतरले होते. या दोघांनी गाडीच्या पुढच्या आणि डाव्या बाजूला लक्ष्य करून पाच गोळ्या झाडल्या. टायगरने वेळीच खाली वाकून स्वतःचा बचाव केला, ज्यामुळे तो या हल्ल्यातून सुदैवाने वाचला. मात्र, या गोळीबारात त्याचा चालक आणि एक व्यक्ती जखमी झाले. घटनेनंतर, तिन्ही हल्लेखोर मोटारसायकलवरून घटनास्थळावरून पळून गेले.

Ratlam, Madhya Pradesh: Mumbai Police are taking three accused, including Rehan, Hrithik and a minor, from Kota to Mumbai in connection with the Tiger Shroff firing case under tight security. Kota Police apprehended the accused and handed them over to Mumbai Police. https://t.co/wniyWh7iXf

— IANS (@ians_india) October 20, 2026

आरोपी लॉरेन्स टोळीशी संबंधित

पोलिसांच्या माहितीनुसार, अटक करण्यात आलेल्या व्यक्तींपैकी फूल सिंग आणि रिहान ऊर्फ सुक्खा हे हरियाणातील सोनीपतचे रहिवासी आहेत, तर रितिक कुमार ऊर्फ रोशन हा बिहारमधील बेगुसरायचा असल्याचे सांगण्यात येत आहे. रितिक मुंबईत राहत होता आणि 'रॅपिडो' (Rapido) रायडर म्हणून काम करत होता. हे तिघेही गँगस्टर लॉरेन्स बिश्नोईच्या टोळीशी संबंधित असल्याचे समजते. मुंबई पोलीस सध्या या घटनेच्या सर्व  बाजूंनी तपास करत आहे, ज्यामध्ये गुन्ह्यामागचा हेतू आणि संशयितांचे या गुन्हेगारी टोळीशी असलेले संबंध यांचा समावेश आहे.