उद्योजक शिवाच्या हत्येनंतर पोस्टमॉर्टम रिपोर्टमधून धक्कादायक खुलासे, शरिराच्या आत एकूण 10...; पोलीसही हादरले, फ्लॅटमध्ये सापडली तसली खेळणी अन्...

लखनऊमध्ये अपार्टमेंटच्या चौथ्या मजल्यावरून पडून मृत्यू झालेल्या व्यावसायिकाच्या शवविच्छेदन अहवालातून धक्कादायक माहिती समोर आली आहे. मृत्यूपूर्वी त्याला १० गंभीर अंतर्गत दुखापती झाल्या होत्या, असा खुलासा त्याच्या शवविच्छेदन अहवालातून झाला आहे. यामुळे तपासात आता एक नवा ट्विस्ट आला असून, परिस्थितीबाबत प्रश्नचिन्ह निर्माण झाले आहे. शवविच्छेदन अहवालानुसार, दुखापतींमुळे झालेला तीव्र आघात आणि अतिरक्तस्राव हे शिव शर्मा याच्या मृत्यूचे कारण ठरले. या दुखापती एखाद्या कठीण आणि खडबडीत पृष्ठभागावर आदळल्यामुळे झाल्या असाव्यात, असेही अहवालात नमूद करण्यात आले आहे. दुखापत होणे आणि मृत्यू ओढवणे यांमधील कालावधी निश्चित करता आलेला नाही.

पोलिसांनी दिलेल्या माहितीनुसार, 9 ऑक्टोबर रोजी रात्री 'अवध ग्रीन अपार्टमेंट'मधील एका फ्लॅटच्या चौथ्या मजल्यावरून पडून शिव शर्मा याचा मृत्यू झाला. सुरुवातीला ही घटना अपघाती मृत्यू असावी, असा अंदाज वर्तवण्यात आला होता. मात्र, मारहाण आणि छळ झाल्याचा आरोप करत त्यांच्या कुटुंबीयांनी तक्रार दाखल केल्यानंतर पोलिसांनी हत्येचा गुन्हा नोंदवला. पोलिसांनी या प्रकरणात शिव यांची 'लिव्ह-इन पार्टनर' आणि सोशल मीडिया इन्फ्लुएन्सर श्रद्धा दुबे, तिची बहीण, त्यांचा चालक आणि इतर दोघांना आरोपी केले आहे.

'खाली पडण्यापूर्वी शिवावर अत्याचार'

शिवाची आई, रंजना शर्मा यांनी आरोप केला की, इमारतीवरून खाली फेकले जाण्यापूर्वी त्यांच्या मुलाला डांबून ठेवण्यात आले होते आणि त्याच्यावर अमानुषपणे मारहाण करण्यात आली होती. त्यांनी दावा केला की त्याच्या शरीरावर अनेक जखमा होत्या. यामध्ये जबडा, दोन्ही डोळ्यांच्या आसपासचा भाग, बरगड्या आणि पायाच्या हाडाला झालेल्या फ्रॅक्चरचा समावेश होता. तसेच, त्याच्या शरीरावर सिगारेटचे चटके आणि ओरखडेही असल्याचे त्यांनी सांगितले. मृत्यू झाला तेव्हा शिवाने केवळ अंतर्वस्त्र परिधान केले होते, असेही त्या म्हणाल्या.

श्रद्धा गेल्या चार-पाच महिन्यांपासून शिवाचा छळ करत होती, त्याला मारहाण करत होती आणि खोट्या प्रकरणांत अडकवण्याची धमकी देत ​​होती, असा आरोप त्याच्या कुटुंबीयांनी केला. कुटुंबीयांच्या माहितीनुसार, शिवा गेल्या चार-पाच महिन्यांपासून तिच्यासोबत राहत होता.

त्यांनी असाही दावा केला की, शिवाच्या मृत्यूपूर्वी साधारण आठवडाभर आधी श्रद्धा त्यांच्या दुकानात आली होती आणि तिने शिवाचा ताबा आपल्याकडे सोपवण्याची मागणी करत त्यांना धमकावले होते.

सेक्स टॉइज आणि ऑडी कारचं गूढ

तपासादरम्यान मिळालेल्या माहितीनुसार, पोलिसांनी त्या फ्लॅटमधून लैंगिक संबंधांसाठी वापरली जाणारी खेळणी (sex toys) आणि लैंगिक क्षमता वाढवणारी औषधे जप्त केली आहेत. शर्मा खाली पडल्यानंतर काही वेळातच 'सचिवालय' अशी पाटी असलेली एक पांढऱ्या रंगाची ऑडी कार त्या इमारतीपाशी आल्याचे सीसीटीव्ही फुटेजमध्येही दिसून आले आहे.

तपासादरम्यान हाती आलेल्या चॅट्समध्ये राजकीय नेते आणि इतर प्रभावशाली व्यक्तींचा उल्लेख असल्याचे समजते. शवविच्छेदनाच्या अहवालावरून हे स्पष्ट होते की शिवा शर्माला मृत्यूपूर्वीच दुखापत झाली होती. मात्र, त्याच्यावर हल्ला करून त्यांना चौथ्या मजल्यावरून खाली फेकले गेले होते की नाही, हे त्यावरून निश्चितपणे सिद्ध होत नाही.

शर्मा याचा मृत्यू उंचावरून पडल्यामुळे झाला की इमारतीवरून खाली फेकण्यापूर्वीच त्याची हत्या करण्यात आली होती, याचा तपास पोलीस करत आहेत. त्यांच्या मृत्यूला कारणीभूत ठरलेल्या परिस्थितीचा तपास अद्याप सुरू आहे.