'अंदाज लावा काँग्रेसने किती जागा जिंकल्या असतील?', MLC निकालानंतर पंतप्रधान मोदींचा टोला, म्हणाले 'बॅलेट पेपरवरच निवडणुका...'

पंतप्रधान नरेंद्र मोदी यांनी चार राज्यांतील विधान परिषद पोटनिवडणुकीत निराशाजनक कामगिरी केल्यानंतर काँग्रेसला टोला लगावला आहे. एक्सवर पोस्ट शेअर करत त्यांनी काँग्रेसची खिल्ली उडवली आहे. 'इमोजी' वापरून त्यांनी काँग्रेसच्या जखमेवर मीठ चोळलं आहे. चार राज्यांतील विधान परिषदेच्या 28 जागांसाठी झालेल्या या पोटनिवडणुकीत काँग्रेसला एकही जागा जिंकता आली नाही. पक्षाने यापैकी 12 जागांवर निवडणूक लढवली होती, ज्यातील चार जागांवर यापूर्वी त्यांचा विजय झाला होता. काँग्रेससाठी सर्वात मोठा धक्का कर्नाटकात बसला, जिथे सत्तेत असूनही त्यांना एकही जागा मिळवता आली नाही.

बॅलेट पेपरवर निवडणुका झाल्याचं पंतप्रधानांनी यावेळी अधोरेखित केलं आहे. मतदान यंत्रांमध्ये फेरफार झाल्याचा आरोप करत पुन्हा एकदा बॅलेट पेपर वापरण्याची मागणी करणाऱ्या काँग्रेसवर त्यांनी याद्वारे अप्रत्यक्षपणे टीका केली. "उत्तर प्रदेश, महाराष्ट्र, बिहार आणि कर्नाटक या 4 मोठ्या राज्यांमधील 28 जागांवर विधान परिषदेच्या निवडणुका. मतपत्रिका वापरून निवडणुका पार पडल्या. अंदाज लावा, काँग्रेसने किती जागा जिंकल्या?," अशी विचारणा मोदींनी केली आहे. पंतप्रधान मोदींनी यावेळी इमोजीही शेअर केली आहे.

निवडणूक आयुक्त ज्ञानेश कुमार यांच्या राजीनाम्याच्या मागणीसह काँग्रेस निवडणुकीत बॅलेट पेपरचा वापर करण्याची मागणी करत आहे. इंडियन एक्सप्रेसने दिलेल्या वृत्तात सविस्तरपणे सांगण्यात आले आहे की, मुख्य निवडणूक आयुक्त ज्ञानेश कुमार यांच्या नेतृत्वाखालील मतदार यादीच्या विशेष सखोल पुनरावलोकन (SIR) प्रक्रियेसंबंधित निर्णय आणि आदेशांवर निवडणूक आयुक्त सुखबीर सिंग संधू आणि विवेक जोशी यांनी 10 महिन्यांच्या कालावधीत 14 वेळा औपचारिकपणे नोंदवून आक्षेप नोंदवला होता.

MLC elections in 28 seats across 4 big states - Uttar Pradesh, Maharashtra, Bihar and Karnataka. Elections held using ballot papers. Guess how many seats Congress won? 🧐

— Narendra Modi (@narendramodi) October 28, 2026

84 वर्षीय खर्गे यांनी सप्टेंबर महिन्यात 'इंडिया' (INDIA) आघाडीच्या बैठकीनंतर सांगितलं की, संपूर्ण देशात नागरिक आणि राजकीय पक्ष निवडणूक आयोगाच्या कामकाजाबाबत गंभीर चिंता व्यक्त करत आहेत.

खर्गे म्हणाले, "आम्ही अनेक वर्षांपासून ईव्हीएम (EVMs) बाबत उत्तरे मागितली आहेत. आम्ही मतदार यादीत फेरफार केल्याबद्दल आणि निवडणूक यादीत (electoral rolls) विनाकारण केलेल्या बदलांबाबत प्रश्न उपस्थित केले आहेत. राहुल गांधींनी पुराव्यासह दाखवून दिले की, महादेपुरा, आलंद, हरियाणा आणि महाराष्ट्रात असे प्रकार घडले आहेत. त्याचप्रमाणे, 'इंडिया' आघाडीतील सर्व पक्षांनी यासंदर्भात प्रश्न उपस्थित केले आणि आक्षेप नोंदवले. परंतु, दुर्दैवाने सर्व प्रयत्न निष्फळ ठरले." त्यांनी पुढे असेही म्हटले की, निवडणूक आयोगाने याकडे "पूर्णपणे दुर्लक्ष केले".

"ईव्हीएम (EVMs) बाबत आपली भूमिका स्पष्ट असायला हवी. भाजप आपल्या गरजेनुसार या यंत्रांचा वापर करतो. मग ती निवडणूक जिंकण्यासाठी असो, त्रिशंकू निकाल मिळवण्यासाठी असो किंवा निवडणूक हरण्यासाठी असो. राहुल गांधींच्या शब्दांत सांगायचे तर, आपण त्यांना यापुढे या यंत्रांचा वापर करू देऊ शकत नाही. भारताच्या निवडणूक प्रणालीवर लोकांचा विश्वास आणि खात्री पुन्हा निर्माण करण्यासाठी आपल्याला पुन्हा मतपत्रिका (ballot papers) पद्धतीकडे वळावे लागेल," असे काँग्रेस अध्यक्षांनी म्हटले होते.