विद्यार्थ्यांची मज्जाच मज्जा! नवरात्री-दसऱ्याला कुठे १० दिवस शाळांना सुट्टी? पाहा राज्यनिहाय संपूर्ण यादी

ऑक्टोबर हा सणासुदीचा महिना आहे. या काळात सारेजण आनंद, उत्साहात सण साजरे करत असतात. दरम्यान शालेय विद्यार्थ्यांसाठी गुड न्यूज आहे. 
नवरात्रोत्सव, दुर्गापूजा आणि दसऱ्याच्या सणांमुळे ऑक्टोबर महिन्यात देशातील अनेक राज्यांमध्ये शाळांना सुट्ट्या मिळणार आहेत. मात्र, सर्व राज्यांमध्ये सुट्ट्यांचा कालावधी सारखा नाही. काही ठिकाणी नवरात्रीच्या काळात दीर्घ सुट्टी दिली जाते, तर काही राज्यांमध्ये महाष्टमी, महानवमी आणि विजयादशमी या सणांच्या दिवशीच शाळा बंद राहतात. पश्चिम बंगालमध्ये दुर्गापूजेच्या निमित्ताने सलग सुट्ट्यांचे नियोजन आहे. आंध्र प्रदेश आणि तेलंगणामध्येही दसऱ्याच्या सुट्ट्यांचा कालावधी मोठा आहे. कुठे आणि किती सुट्ट्या आहेत? सविस्तर जाणून घेऊया.

पश्चिम बंगालमध्ये दुर्गापूजेसाठी दीर्घ सुट्टी

पश्चिम बंगालमध्ये दुर्गापूजा हा सर्वांत मोठ्या उत्सवांपैकी एक आहे. राज्याच्या उच्च माध्यमिक शिक्षण परिषदेच्या सुट्टीच्या यादीत १५ ते २६ ऑक्टोबर २०२६ या कालावधीत दुर्गापूजेसाठी सुट्टी नमूद करण्यात आली आहे. महाचतुर्थीपासून विजयादशमीपर्यंत उत्सवाचा काळ असतो. त्यानंतर लक्ष्मीपूजेच्या निमित्तानेही सुट्टीचा समावेश आहे. त्यामुळे या काळात विद्यार्थ्यांना सलग सुट्ट्यांचा लाभ मिळू शकतो.

आंध्र प्रदेश आणि तेलंगणामध्ये दसऱ्याची सुट्टी

आंध्र प्रदेशमध्ये शाळांच्या दसरा सुट्ट्यांचा कालावधी 10 ते 21 ऑक्टोबर असा नमूद करण्यात आला आहे. तेलंगणामध्येही 10 ते 22 ऑक्टोबरदरम्यान दसऱ्याची सुट्टी असल्याचे वृत्त आहे. या काळात बथुकम्मा, महानवमी आणि विजयादशमीसारखे सण साजरे केले जातात. त्यामुळे विद्यार्थ्यांना सलग अनेक दिवस शाळेतून विश्रांती मिळू शकते.

बिहारमध्ये दुर्गापूजेसाठी 17 ते 21 ऑक्टोबर सुट्टी

बिहारच्या 2026 मधील शालेय सुट्टीच्या दिनदर्शिकेनुसार दुर्गापूजेसाठी 17 ते 21 ऑक्टोबरदरम्यान पाच दिवसांची सुट्टी नमूद आहे. याशिवाय नवरात्रोत्सवाशी संबंधित काही दिवसांची नोंदही दिनदर्शिकेत आहे. त्यामुळे विद्यार्थ्यांना सणाच्या काळात सुट्ट्यांचे नियोजन करता येईल. तथापि, सरकारी शाळा, खासगी शाळा आणि वेगवेगळ्या शिक्षण मंडळांनुसार प्रत्यक्ष सुट्टीचा कालावधी वेगळा असू शकतो. पालकांनी शाळेकडून आलेल्या अधिकृत सूचनेला प्राधान्य द्यावे, असे आवाहन करण्यात आले आहे.

तामिळनाडूमध्ये आयुधपूजा आणि विजयादशमीला सुट्टी

तामिळनाडूमध्ये तिमाही परीक्षांनंतर ५ ऑक्टोबरपासून शाळा सुरू होण्याचे वेळापत्रक नमूद करण्यात आले आहे. त्यानंतर १९ ऑक्टोबरला आयुधपूजा आणि 20 ऑक्टोबरला विजयादशमीच्या निमित्ताने सुट्टी असू शकते. इतर राज्यांप्रमाणेच येथेही सण आणि शाळेच्या दिनदर्शिकेनुसार सुट्ट्यांचे नियोजन केले जाते. त्यामुळे विद्यार्थ्यांनी परीक्षांचे वेळापत्रक, शाळा सुरू होण्याची तारीख आणि सणांच्या सुट्ट्या यांची एकत्रित माहिती तपासण्याचे आवाहन करण्यात आले आहे.

महाराष्ट्रासह इतर राज्यांमध्ये 20 ऑक्टोबरला दसऱ्याची सुट्टी

महाराष्ट्रासह दिल्ली, उत्तर प्रदेश, मध्य प्रदेश, राजस्थान आणि इतर अनेक राज्यांमध्ये 20 ऑक्टोबर 2026 रोजी विजयादशमी किंवा दसऱ्याची सुट्टी आहे. मात्र, नवरात्रोत्सवाच्या सर्व दिवसांत शाळा बंद असतीलच असे नाही. काही ठिकाणी महाष्टमी किंवा महानवमीची अतिरिक्त सुट्टी दिली जाऊ शकते, तर काही शाळा नेहमीच्या वेळापत्रकानुसार सुरू राहू शकतात. त्यामुळे विद्यार्थ्यांनी आपल्या शाळेची अधिकृत सूचना तपासण्याचे आवाहन करण्यात आले आहे.