वेळीच जाग न आल्याने ₹61 लाखांचं नुकसान! तरुणासोबत नेमकं घडलं काय? स्वत: सांगितला संपूर्ण घटनाक्रम

'एक लहानशी डुलकी, आयुष्यभराची सुटी' किंवा 'झोपेपासून सावधान; हाच सुखी प्रवासाचा मान' अशी वाक्यं तुम्ही महामार्गावरुन प्रवास करताना वाचली असतील. चालकाने सावधपणे प्रवास करावा, झोप येत असेल तर विश्रांती घ्यावी अन्यथा अपघात अटळ आहे असा इशारा देणाऱ्या या पाट्या रस्त्यावरील प्रवासासाठी असल्या तरी या पाट्यांमधून दिला जाणारा इशारा आठवावा असा प्रकार एका तरुणासोबत घडला असून फक्त हा सारा प्रकार शेअर बाजारासंदर्भात झालाय. या तरुणाला झोप लागल्याने त्याने तब्बल 61 लाख रुपये गमावले आहेत.

61 लाख रुपयांचं नुकसान

तर ज्या तरुणासोबत हे झालं तो अवघ्या 27 वर्षांचा अशून त्याचं नाव मयंक राज असं आहे. त्याने 61 लाख रुपये गमावल्याचा स्क्रीनशॉटही शेअर केला असून नेमकं काय घडलं हे सांगितलं आहे. खरं तर मयंकने 9 ऑक्टोबर रोजी एका एफ अँड ओ म्हणजेच फ्युचर्स अँड ऑप्शन्स ट्रेडर्सच्या माध्यमातून एक व्यवहार केला होता. मात्र "झोपेतून वेळेत न उठल्यामुळे" त्याला 61 लाख रुपयांचं नुकसान झालं. त्यानेच याची माहिती एक्सवरुन (आधीचं ट्विटरवरुन) दिली आहे. "जास्त वेळ झोपून राहणं मला इतकं महागात पडेल, याचा मी कधी विचारच केला नव्हता," अशी कॅप्शन देत मयंकने एक स्क्रीनशॉट शेअर केलाय.

तो नेमकं काय म्हणाला?

"काल मी 'कॉल ऑप्शन्स' शॉर्ट केले होते (विकले होते), पण आज सकाळी मला वेळेवर जाग आली नाही. जेव्हा मी उठलो आणि माझी 'ओपन पोझिशन' तपासली, तेव्हा मला मोठं नुकसान झाल्याचं दिसून आलं," असं मयंकने पोस्टच्या कॅप्शनमध्ये म्हटलं आहे. "हे नुकसान माझ्या ट्रेड सेटअपमधील चुकीमुळे नाही, तर शिस्तीच्या अभावामुळे झाले. जर मी वेळेवर उठलो असतो, तर 15-20 लाख रुपयांच्या नियोजित 'स्टॉप-लॉस'वर मी त्या ट्रेडमधून बाहेर पडलो असतो," असे त्याने सांगितले.

तोट्याची बेरीज-वजाबाकी

त्याने 13 ऑक्टोबरला एक्सपायर होणारे 'निफ्टी 22,000 कॉल' शॉर्ट केल्यामुळे झालेल्या 71 लाख रुपयांच्या नुकसानीचा स्क्रीनशॉट शेअर केला. 13 ऑक्टोबरला एक्सपायर होणारे '22,500 कॉल' खरेदी करून 10 लाख रुपयांचा नफा मिळवल्यामुळे त्याने आपले एकूण नुकसान काही प्रमाणात कमी केले. हाच स्क्रीनशॉट त्याने शेअर केला आहे.

महिन्याचं गणित बिघडणार

मात्र यानंतरही त्याने महिन्याच्या शेवटी मी नफ्यात असेल अशी आशा व्यक्त केली आहे. "पण ठीक आहे. गेल्या आठवड्यात मी चांगला नफा कमावला होता, परंतु या नुकसानीमुळे ऑक्टोबर महिन्यातील माझा एकूण नफा-तोटा (पी अँड एल) आता तोट्यात (रेड) गेला आहे. पाहूया उर्वरित महिना कसा जातो. मी हळूहळू नुकसान भरून काढण्यावर, शिस्त पाळण्यावर आणि ऑक्टोबर महिना नफ्यात (ग्रीनवर) संपवण्याच्या दिशेने काम करण्यावर लक्ष देईन," असे तो पुढे म्हणाला.

I never imagined sleeping in could cost me this much. Yesterday, I shorted calls, but this morning I couldn’t wake up on time. When I finally woke up and checked my open position, I was sitting on a significant loss. This loss came from a lack of discipline rather than a mistake in my trade setup. Had I woken up on time, I would have exited around my planned stop-loss of ₹15–20 lakh. But it’s okay. I made some decent profits last week, but this loss has now pushed my overall October P&L into the red. Let’s see how the rest of the month goes. I’ll focus on gradually recovering, staying disciplined, and working towards closing October in the green. I’ll keep sharing my journey with you.

— Mayank Raj (@thetraderoom_) October 9, 2026

लोक काय म्हणाले?

काही एक्स युझर्सने मयंकला बीटीएसटी ट्रेड्स म्हणजेच आज खरेदी करा, उद्या विक्री करा तत्वावर व्यवहार टाळण्याचा किंवा प्रत्येक ट्रेडसाठी स्टॉप लॉस लावण्याचा सल्ला दिला. अन्य एकाने 8 ऑक्टोबर रोजी निफ्टी 1.5% ने घसरला असताना इतक्या कमी पातळीवर बाजार शॉर्ट करायला नको होता, असं मत नोंदवलं. भारतीय शेअर बाजारात शुक्रवारी वाढ झाली आणि 25 वर्षांतील सर्वात मोठी साप्ताहिक घसरण थांबली.