U19 Asia Final: पाकिस्तानविरोधातील विजयानंतर भारतीय खेळाडूंनी मर्यादा ओलांडली? BCCI ने घेतली स्पष्ट भूमिका, 'जर तुम्ही इतक्या....'

भारताकडून पाकिस्तानचा पराभव

भारतीय क्रिकेट संघाने पारंपारिक प्रतिस्पर्धी पाकिस्तानचा पराभव करत अंडर 19 आशिया कप जिंकला आहे. दरम्यान अंतिम सामना जिंकल्यानंतर भारतीय खेळाडूंनी केलेलं सेलिब्रेशन चर्चेचा विषय ठरत आहे.

आक्रमक सेलिब्रेशनची चर्चा

भारतीय खेळाडूंनी आक्रमकपणे सेलिब्रेशन करताना पाकिस्तानी खेळाडूंनाही हातवारे केल्याने यावरुन दोन गट पडले आहेत. काहीजण समर्थन करत असताना, काहींनी हे खेळ भावनेला धरुन नसल्याचं म्हटलं आहे.

बीसीसीआय सचिवांनी केलं भाष्य

त्यातच आता बीसीसीआयने यावर भाष्य केलं आहे. बीसीसीआयचे सचिव देवाजित सैकिया यांनी पाकिस्तानच्या पराभवानंतर सेलिब्रेशन योग्य की अयोग्य अशी चर्चा रंगली असताना भारतीय खेळाडूंचं समर्थन केलं आहे.

'खेळाडूंना भावना व्यक्त करण्याचा अधिकार'

देवाजित सैकिया यांच्या मते, सामन्याच्या बराच काळपर्यंत विजयाची शक्यता धूसर वाटत असताना, अखेरीस विजय मिळवल्यानंतर आपल्या भावना व्यक्त करण्याचा पूर्ण अधिकार या तरुण खेळाडूंना होता.

खेळाडूंना दिला पाठिंबा

एएनआय (ANI) शी बोलताना, शनिवारी ओमानमध्ये एका विकेटने मिळवलेल्या विजयानंतर भारतीय खेळाडूंनी केलेल्या आक्रमक जल्लोषाबद्दल त्यांना प्रश्न विचारण्यात आला. त्यांनी खेळाडूंचे समर्थन करत म्हटले की, त्यांची ही प्रतिक्रिया त्या जिद्दीचे आणि विश्वासाचे प्रतिबिंब आहे, जी त्यांनी सामना हातातून निसटून जात असताना दाखवली होती.

'हे त्यांच्या लढाऊ वृत्तीचे दर्शन'

ते म्हणाले, "हे त्यांच्या लढाऊ वृत्तीचे दर्शन घडवते. आजचा सामना किती उत्कंठावर्धक होता, याचा विचार करा. एका क्षणी तर असे वाटत होते की सामना भारताच्या बाजूने नाहीये. तरीही, भारताने विजय मिळवला. हे संघाचा आत्मविश्वास आणि त्यांची 'कधीही हार न मानण्याची' वृत्ती किती प्रबळ आहे, हेच दर्शवते."

'ते जल्लोष करण्यास पात्र'

"जेव्हा ते इतक्या कठीण परिस्थितीतून सामना जिंकतात, तेव्हा ते नक्कीच जल्लोष करण्यास पात्र असतात. त्यांना तसे करण्याची मुभा आपण दिलीच पाहिजे," असे सांगत त्यांनी समर्थन केले.

सोशल मीडियावर दोन गट

मोहित उलवाने शेवटच्या चेंडूवर विजयी चौकार मारल्यानंतर भारतीय खेळाडूंनी केलेल्या जल्लोषाची चर्चा सुरू झाली, ज्याच्या पार्श्वभूमीवर सैकिया यांची ही टिप्पणी आली आहे. खेळाडूंचा आनंद ओसंडून वाहणे स्वाभाविक होते, परंतु सोशल मीडियावर व्हायरल झालेल्या काही व्हिडिओंत काही खेळाडू पाकिस्तानच्या खेळाडूंच्या दिशेने विशिष्ट हावभाव करताना दिसले, ज्यावर काही चाहत्यांनी टीका केली आहे.

अखेरच्या चेंडूवर जिंकला सामना

भारताने आशिया चषक स्पर्धेच्या अंतिम सामन्यात पाकिस्तानने उभारलेले 337 धावांचे आव्हान यशस्वीपणे पार करत एक गडी राखून विजय मिळवला. एका टप्प्यावर, भारताचे आठ गडी बाद झाले होते आणि 51 चेंडूंत 86 धावांची गरज होती, तेव्हा हा सामना भारताच्या हातातून निसटल्यासारखा वाटत होता. अखेरच्या चेंडूवर 3 धावा हव्या असतानाही भारताने हा सामना जिंकला.