भाऊबीजेला राहुकाळ! बहिणींनो भावाला ओवळताना ही वेळ टाळा! भावाने बहिणीकडे जावे की बहिणीने भावाकडे?
11 नोव्हेंबर रोजी भाऊबीज साजरी करण्यात येणार आहे. यादिवशी राहुकाळ असणार आहे, त्यामुळे बहिणींनो भावाला ओवळताना कुठली वेळ टाळायची आहे जाणून घ्या.
धनत्रयोदशी, लक्ष्मीपूजन, पाडव्यानंतर असतो भाऊबीजेचा सण...दिवाळीचा शेवटचा दिवस...हा सण बहीण भावाच्या पवित्र नात्याला समर्पित आहे. कार्तिक महिन्यातील शुक्ल पक्षाच्या द्वितीया तिथीला भाऊबीज साजरा करण्यात येते. याला यमद्वितीया असंही म्हटलं जातं. या तिथीला यम आपल्या बहिणीकडे जाऊन अन्न ग्रहण केलं होतं. म्हणून यादिवशी भाऊबीज साजरी करण्यात येते. यंदा 11 नोव्हेंबरला भाऊबीज साजरी करण्यात येणार आहे.
...म्हणून भाऊबीज साजरी करता येतं
पौराणिक मान्यतेनुसार, या दिवशी यमराज आपली बहीण यमुना हिच्या घरी गेले आणि तिथे यमुनेने भावाचे औक्षण करून स्वागत केलं. म्हणून या यमद्वितीया असं म्हटलं जातं. बहीण भावाच्या प्रेमाचे प्रतिक म्हणून रक्षाबंधन साजरा करण्यात येतं. मग दिवाळीत भाऊबीज का? तर वास्तू आणि ज्योतिषशास्त्र तज्ज्ञ मकरंद सरदेशमुख यांनी सांगितलं की, रक्षाबंधन म्हणजे बहीण भावाच्या हातावर राखी बांधून भाऊ तिला रक्षा करण्याचे वचन देतो. श्रीकृष्णने द्रौपदीचं रक्षण केलं. तर भाऊबीज हे बहीण भावातील नातं, प्रेम दृढ करण्याचा सण आहे.
भाऊबीजेला भावाने बहिणीकडे जावे की बहिणीने भावाकडे?
हिंदू धर्मानुसार रक्षाबंधनला बहिणीने भावाच्या घरी जावं. तर भाऊबीजेला भावाने बहिणीच्या घरी जाऊन अन्न ग्रहण करणे शुभ मानले जाते.
औक्षवाण करताना टिळा कसा कोणत्या बोटाने आणि कसा लावावा?
शास्त्रांनुसार अंगठ्याने (थंब) टिळा लावावा. असे केल्याने आरोग्य आणि विजय प्राप्त होतो. टिळक नेहमी कपाळावर खालून वरच्या दिशेने लावणे योग्य मानले जाते. टिळा लावल्यानंतर त्यावर अक्षता म्हणजे अखंड तांदूळ लावा. अक्षता हे पूर्णत्वाचे आणि सकारात्मक ऊर्जेचे प्रतीक मानले गेले आहे.
भाऊबीजेसाठी शुभ मुहूर्त काय?
भाऊबीजेला राहुकाळ आहे, मग अशा वेळी कोणत्या वेळी बहिणीने भावाला ओवाळावे असा प्रश्न अनेकांना पडला आहे. तर ज्योतिषशास्त्र तज्ज्ञ सरदेशमुख सांगतात की, भाऊबीज भाऊ बहिणीच्या प्रेमाचे प्रतिक आहे. त्यामुळे यादिवशी वेळ पाहू नये. तरीदेखील 11 नोव्हेंबरला दुपारी 1.30 वाजता राहूकाळ संपतो. त्यानंतर भाऊबीज साजरी करता येणार आहे. पंचांगानुसार भाऊबीजेचा औक्षण करण्यासाठी दुपारी 1:30 ते 3:46 हा सगळ्यात शुभ मुहूर्त आहे. पण तुम्ही त्यानंतरही भावाला ओवाळू शकता.
(Disclaimer - या ठिकाणी दिलेली माहिती ज्योतिष शास्त्रावर आधारित असून ती केवळ माहितीसाठी दिली जात आहे. झी 24 तास या गोष्टींना दुजोरा देत नाही. कोणताही उपाय करण्यापूर्वी संबंधित विषयातील तज्ज्ञांचा सल्ला अवश्य घ्या.)