दिवाळीचा पहिला सण वसुबारस; काय आहे परंपरा, तिथी, पूजा विधी आणि मुहूर्त जाणून घ्या

दिवाळी ही लहान मुलांपासून मोठ्यांपर्यंत सर्वांना हवी हवीशी वाटते. नवीन कपडे, फटाके आणि मिठाई ही लहान मुलांसाठी आकर्षण असतं. अगदी दिवाळीच्या सुट्टी गावाला किंवा छान फिरायला जाण्याचा बेतही ठरतो. तर महिलांमध्ये घराची स्वच्छता आणि मग सजावटसोबत साडी दागिनी, नवीन वस्तूची खरेदी सोबत किचनमध्ये दिवाळी फराळाची लगबग... असा हा दिवाळीच्या सणाची प्रत्येक जण आतुरतेने वाट पाहत असतात. दिवाळीमध्ये पाच दिवस महत्त्वाचे असतात. अनेकांना खास करून शहरात दिवाळीचा पहिला दिवस हा धनत्रयोदशी मानतात. पण थांबा दिवाळीचा पहिला सण असतो तो म्हणजे वसुबारस.

वसुबारसला काय करतात? 

यंदा दिवाळीचा पहिला दिवस हा पंचांगानुसार 5 नोव्हेंबर 2026 गुरुवारी आहे. वसुबारसला गोवत्स द्वादशी असंही म्हटलं जातं. अश्विन कृष्ण द्वादशी तिथीला वसुबारस हा सण साजरा करण्यात येतो. यंदा वसुबारसेसह रमा एकादशी पण असणार आहे. यादिवशी घरोघरी गाय - वासराची पूजा करण्यात येते. शहरात गाय वासराची मूर्तीची पूजा करावी.

वसु म्हणजे धन आणि बारस म्हणजे द्वादशी. हिंदू संस्कृतीत गोमातेला विशेष महत्त्व आहे. हिंदू धर्मानुसार गायीमध्ये 33 कोटी देव वास करतात अशी मानता आहे. त्यामुळे गायची पूजा करणे शुभ मानले जाते.

कशी करावी पूजा?

या दिवशी सकाळी लवकर उठून आंघोळ करुन स्वच्छ वस्त्र परिधान करुन घराबाहेर छान रांगोळी काढावी. तुमच्या घरी गाई आणि वासरु असेल तर त्यांनीही स्नान घालावे. त्यानंतर त्यांची पूजा करावी. पण जर तुम्ही शहरी भागात राहात असाल तर गायी आणि तिच्या वासराच्या मूर्तीची पूजा केली तरी हरकत नाही. गायीसाठी पुरणपोळीचा नैवेद्य खाऊ घालावे. शहरात अनेक जण आपल्या मुलांना घेऊन गोशाळेत जातात. तिथे गाय वासरांना खाऊ घालतात.  

वसूबारस पूजेचा शुभ मुहूर्त

5 नोव्हेंबर 2026 गुरुवारी सकाळी 10:35 नंतर एकादशी संपून द्वादशी लागणार आहे.

गाय वासरु पूजन वेळ: संध्याकाळी 5:33 ते रात्री 7:57 पर्यंत तर किंवा काही पंचांगानुसार संध्याकाळी 5:11 ते 5:54 पर्यंत विशेष शुभ मुहूर्त सांगण्यात आला आहे. पण द्वादशी तिथी सकाळी 10:35 वाजेपासून सुरु होते. तर तुम्ही कधीही पूजा करू शकता. दिवाळी प्रकाशाचा सण असल्याने दिवाळीतील पूजा या संध्याकाळी खास करून करण्यात येतात.