पॅरा एशियन गेम्समध्ये भारताच्या पदकांच्या संख्येत मोठी वाढ, आतापर्यंतचं बेस्ट प्रदर्शन

Para Asian Games 2026 : भारताने जपानच्या आइची नागोयामध्ये झालेल्या एशियन गेम्समध्ये 114 पदकं जिंकून इतिहास रचला. यावेळी भारताकडून खेळाडूंची खूप छोटी तुकडी पाठवण्यात आलेली. मात्र असं असताना सुद्धा पदकांच्या संख्येत मोठी वाढ झाली आहे. भारताने 2010 मध्ये झालेल्या पहिल्या पॅरा एशियन गेम्समध्ये 14 पदकं जिंकले होते. त्यानंतर प्रत्येक सीजनमध्ये भारतीय दलाचं प्रदर्शन हे जबरदस्त राहिलं. आता 2026 मध्ये पदकांची संख्या ही 114 पर्यंत पोहोचली आहे. 2022 च्या तुलनेत भारताने 2026 च्या स्पर्धेत निम्म्या स्पर्धकांना जपानमध्ये पाठवले होते.

2023 मध्ये हांगझू येथे झालेल्या मागील पॅरा आशियाई खेळांसाठी भारताने 309 खेळाडूंचे पथक पाठवले होते. यावेळी जपानमध्ये झालेल्या स्पर्धेत भारताचे 168 पॅरा ॲथलीट सहभागी झाले होते. असे असूनही भारताने 114 पदके जिंकली जी आजवरची देशाची सर्वोत्तम कामगिरी ठरली आहे. भारताने 30 सुवर्ण, 35 रौप्य आणि 49 कांस्य पदकं मिळवली. या कामगिरीसह भारतीय पथकाने मागील आवृत्तीतील आपल्या पदकसंख्येला मागे टाकले आहे. 2023 मध्ये भारताने 108 पदके जिंकली होती आणि यावेळी एकूण पदकांच्या संख्येत सहाने वाढ झाली आहे.

एथलेटिक्सने मिळून दिली सर्वाधिक पदकं :

भारताच्या यशामागे पॅरा एथलेटिक्सचं सर्वात मोठं योगदान आहे. भारताच्या खेळाडूंनी या खेळात एकूण 65 पदकं जिंकली ज्यात 22 सुवर्ण, 19 रौप्य आणि 24 कांस्य पदकांचा समावेश आहे. यात पॅरा बॅडमिंटन दुसऱ्या स्थानावर असून या स्पर्धेत भारतीय खेळाडूंनी 16 पदकं मिळवली. याव्यतिरिक्त त्यांनी पॅरा स्वीमिंगमध्ये 11, पॅरा टेबल टेनिसमध्ये सात, पॅरा आर्चरीमध्ये सहा आणि पॅरा शूटिंगमध्ये पाच पदके जिंकली. भारताच्या एकूण 114 पदकांपैकी 81 पदकं ॲथलेटिक्स आणि बॅडमिंटन या खेळांतून मिळाली आहेत. म्हणजेच भारताच्या एकूण पदकसंख्येमध्ये या दोन खेळांचे योगदान 70 टक्क्यांहून अधिक आहे.

भारत चौथ्या स्थानावर:

भारताने पदकांची मेडल टॅलीमध्ये चौथ स्थान मिळवलं आहे. चीन 435 पदकं मिळवून पहिल्या क्रमांकावर राहिला, जपान 186 पदकं मिळवून दुसऱ्या क्रमांकावर, तर उझबेकिस्तान 145 पदकं मिळवून तिसऱ्या क्रमांकावर राहिला. भारताने दक्षिण कोरियाला मागे टाकत चौथे स्थान पटकावले आहे. ही कामगिरी भारतीय पॅरा स्पोर्ट्समधील वाढती स्पर्धात्मकता आणि आंतरराष्ट्रीय स्तरासाठी खेळाडूंची अधिक चांगली तयारी दर्शवते. मात्र पदकांचा मोठा हिस्सा केवळ काही निवडक खेळांतूनच आला आहे. अशा परिस्थितीत आगामी काळात इतर खेळांमध्येही पदकं जिंकण्याची क्षमता वाढवणे भारतासाठी अत्यंत महत्त्वाचे ठरेल.