Aadhaar Update: मुलांचे Aadhaar बायोमेट्रिक अपडेट फ्री; जाणून घ्या अंतिम तारीख
बालदिननिमित्त UIDAI ने X या सोशल मीडिया प्लॅटफॉर्मवर एक व्हिडिओ पोस्ट करून लोकांना त्यांच्या मुलांचे आधार तात्काळ अद्ययावत करण्याचे आवाहन केले आहे.
भारतीयांसाठी आधार कार्ड हे सर्वात महत्त्वाच्या कागदपत्रांपैकी एक आहे. शाळेमध्ये मुलाला अॅडमिशन मिळवण्यासाठी असो किंवा कोणत्याही सरकारी कागदपत्र किंवा कामासाठी असो आधारकार्ड म्हणजेच ओळखपत्र फार महत्त्वाचे आहे. लहान मुलांसाठी निळ्या रंगणाच कार्ड बनवले जाते त्याला बाल आधारकार्ड असेही म्हंटले जाते. जेव्हा मुलाचा जन्म होतो किंवा ते 5 वर्षांपेक्षा लहान असतात, तेव्हा हे कार्ड त्यांची पहिली सरकारी ओळख बनते. बाल आधार कार्डवर आधार क्रमांकासोबत फक्त फोटो असतो, त्यावर बोटांचे ठसे आणि डोळ्यांचे स्कॅन नसते. जसजसे मूल मोठे होते, चेहरा बदलतो, बोटे मोठी होतात, तेव्हा तेच जुने कार्ड अपूर्ण होते. तेव्हाच अनिवार्य बायोमेट्रिक अद्ययावतीकरणाची (MBU) वेळ येते.
आज बालदिन आहे यानिमित्त UIDAI ने X या सोशल मीडिया प्लॅटफॉर्मवर एक व्हिडिओ पोस्ट करून लोकांना त्यांच्या मुलांचे आधार तात्काळ अद्ययावत करण्याचे आवाहन केले आहे. UIDAI ने सोशल मिडियावर एक पोस्ट शेअर केली आहे यामध्ये त्यांनी लिहीले आहे की, "या बालदिनानिमित्त, आपल्या मुलाच्या डिजिटल ओळखीची तसेच त्यांच्या उज्ज्वल भविष्याची काळजी घ्या! आपल्या मुलासाठी बाल आधार काढा आणि ते 5 आणि 15 वर्षांचे झाल्यावर अनिवार्य बायोमेट्रिक अपडेट (MBU) पूर्ण करतील याची खात्री करा. लक्षात ठेवा! MBU सुविधा 5 ते 17 वयोगटातील मुलांसाठी 30 सप्टेंबर 2027 पर्यंत विनामूल्य उपलब्ध आहे. या बालदिनानिमित्त, आपल्या मुलाचे आधार वेळेवर अद्ययावत करण्याची प्रतिज्ञा घ्या!"
हे ही वाचा
आता घरबसल्या बदला आधारशी लिंक मोबाईल नंबर; OTP आणि फेस व्हेरिफिकेशनने होईल काम
बाल आधार कार्ड अपडेट करण्याची प्रक्रिया
तुम्ही थेट आधार केंद्राला भेट देऊ शकता किंवा वेळ वाचवण्यासाठी आगाऊ अपॉइंटमेंट बुक करू शकता.
भेटीची वेळ निश्चित करण्यासाठी, UIDAI च्या वेबसाइटला किंवा bookappointment.uidai.gov.in या वेबसाइटला भेट देऊन सर्वात जवळचे केंद्र शोधा आणि वेळ आरक्षित करा.
सोबत काय घेऊन जावे
मुलाचे/मुलीचे आधार कार्ड.
मुलाला सोबत घेऊन जा.
सहसा, अतिरिक्त कागदपत्रांची आवश्यकता नसते, परंतु तरीही, मुलाचे जन्म प्रमाणपत्र आणि पालकांनी त्यांचे आधार कार्ड सोबत बाळगावे.
ऑपरेटरला कळवा की मुलाची बायोमेट्रिक्स अद्ययावत करणे आवश्यक आहे.
आता मुलाचा नवीन फोटो काढला जाईल, सर्व 10 बोटांचे ठसे आणि दोन्ही डोळ्यांचे आयरीस स्कॅन घेतले जाईल.
स्लिप्स घ्या आणि त्यांचा मागोवा ठेवा.
अपडेट स्लिप/यूआरएन क्रमांक जपून ठेवा.
