महिला शेतकरी प्रमाणपत्र आता घरबसल्या मिळणार? ऑनलाइन अर्ज कसा करावा, काय आहे निकष?
महिला शेतकरी प्रमाणपत्र मिळवण्यासाठी महाराष्ट्राच्या कृषी विभागाने कृषी विभाग पोर्टल हे ऑनलाइन पोर्टल सुरू केले आहे.
महिला शेतकऱ्यांना शासकीय योजनांचा लाभ घेता यावा यासाठी महाराष्ट्र महिला शेतकरी सक्षमीकरण अधिनियम-2006 लागू करण्यात आला आहे. त्यानुसार महिला शेतकरी प्रमाणपत्राचे वाटप करण्यात येत आहे. या प्रमाणपत्राच्या सहाय्याने महिलांना शासकीय योजनांसह कृषी कर्ज, विमा, कृषी निविष्ठा तसेच विस्तार सेवांचा लाभ मिळणार आहे. पण हे प्रमाणपत्र कसं काढायच? जाणून घ्या.
महिला शेतकऱ्यांना अधिकृत ओळख देण्यासाठी व प्रमाणपत्र मिळवण्यात सोप्पे जावे यासाठी ऑनलाइन पोर्टल लाँच करण्यात आले आहे. अर्ज केल्यानंतर फक्त 15 दिवसांत हे प्रमाणपत्र उपलब्ध करुन दिले जाणार आहे. पात्र महिला शेतकरी राज्य शासनाच्या अधिकृत कृषी पोर्टलवर जाऊन स्वतःच्या मोबाइलवरुन किंवा जवळच्या आपले सरकार केंद्रात जाऊन अर्ज करु शकतात.
कसा कराल अर्ज?
अधिकृत पोर्टलवर जाऊन मोबाईल नंबर व आधार कार्डद्वारे नोंदणी करा. त्यानंतर तुमची वैयक्तीक माहिती, बँक खाते आणि शेतीशी संबंधित सर्व तपशील ऑनलाइन फॉर्ममध्ये भरा. आवश्यक ती सर्व मूळ कागदपत्रे स्कॅन करुन अपलोड करणे. तलाठी, कृषी सहाय्यकाद्वारे डिजीटल पडताळणी पूर्ण झाल्यानंतर 15 दिवसांत ई प्रमाणपत्र जारी केले जाणार आहे.
शेतकरी प्रमाणपत्रासाठीचे निकष काय?
अर्जदार महिला महाराष्ट्राची रहिवासी हवी. तसंच, तिचे वय 18 वर्षापेक्षा जास्त असावे. महिलेच्या नावावर 7/12 उतारा असावा. किंवा पती वा कुटुंबातील सदस्याच्या 7/12 वर नाव असलेली आणि प्रत्यक्ष शेतीकाम करणारी महिला. सातबारा उताऱ्यावर नाव नसले तरीही कुटुंबातील शेतीत सक्रीय सहभाग असल्याचे स्थानिक ग्रामपंचायती अधिकारी किंवा तलाठ्याचे प्रमाणपत्र जोडल्यास अर्ज सादर करता येणार आहे.
नोंदणीसाठी लागणार ही कागदपत्रे
आधार कार्ड, मतदान कार्ड, अद्यावर 7/12, 8-अ उतारा, महाराष्ट्राचा रहिवासी असल्याचा दाखला, डोमासाईल प्रमाणपत्र, पासपोर्ट साईज फोटो आणि स्वयंघोषणापत्र आवश्यक आहे.
