बॉलिवूडचे महानायक अमिताभ बच्चन यांच्या जुहू येथील ‘जलसा’ या प्रसिद्ध बंगल्याबाबत कौटुंबिक मालमत्ता वाद समोर आलाय. अमिताभ यांचे बंधू अजिताभ बच्चन यांच्या पत्नी रामोला बच्चन यांनी 1993 मध्ये जया बच्चन यांच्या नावावर करण्यात आलेल्या गिफ्ट डीडला आव्हान दिलंय. या व्यवहाराची आपल्याला माहिती नव्हती किंवा आपण त्याला संमती दिली नव्हती, असा दावा रामोला यांनी केलाय. या तक्रारीनंतर अंधेरी येथील सहकारी संस्था उपनिबंधक कार्यालयात सुनावणी सुरू आहे.
जलसा बंगल्याची नोंद सुरुवातीला रामोला बच्चन यांच्या नावावर होती. 1993 मध्ये गिफ्ट डीडद्वारे ही मालमत्ता जया बच्चन यांच्या नावावर हस्तांतरित करण्यात आली. मात्र या व्यवहाराची आपल्याला माहिती नव्हती आणि आपली संमतीही घेतली गेली नव्हती, असा आक्षेप रामोला यांनी घेतलाय. गेल्या सात महिन्यांत त्यांनी नोंदणी प्राधिकरणाकडे अनेक तक्रारी दाखल केल्याचे त्यांनी सांगितले. मुंबई मिररने यासंदर्भातील वृत्त दिलंय.
महाराष्ट्रात शहरी मालमत्तेच्या नोंदी आणि त्यातील बदल भूमिअभिलेख विभागाकडून सांभाळले जातात. मालमत्तेच्या नोंदींमधील कथित विसंगती हा या प्रकरणातील महत्त्वाचा मुद्दा आहे. कपूर हाउसिंग सोसायटीच्या नोंदींमध्ये जया बच्चन यांचे नाव मालक म्हणून असल्याचे सांगितले जाते. मात्र, सरकारी प्रॉपर्टी कार्डवर अद्याप रामोला बच्चन यांचे नाव असल्याचा दावा करण्यात आला आहे. प्रॉपर्टी कार्डवरील नाव बदलण्याच्या कथित प्रयत्नांनंतर हा वाद पुन्हा समोर आला.
गिफ्ट डीड तयार करण्याच्या प्रक्रियेवरही रामोला यांनी प्रश्न उपस्थित केले आहेत. त्यांच्या तक्रारीनुसार, हा दस्तऐवज साध्या कागदावर तयार करण्यात आला होता, त्यावेळी मुद्रांक शुल्क भरले नव्हते आणि त्यावर साक्षीदारांच्या सह्या नव्हत्या, असे आरोप आहेत. नंतर या दस्तऐवजाची नोंदणी आणि अभय योजनेअंतर्गत नियमितीकरण कशा पद्धतीने झाले, याबाबतही त्यांनी आक्षेप घेतला. या सर्व बाबींची कागदपत्रांच्या आधारे तपासणी होणे आवश्यक आहे.
रामोला यांच्या तक्रारीची दखल अंधेरी येथील सहकारी संस्था उपनिबंधक कार्यालयाने घेतली आहे. उपनिबंधक फैयाज मुलानी यांनी तक्रार मिळाल्याची पुष्टी केली असून सुनावणी सुरू करण्यात आली. संबंधित पक्षांना आपली बाजू मांडण्यास सांगण्यात आलंय. त्यामुळे या प्रकरणात आता दोन्ही बाजूंची कागदपत्रे आणि दावे तपासले जाणार आहेत.
अमिताभ बच्चन यांचा हा बंगला पूर्वी ‘मन्सा’ नावाने ओळखला जात होता. तो निर्माते एन. सी. सिप्पी यांच्या मालकीचा होता. 1982 मधील ‘सत्ते पे सत्ता’ चित्रपटाच्या मानधनाच्या बदल्यात हा बंगला अमिताभ यांना मिळाला. पुढे त्यांनी तो विकला आणि नंतर पुन्हा विकत घेतला. अभिषेक बच्चन यांच्या प्रवक्त्यांनी हा अंतर्गत कौटुंबिक विषय असल्याचे सांगितले. तर अमिताभ बच्चन यांच्याकडूनही कोणती अधिकृत प्रतिक्रिया आली नाही.