गेले काही दिवस बॉलिवूडच्या अभिनेत्यांना धमकीचे कॉल येण्याच्या घटना समोर येतायत. अभिनेता तुषार कपूर आणि आयुष्मान खुराना यांच्यासह अनेकांना धमकी देणारे कॉल आल्याच्या तक्रारी दाखल झाल्या. याप्रकरणी मुंबई पोलिसांनी वैभव मिश्रा याला ताब्यात घेतलं आहे. आरोपी वैभव मिश्रा हा आयटी इंजिनिअर असून तो लॉरेन्स बिश्नोई गँगच्या प्रभावाखाली असल्याचे तपासात समोर आले आहे. दरम्यान आयुष्यमान खुरानाला दिलेल्या धमकीची ऑडीयो क्लिप समोर आली आहे. काय आहे यात? आरोपीने ऑडिओमध्ये नेमके काय म्हटले आहे, ते जाणून घेऊया. सविस्तर जाणून घेऊया.
नुकताच अभिनेता आयुष्मान खुरानाला एक धमकीवजा ऑडिओ मेसेज मिळाला. मीडिया रिपोर्ट्सनुसार, मुंबई पोलिसांनी या कथित संभाषणाचा ऑडिओ समोर आणलाय. यामध्ये धमकी देणाऱ्या व्यक्तीने आपण लॉरेन्स बिश्नोई टोळीचा सदस्य असल्याचा दावा केला होता.मात्र, नंतर या व्यक्तीला अटक करण्यात आली आणि पोलीस तपासात असे समोर आले की, त्याचा बिश्नोई टोळीशी कोणताही संबंध नव्हता.
ऑडिओमध्ये आरोपी आयुष्मानला म्हणतो, "मी अनिल पंडित बोलतोय; मी लॉरेन्स बिश्नोईचा धाकटा भाऊ आहे. मी तुला फोन करण्याचा प्रयत्न केला, पण तू फोन उचलला नाहीस आणि नंतर तो कट केलास. काही हरकत नाही. आम्हाला फक्त एक निरोप द्यायचा आहे. आमच्याशी बोल. जर तुला काही गोष्टी मिटवायच्या असतील, तर तसे कर. पण जर तुझी हीच वृत्ती राहिली, तर टायगर श्रॉफसोबत जे घडले, तेच तुझ्याबतही घडू शकते. आमच्याकडे चंदीगडमधील तुझ्या घराचा पत्ताही आहे आणि तू इथे कुठे राहतोयस, हेही आम्हाला माहीत आहे."
आरोपी पुढे म्हणतो, "आमच्याकडे तुझ्या बाईकचा नोंदणी क्रमांकही आहे. बघ, आम्हाला फक्त एकदा तुझ्याशी बोलायचे आहे. एकदा का तू आमच्याशी बोललास, की आम्ही तुम्हाला पुन्हा त्रास देणार नाही. जर तू बोलायला तयार असशील, तर आम्हाला काहीही अडचण नाही. आम्ही फक्त तुमच्याशी संवाद सुरू करण्यासाठी फोन केला होता."
संभाषण करणारी व्यक्ती एवढ्यावरच थांबत नाही. ती आयुष्यमान खुरानाला पुढे म्हणते, "आमचा निरोप ऐकल्यानंतर आम्हाला परत फोन कर. जर तू तसे केले नाही, तर आम्ही असे समजू की तू दुसरा मार्ग निवडलायस. म्हणजेच तू पोलिसांकडे जाण्याचा विचार करत आहेस. तू पोलिसांकडे जाऊ शकतोस, आम्हाला काहीही हरकत नाही. पण जे लोक तुम्हाला सुरक्षा देत आहेत, ते तुला किती काळ वाचवू शकतील? आमच्यापासून सुरक्षित राहण्यासाठी तुला दररोज नशिबाची साथ लागेल. आम्हाला तुला इजा पोहोचवण्यासाठी फक्त एकदा नशिबाची साथ मिळाली तरी खूप आहे. "आम्ही तुझा, तुझ्या कुटुंबातील कोणत्याही सदस्याचा किंवा आमच्या हाती लागणाऱ्या इतर कोणाही व्यक्तीचा खात्मा करू. आमच्याशी बोलून चर्चेद्वारे हा प्रश्न सोडवणं तुझ्या हिताचे ठरेल. आम्ही तुझ्या कॉलची वाट पाहत आहोत."
मुंबई गुन्हे शाखेने खंडणी आणि धमकावण्याच्या या प्रकरणात बेंगळुरू येथून 30 वर्षीय तरुणाला ताब्यात घेतले आहे. वैभव मिश्रा असे या आरोपीचे नाव असून, तो व्यवसायाने आयटी इंजिनिअर आहे. त्यानेच लॉरेन्स बिश्नोई टोळीचे नाव वापरून आयुष्मान खुराना यांना धमकावणारा ऑडिओ संदेश पाठवल्याचा आरोप आहे.