टायगर श्रॉफच्या कारवर फायरिंग त्याच्या मागच्याच गाडीत होता 'हा' अभिनेता, म्हणाला 'सगळीकडे रक्तच रक्त...'

Tiger Shroff Car Firing Karan Veer Mehra : बॉलिवूड अभिनेता टायगर श्रॉफ याच्या कारवर 18 ऑक्टोबर रोजी रात्री झालेल्या गोळीबाराच्या घटनेने सर्वांनाच धक्का दिला आहे. बाईकवरून आलेल्या तीन अज्ञात हल्लेखोरांनी टायगरच्या गाडीवर गोळ्या झाडल्या. या घटनेत टायगर श्रॉफच्या कार चालकाला गंभीर दुखापत झाली तर टायगरच्या शरीरावर सुद्धा किरकोळ जखमा झाल्या. ही संपूर्ण थरारक घटना घडली तेव्हा टीव्ही अभिनेता आणि बिग बॉस 18 चा विजेता करणवीर मेहरा याची कार ही ठीक टायगरच्या गाडीच्या होती. टायगरच्या कारवर हल्ला झाल्यावर जवळपास एका तासाने करणवीर मेहराने घटनास्थळी नेमकं काय घडलं याचा खुलासा केला, जे पाहून तो  स्वतः सुद्धा खूप हैराण झालेला.

गाडी पोहोचली तेव्हा रक्ताचे ठसे :

टायगरच्या कारवर हल्ला झाला त्यावेळी त्याच्या मागच्या कारमध्ये असलेला अभिनेता करणवीर मेहराने घडलेल्या घटनेनंतरचा प्रसंग सांगताना म्हंटलं की, '
माझी गाडी टायगरच्या गाडीच्या अगदी मागे होती. आम्ही गेटमधून बाहेर पडून जेव्हा घटनास्थळी पोहोचलो, तेव्हा मला रक्ताचे डाग दिसले. मला समजले की, टायगरच्या ड्रायव्हरला गोळी लागली होती'.

करणवीरने पुढे म्हटलं की, या सगळ्या घटनेत टायगर श्रॉफ हा सुरक्षित आहे हे कळल्यावर मी सुटकेचा निश्वास सोडला. पण ड्रायव्हरची अवस्था पाहून त्यांना खूप वाईट वाटलं. त्याने आशा व्यक्त केली की चालक लवकर बरा होईल. अभिनेता करणवीरने सांगितले की, त्या ठिकाणी मुलेही उपस्थित होती, जी एका वाढदिवसाच्या पार्टीत सहभागी झाली होती. अचानक झालेल्या गोळीबारामुळे गोंधळ निर्माण झाला आणि लोक आपला जीव वाचवण्यासाठी सर्व दिशांना धावू लागले. 

फटाक्यांच्या आवाजात गोळ्यांचा आवाज कळलाच नाही :

करणवीर मेहराने सांगितलं की मुंबईच्या जुहूमध्ये टायगर श्रॉफ सोबत तो फुटबॉल खेळतो. करणवीर टायगरला खूप काळापासून ओळखतो. हल्ल्याच्यावेळी त्याला हल्लेखोर दिसले नाहीत. त्याच्या सांगण्यानुसार तिथे अनेक लोक उपस्थित होते जे छायाचित्रे घेत होते. अचानक, बंदुकीच्या गोळ्या झाडल्यासारखे आवाज ऐकू आले आणि लोक ओरडू लागले की कोणीतरी गोळीबार केला आहे.

करणवीर मेहराने सांगितले की, ही घटना घडली तेव्हा परिसरात फटाके फोडले जात होते, त्यामुळे सुरुवातीला त्याला वाटले की कदाचित फटाक्यांचाच आवाज असावा. मात्र, जेव्हा प्रत्यक्ष गोळीबाराचा आवाज ऐकू आला आणि लोक आरडाओरडा करू लागले, तेव्हा सुरक्षा कर्मचाऱ्यांना परिस्थितीचे गांभीर्य लक्षात आले. त्यानंतर पोलिसांना माहिती देण्यात आली.