Maharashtra News Live Updates : ठाणे ते कांजूरमार्ग दरम्यान सिग्नल यंत्रणेत बिघाड झाल्याने मध्य रेल्वेची वाहतूक विस्कळीत

भीमाशंकर येथे सुरू असलेल्या वृक्षतोडीवरून राज्यातील राजकारण चांगलेच तापले आहे. आता वंचित बहुजन आघाडीचे नेते प्रकाश आंबेडकर यांनीही या मुद्द्यावरून मुख्यमंत्री देवेंद्र फडणवीस यांच्यावर निशाणा साधला आहे. मुख्यमंत्र्यांनी ऊर्जा क्षेत्रासंदर्भातील आपले ज्ञान वाढवावे, असा सल्ला आंबेडकर यांनी दिला आहे. कोळशाची आयात केल्याने त्याची कॅलरीफिक व्हॅल्यू वाढू शकते, मात्र, अस्तित्वात असलेल्या ऊर्जा प्रकल्पांचा योग्य वापर करून, पर्यावरणाची हानी न करता आणि झाडे न तोडता विजेची कमतरता भरून काढता येऊ शकते, असा दावा त्यांनी केला. 

ठाणे ते कांजूरमार्ग दरम्यान सिग्नल यंत्रणेत बिघाड झाल्याने मध्य रेल्वेची वाहतूक विस्कळीत झाली आहे. जवळपास दिड तासांपासून सेंट्रल रेल्वे ठप्प झालेली आहे. विक्रोळी कांजूमरपासून सर्व ट्रेन जागेवरती उभे आहेत, त्यामुळे प्रवासी ट्रॅकवर उतरून प्रवास करतायत. 
 

स्वारगेट चौकात बसने घेतला पेट घेतला. मात्र वेळीच आग आटोक्यात आणण्यात अग्नीशमन दलाने शर्थीचे प्रयत्न केल्याने मोठी दुर्घटना टळली. गाडीत मोठ्या प्रमाणात प्रवासी होते. मात्र अद्याप कोणाला इजा झाल्याची माहिती नाही. घटनास्थळी पोलिस अग्निशमन दलाचे जवान दाखल झाले होते. भर रस्त्यावर लागलेल्या या आगीमुळे काही काळ वाहतूक कोंडी झाली. 
 

एकिकडे पाण्याचे दुर्भिक्ष आणि दुष्काळाचे भीषण संकट, तर दुसरीकडे शेतीमालाचे कोसळलेले भाव! जुन्नरमधील टोमॅटोचे मुख्य हब मानल्या जाणाऱ्या नारायणगाव कृषी उत्पन्न बाजार समितीत टोमॅटोचे दर अक्षरशः तळात गेले आहेत. टोमॅटोला अवघा एक ते दोन रुपये किलोचा दर मिळत असल्याने तोडणी आणि वाहतुकीचा खर्चही निघणे अशक्य बनले आहे. उत्पादन खर्च २०० रुपयांपर्यंत पोहोचलेला असताना, २० किलोच्या कॅरेटला अवघे ३० ते ७० रुपये पदरात पडत आहेत. त्यामुळे हवालदिल झालेला शेतकरी शेतीमाल फेकून देण्याच्या उंबरठ्यावर उभा ठाकला आहे.

मुलुंड मध्ये ओवर हेड वायर कपडा अडकल्यामुळे रेल्वे वाहतूक उशिराने सुरु आहे. मुलुंड ते ठाणे दरम्यान रेल्वे उशिराने धावत असून ऐन आठवड्याच्या पहिल्या दिवशी प्रवाशांना नाहक त्रास सहन करावा लागत आहे. मध्य रेल्वे ची वाहतूक 10/15 मिनिट उशिराने सुरु असून अनेक प्रवासी रेल्वे ट्रॅकवर उतरले आहेत. 

डेंगीसह कर्करोग, अवयव प्रत्यारोपण आणि गंभीर आजारांच्या रुग्णांमुळे प्लेटलेट्सची मागणी वाढली आहे. मोठ्या रुग्णालयांमध्ये दररोज ३० ते ४० प्लेटलेट्सची मागणी होत आहे. प्लेटलेट्सचा साठा केवळ पाच दिवस करता येत असल्याने नियमित रक्तसंकलन आवश्यक आहे. दरम्यान, शहरात २० ऑक्टोबरपर्यंत डेंगीचे २ हजार ४१३ रुग्ण आढळले असून, महापालिकेने १४ लाख घरांची तपासणी केली आहे.

दिवाळीसह सण-उत्सवांमध्ये फटाक्यांच्या आतषबाजीवर निर्बंध घालण्यात आले आहेत. मुंबई उच्च न्यायालयाच्या आदेशानुसार महाराष्ट्र प्रदूषण नियंत्रण मंडळाने रात्री 10 ते सकाळी 6 या वेळेत फटाके फोडण्यास मनाई केली आहे. रुग्णालये, शैक्षणिक संस्था आणि न्यायालयांच्या 100 मीटर परिसरातही फटाके फोडता येणार नाहीत. लेसर लाइट्स आणि तीव्र प्रकाशझोतांवरही निर्बंध असून, नियमांचे उल्लंघन करणाऱ्यांवर कारवाईचा इशारा देण्यात आला आहे.

पुणे शहरासाठी महापालिकेने 21.34  टीएमसी पाण्याची मागणी केली असताना जलसंपदा विभागाने केवळ 11.33 टीएमसी वार्षिक पाणीहक्क निश्चित केला आहे. या मंजुरीवर महापालिकेने आक्षेप घेतला आहे. समाविष्ट 34 गावांचा पाणीकोटा, पाणीगळतीचे गणित आणि पर्यायी स्रोतांमधील उपलब्धता विचारात घेताना त्रुटी झाल्याचा दावा करण्यात आला आहे. पाणीहक्काचा फेरविचार करून नव्याने मंजुरी देण्याची मागणी महापालिकेने केली आहे.

ECINET सॉफ्टवेअर आणि SIR प्रक्रियेतील पारदर्शकतेवर काँग्रेसचे सरचिटणीस जयराम रमेश यांचे प्रश्नचिन्ह उपस्थित केले. RTI अर्जाला उत्तर देताना निवडणूक आयोगाने SIR प्रक्रियेत वापरल्या जाणाऱ्या सॉफ्टवेअरची माहिती देण्यास नकार दिल्याचा दावा आहे. सॉफ्टवेअरचे नाव, AI चा वापर आणि सुरक्षेसाठीच्या उपाययोजनांबाबत आयोगाने माहिती दिली नसल्याचा आरोप आहे. TCS ने ECINET सॉफ्टवेअर विकसित केल्याची माहिती आधीच सार्वजनिक का केली नाही, असा जयराम रमेश यांचा सवाल आहे. SIR आणि मतदार यादी पुनरावलोकनात AI चा वापर होत असल्याचा दावा करत आयोगाच्या भूमिकेवरही प्रश्नचिन्ह उपस्थित केले. निवडणूक प्रक्रियेतील कथित अनियमिततेची जबाबदारी निश्चित करण्याची मागणी आहे. मुख्य निवडणूक आयुक्त ज्ञानेश कुमार यांना पदावरून हटवा आणि SIR प्रक्रिया तातडीने स्थगित करा, अशी जयराम रमेश यांची मागणी

आज अभिनेता इम्रान खान याने देश सोडून जायचे का या प्रकरणावर उच्च न्यायालयात सुनावणी पार पडणार आहे. अभिनेता इमरान खान सीजेपी च्या समर्थनार्थ मुंबईत पुकारलेल्या आंदोलनासाठी आला होता. यावेळी पोलिसांनी काही वेळ त्याला ताब्यात घेतले आणि सोडून दिले. मात्र त्यानंतर इम्रान खान हा भारतीय नागरिक नसून ते अमेरिकन नागरिक आहे त्यामुळे त्याने 28 ऑक्टोबर पर्यंत देश सोडून जावे अशी नोटीस मुंबई पोलिसांनी दिली होती. त्यानंतर इमरान खान यांनी उच्च न्यायालयात धाव घेतली या संदर्भात उच्च न्यायालयात सुनावणी पार पडणार आहे. अभिनेता इम्रान खानला भारत सोडावा लागणार की दिलासा मिळणार, याकडे सर्वांचं लक्ष लागलं आहे. मुख्य निवडणूक आयुक्त ज्ञानेश कुमार यांच्या विरोधातील आंदोलनाच्या पार्श्वभूमीवर इम्रान खानला २८ ऑक्टोबरपर्यंत भारत सोडण्याची नोटीस देण्यात आली आहे. या नोटिशीला आव्हान देणाऱ्या इम्रान खानच्या याचिकेवर आज, २६ ऑक्टोबर रोजी मुंबई उच्च न्यायालयात सुनावणी होणार आहे. 
 

रायगड जिल्ह्यातील कर्जत तालुक्यात सुरू असलेल्या वृक्षतोडीचा भीमाशंकर वन्यजीव अभयारण्याशी थेट संबंध जोडणे चुकीचे आहे. वृक्षतोडीच्या घटनेचा संदर्भ देताना भौगोलिक परिस्थितीची अचूक माहिती घेणे आवश्यक आहे. चुकीच्या माहितीमुळे भीमाशंकर अभयारण्याची प्रतिमा मलिन होऊ नये याची खबरदारी घ्यावी. कर्जत तालुक्यातील सायदोंगर परिसरातील वृक्षतोडीचे प्रकरण आणि भीमाशंकर वन्यजीव अभयारण्याची हद्द यांची गल्लत करू नये वनक्षेत्राशी संबंधित कोणतीही माहिती देताना संबंधित ठिकाण, भौगोलिक सीमा आणि अधिकृत यंत्रणेकडून मिळणारे स्पष्टीकरण तपासणे गरजेचे आहे. अपुऱ्या माहितीच्या आधारे एखाद्या अभयारण्याचा वृक्षतोडीशी संबंध जोडल्यास नागरिकांमध्ये गैरसमज निर्माण होऊ शकतो. 

घाटकोपरच्या खंडोबा टेकडीच्या सुशोभीकरणासाठी पावणे सहा कोटींचा प्रस्ताव सादर करण्यात आलाय. घाटकोपर पश्चिमेतील पुरातन खंडोबा टेकडीच्या विकासासाठी ५ कोटी ७९ लाख ८९ हजार रुपये खर्चाचा प्रस्ताव आहे. जय मल्हार सहाय्यक कमिटी आणि खंडोबा मंदिर देवस्थान समितीच्या मागणीनंतर पालिकेकडून विकासकामांचे नियोजन आहे. महापौर निधीतून घाटकोपर पूर्व आणि पश्चिमसाठी मिळून ५८ कोटींची तरतूद करण्यात आलेली असून खंडोबा टेकडीच्या सुशोभीकरणासाठी १५ कोटींचा निधी दिल्याची माहिती आहे. 

दिवाळीच्या पार्श्वभूमीवर अन्न व औषध प्रशासनाने भेसळयुक्त अन्नपदार्थांविरोधात राज्यभरात विशेष मोहीम राबवली आहे. या मोहिमेच्या माध्यमातून एफडीएने तब्बल 16.92 कोटी रुपयांचा भेसळयुक्त आणि संशयास्पद साठा जप्त करत 68 आस्थापनांचे परवाने निलंबित केले आहेत. तसेच नियमभंग करणाऱ्या सात उत्पादन युनिट्सना टाळे टोकले आहे.

दिवाळी विशेष मोहिमेच्या पार्श्वभूमीवर एफडीएने मुंबई, कोकण, पुणे, नाशिक, छत्रपती संभाजीनगर आणि नागपूर या सहा विभागांमध्ये तपासणी मोहीम राबवली होती. कारवाईदरम्यान पथकाला राज्यभरातून कोट्यवधी रुपयांचा भेसळयुक्त साठा जप्त करण्यात यश मिळाले आहे. कारवाईमध्ये एफडीएने मिठाई, खवा, गोडेतेल, सुकामेवा आणि फराळाचे पदार्थ असा 8,392 किलो मुदत संपलेला आणि खराब झालेला अन्नसाठा जप्त करून नष्ट केला आहे. दरम्यान अन्न सुरक्षा नियमांचे उल्लंघन केल्याप्रकरणी राज्यभरात 22 गुन्हे दाखल करण्यात आले असून त्यात 20 जणांना अटक करण्यात आली आहे. नवरात्रोत्सवात पार पडलेल्या मोहिमेत एफडीएने तब्बल 9.11 कोटी रुपयांचा संशयास्पद अन्नसाठा जप्त केला होता.