नोव्हेंबर महिना अर्ध्यावर आला तरी अद्याप मुंबईकरांना व राज्यात थंडीची चाहूल लागली नाही. मुंबईत आजही दुपारनंतर उन्हाच्या तीव्र झळा सहन कराव्या लागत आहेत. कुलाबा येथे कमाल तापमान 35.4 अंश इतके आहे तर किमान तापमान 25.5 अंश इतके आहे. त्यामुळं राज्याच्या बहुतांश भागात रात्री गारवा आणि दिवसा उकाडा अशी परिस्थिती आहे.
भारतीय हवामान विभागाने जारी केलेल्या अहवालातून नोव्हेंबर महिना सुरू असतानाही हवी तशी थंडी पडली नाहीये. राज्यात मंगळवारपासून बहुतांश जिल्ह्यांतील किमान तापमानात घट झाली असून बुधवारीही मध्य महाराष्ट्र, विदर्भ तसेच कोकण आणि मराठवाड्यातील काही भागांतील किमान तापमानात घट नोंदवण्यात आली आहे.
पुढील दोन दिवसांत राज्यातील किमान तापमानात २ ते ३ अंश सेल्सिअसने घट होईल, असा अंदाज हवामान विभागाने वर्तवला आहे. मुंबई आणि कोकणातील उष्णता कायम आहे. मुंबईतील कमाल आणि किमान तापमान दोन्ही सरासरीपेक्षा अधिक असल्याने नागरिकांना उकाड्याचा सामना करावा लागत आहे. दुसरीकडे विदर्भात रात्रीच्या तापमानात घट होत असून राज्याच्या वेगवेगळ्या भागांच वेगवेगळे हवामान अनुभवायला मिळत आहे.
बुधवारी एक नवी 'पश्चिमी विक्षोभ' प्रणाली सक्रिय होण्याचा अंदाज आहे. या प्रणालीच्या प्रभावामुळे जम्मू काश्मीर (गुलमर्ग, सोनमर्ग, पहलगाम) आणि हिमाचल प्रदेशच्या उंच डोंगराळ भागांत 11
ते 13 नोव्हेंबर दरम्यान बर्फवृष्टीची शक्यता आहे.
बर्फवृष्टीनंतर पुढील काही दिवसांत तेथून येणाऱ्या थंड वाऱ्यांच्या प्रभावामुळे उत्तर भारताच्या मैदानी प्रदेशात तसेच मध्य भारतात थंडी वाढण्याची शक्यता व्यक्त केली जात आहे.
दरम्यान, कुलाबा वेधशाळा येथे बुधवारी (11 नोव्हेंबर) कमाल तापमान 35.4 अंश सेल्सिअस नोंदवण्यात आले. हे तापमान सरासरीपेक्षा 14 अंशांनी जास्त आहे. तर किमान तापमानही 25.5 अंशांवर पोहोचले असून तेही सरासरीपेक्षा 1.4 अंशांनी अधिक आहे. त्यामुळे दिवसा उन्हाचा चटका आणि रात्रीही जाणवणारा उकाडा, अशी परिस्थिती मुंबईत पाहायला मिळत आहे.