पुढच्या दोन चार महिन्यात देशात काहीतरी मोठी गडबड होईल; राज ठाकरेंचं सूचक विधान, '....देशाला पंतप्रधानच नसेल'

पुढच्या दोन चार महिन्यात देशात काहीतरी मोठी गडबड होईल असं सूचक विधान मनसे अध्यक्ष राज ठाकरेंनी केलं आहे. पुढील काही महिन्यात अख्खा देश रस्त्यावर आला तरी आश्चर्य वाटणार नाही असं ते म्हणाले आहेत. आगामी काळात ज्या गोष्टी होतील त्या सरकारला झेपणार नाही. मधे एक असा काळ येईल जेव्हा देशाला पंतप्रधान नसेल असंही ते म्हणाले आहेत. नीट, निवडणूक आयोगाचं आंदोलन झालं. जे बाहेर रस्त्यावर आले तो प्रत्यकेणज नीट पेपर सोडवून आला नव्हता. पण मनात काही ना काहीतरी राग आहे, तो बाहेर काढण्यासाठी मंच मिळाला असं त्यांनी म्हटलं आहे.

2014 साली जी सत्ता आली ती मोदींमुळे आली आरएसएसमुळे नव्हे, त्यामुळे जे देशातील सरकार बदलायचं आहे ते मोदी आणि जनता पाहतील. ती सत्ता आल्यानंतर आम्ही आणली असा कोणाचा गैरसमज झाला असेल तर तो तसा नाही असं त्यांनी सांगितलं.

विरोधक देशात अराजकता पसरवत असल्याच्या भाजपाच्या आरोपांवर ते म्हणाले की, "शांततेने आंदोलन कऱणाऱ्या मुलावंर तुम्ही लाठीचार्ज केला, मारलं, पोलिसांत तुमची लोक घुसवलीत. या मुलांनी काहीच केलं नव्हतं. मग अराजकता कोण पसरवत आहे? भाजपा काय जुने दिवस विसरले का?".

"देशात लोकशाही कुठे आहे. खरी लोकशाही पाहायची असेल तर ती अमेरिकेत आहे. ऑस्करच्या व्यासपीठावर कलाकार डोनाल्ड ट्रम्प यांच्यावर टीका करतात, मतं व्यक्त करतात, पण म्हणून त्यांच्या चित्रपटांवर बहिष्कार टाकला जात नाही. त्यांच्याविरोधात फतवे काढले जात नाहीत. कलावंत बोलत का नाहीत असं विचारलं जातं, पण ते बोलले की असं काही करतात. आम्ही काय प्रत्येक वेळी भाजपाने स्पॉन्सर केलेले चित्रपटच पाहायचे का?सरकारने इतर गोष्टीही पाहायला हव्यात," अशी टीका त्यांनी केली.

आपण आज घेत असलेली भूमिका भविष्यात चुकीचे पायंडे पाडत नाही ना याचं भान प्रत्येक राजकीय पक्षाने ठेवावं असा सल्ला देताना त्यांनी सत्तेचा अमरपट्टा घेऊन कोणी आलेलं नाही याची आठवण करुन दिली. 

राज ठाकरेंनी यावेळी देशात बॅलेट पेपरवर मतदान झालं पाहिजे असं मत मांडलं. "आपल्या आजुबाजूचे देश पाहिले तर तिथेही बॅलेटवर मतदान होत आहे. तिथे मशीन वापरली जात नाही. काही मोजक्या देशात भारत येतो जिथे मशीन वापरलं जात आहे. अनेक पुढारलेल्या देशांमध्ये बॅलेट पेपरवरच मतदान होतं. फ्रान्समध्ये मशीन आणली तेव्हा एका व्यक्तीने तक्रार केली आणि त्यानंतर ती रद्द झाली आणि परत बॅलेट पेपरवर आले. मग भारतात मशीन कशाला पाहिजे? बॅलेट पेपरवरील मतदान कोणाला करत आहोत याचं समाधान असायचं. मशीनची झंझट कोणी सांगितली आहे. लोकसभा, विधानसभा एकावेळी होत नाहीत. निकाल उशिरा मिळतो असं त्यांचं म्हणणं आहे. पण मग घाई कोणाला आहे. 95 ची विधानसभा निवडणूक झाली तेव्हा 12 फेब्रुवारीला मतदान आणि 12 मार्चला निकाल लागला. मग काय फरक पडला? आताही लोकसभेच्या निवडणुका टप्प्यात होतात. हे करताना निकाल उशिराच येतो", असं त्यांनी म्हटलं