मुंबईच्या बाणगंगेत छटपूजेवरुन वाद! बैठक सुरु असताना मनसेचा तुफान राडा, BMC म्हणालं 'तिथे छठपूजेसाठी...'
मुंबईच्या बाणगंगेत छटपूजेवरुन वाद निर्माण झाला आहे. बाणगंगा इथं छटपूजेला मनसेनं तीव्र विरोध केला आहे.
मुंबईच्या बाणगंगेत छटपूजेवरुन वाद निर्माण झाला आहे. बाणगंगा इथं छटपूजेला मनसेनं तीव्र विरोध केला आहे. बाणगंगा इथं छटपूजा करु नये, तसंच छटपूजेसाठी परवानगीही नाही आहे, असं पालिका अधिकाऱ्यांनी सांगितल्याचं मनसेनं सांगितलं आहे. तर ही परवानगी मिळावी म्हणून काहींनी दबाव आणल्याचा आरोपही मनसेनं केला आहे.
डी वॉर्ड येथे भाजपाचे नगरसेवक आणि छठपूजा आयोजकांची सहाय्यक आयुक्तांसोबत बैठक झाली. मनसेने आधीच ही बैठक उधळून लावण्याचा इशारा दिला होता. बैठक सुरु असताना मनसेचे पदाधिकारी खाली विरोध करत होते. यादरम्यान ही बैठक संपवून नगरसेवक सन्नी सानप रवाना झाले.
यानंतर मनसेच्या पादाधिकाऱ्यांनी वॉर्ड ऑफिसरची भेट घेतली. या भेटीनंतर मनसेने सांगितलं की, "वॉर्ड ऑफिसरने स्पष्ट सांगितलं आहे की बाणगंगा येथे छट पूजेची परवानगी नाही. काही नेत्यांनी परवानगीसाठी दबाव आणला . मुंबई हायकोर्टाने गिरगाव चौपाटीवर बंदी आणली आहे. प्रशासन म्हणतंय की पाण्यात गेले की आम्ही काय करू... गणेश विसर्जनाच्या वेळी काय केलं?आम्ही रविवारी बाणगंगा येथे छट पूजा होऊ देणार नाही. स्थानिक आमदार वाद निर्माण करत आहेत. आधी मराठी गुजराती केला नंतर मराठी जैन केला आणि आता मराठी आणि उत्तरं भारतीय असा वाढनिर्माण करत आहेत".
मुंबईच्या रेल्वे स्टेशनवर थेट छटपूजेची गाणी
मुंबईच्या रेल्वे स्टेशनवर थेट छटपूजेची गाणी वाजण्यात आल्याचा प्रकार उघडकीस आला आहे. मुंबईत हार्बर मार्गावरील वडाळा, सानपाडा यासह मध्य रेल्वेच्या आंबिवली स्टेशनवर उद्घोषणा थांबवून छटपूजेची गाणी मोठ्या आवाजात वाजवण्यात आल्याचा प्रकार समोर आला. रेल्वे स्टेशनवर गाड्यांचं आगमन आणि प्रस्थान तसंच वेळापत्रकातील बदल आणि आपत्कालीन सूचना देण्यासाठी उद्घोषणा केल्या जातात.. त्यासाठी प्रत्येक प्लॅटफॉर्म तसंच रेल्वे ब्रिजवर स्पीकर लावण्यात आलेत.. मात्र, बुधवारी रेल्वेच्या अनेक रेल्वे स्टेशनवर प्रवाशांसाठीच्या नियमित उद्घोषणा बंद करून त्याऐवजी चक्क मोठ्या आवाजात छटपूजेची गाणी वाजवण्यात आली. त्यामुळे प्रवाशांमध्ये संतापाचं वातावरण निर्माण झालंय.. रेल्वेच्या या मनमानी कारभाराविरोधात मनसे, शिवसेना उद्धव बाळासाहेब ठाकरे पक्ष आणि स्वायत्त महाराष्ट्र संघर्ष समितीने आक्षेप घेतला आहे.