BMC ची एक्सचेंज ऑफर... पेंग्विन म्हैसूरला पाठवणार आणि त्या मोबदल्यात...; राणीच्या बागेत दिसणार 2 नवे पाहुणे?

मुंबईच्या राणीच्या बागेतील खास आकर्षण म्हणजे पेंग्विन. 2017मध्ये राणीच्या बागेत पेंग्विन आणण्यात आले होते. त्यानंतर बच्चे कंपनीसाठी हे पेंग्विन खास आकर्षण ठरत होते. त्यानंतर भारतभरातून प्राणीसंग्रहलयातून हंबोल्ट जातीच्या पेग्विंनसाठी मागणी वाढली होती. त्यामुळं मुंबईचे पेंग्विन लवकरच म्हैसूरला जाणार असल्याची चर्चा आहे. त्या बदल्यात झेब्रा आणि जिराफ मुंबईत आणण्याची शक्यता आहे.  दोन्ही प्राणिसंग्रहालयांमध्ये प्राथमिक चर्चा झाली आहे.

मुंबईच्या भायखळा येथील वीरमाता जिजाबाई भोसले उद्यान आणि प्राणिसंग्रहालयातील पेंग्विन आता म्हैसूरला पाठवण्याच्या हालचाली सुरू झाल्या आहेत. मुंबई आणि म्हैसूर प्राणिसंग्रहालयांमध्ये प्राण्यांच्या अदलाबदलीसंदर्भात प्राथमिक चर्चा झाली असून या बदल्यात म्हैसूरच्या प्राणिसंग्रहालयातील झेब्रा आणि जिराफ मुंबईत आणण्याची शक्यता आहे.

मुंबईच्या राणीच्या बागेत पेंग्विन हे पर्यटकांचे प्रमुख आकर्षण आहे. 2017 मध्ये दक्षिण आफ्रिकेतून आठ हम्बोल्ट पेंग्विन मुंबईत आणण्यात आले होते. त्यासाठी पेंग्विन खरेदी आणि त्यांच्या कक्षाच्या उभारणीसाठी सुमारे 25 कोटी रुपये खर्च झाले होते. या निर्णयावर त्यावेळी मोठी टीकाही झाली होती.

सुरुवातीला आठ असलेली पेंग्विनची संख्या प्रजननामुळे वाढत गेली. गेल्या वर्षी मे महिन्यात पेंग्विनची संख्या 21 होती. त्यानंतर आणखी चार पिल्लांचा जन्म झाला असून, त्यामध्ये दोन नर आणि दोन मादी आहेत. त्यामुळे सध्या पेंग्विनची संख्या 25 वर पोहोचली आहे.

दरम्यान, मुंबई आणि म्हैसूर प्राणिसंग्रहालयातील प्राण्यांच्या अदलाबदलीचा करार अंतिम टप्प्यात असल्याची माहिती आहे. या करारानुसार मुंबईतील काही पेंग्विन म्हैसूरला पाठवले जाणार असून त्याबदल्यात झेब्रा आणि जिराफ मुंबईत आणण्याचा विचार आहे. मात्र, नेमके किती पेंग्विन दिले जाणार आणि त्या बदल्यात किती प्राणी आणले जाणार, याबाबत अद्याप स्पष्टता नाही.

गणेशोत्सवाच्या काळात म्हैसूर प्राणिसंग्रहालयाच्या अधिकाऱ्यांनी राणीच्या बागेला भेट दिली होती. त्यानंतर या अदलाबदलीबाबत चर्चा पुढे आली आहे. मात्र, अद्याप कोणताही औपचारिक प्रस्ताव अंतिम झालेला नसल्याचे स्पष्ट करण्यात आले आहे.सध्या प्राथमिक चर्चा सुरू असून, अंतिम करारानंतरच मुंबईतील पेंग्विन म्हैसूरला जाणार की नाही, यावर शिक्कामोर्तब होणार आहे.

मुंबईच्या भायखळा राणीची बागमध्ये लवकरच आशियाई सिंह येण्याचा मार्ग मोकळा झाला आहे. महापौर रितू तावडे यांनी नुकतीच गुजरातचे मुख्यमंत्री भूपेंद्र पटेल यांची गांधीनगर येथे भेट घेतली. जुनागड येथील प्रसिद्ध सक्करबाग प्राणिसंग्रहालयातून दोन जोड्या (2 नर आणि 2 मादी) आशियाई सिंह मुंबईच्या राणीच्या बागेत आणण्यासंदर्भात सामंजस्य करार करण्याचे निर्देश मुख्यमंत्री भूपेंद्र पटेल यांनी दिले आहेत.