जरांगे पाटील बेईमान आणि ह**** माणूस; शिंदेंवरील 500 कोटी आरोपांमुळे रामदास कदमांचा संताप, 'तुझी औकात काय, याद राख आमचं दैवत...'

मराठा आंदोलक मनोज जरांगे यांनी एकनाथ शिंदेंवर 500 कोटींसंदर्भात केलेल्या आरोपांनंतर रामदास कदम संतापले आहेत. दसरा मेळाव्यात बोलताना रामदास कदम यांनी मनोज जरांगेंवर बोचरी टीका केली. जरांगे पाटील बेईमान माणूस, हरामखोर आहे अशा शब्दांत त्यांनी टीका केला. तसंच एकनाथ शिंदे हे मराठा समाजाचे दैवत आहेत, त्यांच्याबाबत जर बोलशील तर मराठा समाज खपवून घेणार नाही असा इशाराही त्यांनी दिला. जरांगे तू कोण आहेस, तुझी औकाद काय? असा प्रश्नही त्यांनी विचारला. दरम्यान भाषणाच्या सुरुवातीला रामदास कदम यांनी एकनाथ शिंदेंचा भावी मुख्यमंत्री असा उल्लेख केला.

...तर मराठा समाज तुम्हाला उद्ध्वस्त केल्याशिवाय राहणार नाही

जरांगे पाटलांवर टीका करताना ते म्हणाले की, "मी आज सांगतोय की, आम्ही कधी तुमच्या विरोधात बोललो नाही. समाजाला न्याय देत आहात वैगेरे ठीक आहे. पण काल तुम्ही एकनाथ शिंदे, 500 कोटींबाबत बोललात. जर तुम्ही एकनाथ शिंदेंना उद्ध्वस्त करायला निघालात, तर महाराष्ट्रातील मराठा समाज तुम्हाला उद्ध्वस्त केल्याशिवाय राहणार नाही".

उपोषणाला बसतोस आणि बाथरूममध्ये जाऊन गुपचूप खातोस

तू आहेस कोण? असा एकेरी उल्लेख करत म्हणाले की, "उपोषणाला बसतोस आणि बाथरूममध्ये जाऊन गुपचूप खातोस, सगळ्यांना फसवतो". यावेळी त्यांनी एकनाथ शिंदेंकडे जरांगे पाटलांची चौकशी लावण्याची विनंती केली. ते म्हणाले, "हा मराठ्यांचा नेता झाल्यापासून याची संपत्ती कुठे आहे? कोणाच्या नावावर आहे? कोणत्या नातेवाईकांच्या नावावर आहे? याची चौकशी लावा. कोणत्या गाडीतून फिरतोस? या गाड्या कुठून आल्या?".

हे ही वाचा - शिंदेंनी भाजपाकडून 500 कोटी घेतले अन् मला...; मनोज जरांगेंचा खळबळजनक दावा; म्हणाले 'श्रीकांत शिंदेंनी माझ्याकडे...', कोण कोणाचा गेम करतंय?

"एक मराठा समाजाचा माणूस संपूर्ण महाराष्ट्र ढवळून काढतोय, मराठा समाजाल न्याय देतोय याचा तुला अभिमान वाटला पाहिजे. 10 टक्के आरक्षण एकनाथ शिंदेंनी दिलं. तू बेईमान, हरामखोर माणूस आहेस. याद राख! बाप दाखव नाहीतर श्राद्ध घाल. 500 कोटी कोणी दिले? कुठे दिले? कोणी मोजले दाखव. तू कोणाची सुपारी घेऊन बदनाम करत आहेस. एकनाथ शिंदेंच आमचं दैवत आहे, त्यांच्याबद्दल बोललास तर महाराष्ट्र, मराठा समाज खपवून घेणार नाही," असा इशारा त्यांनी दिला.

तुझी औकात काय? आमच्या नादाला लागू नको

पुढे ते म्हणाले, "हा स्वत:ला जगाचा मालक समजतो. पंतप्रधानांना, मुख्यमंत्र्यांना, एकनाथ शिंदेंना एकेरी नावाने बोलतो. ही मराठा समाजाची संस्कृती आहे का? तुझी औकात काय? समाजाने न्याय मिळावा यासाठी पाठिंबा दिला त्याचा गैरफायदा घेतो का? जिथे उपोषण करत होता तिथून गाववाल्यांना हाकलून दिलं. आमच्या नादाला लागू नको. याद राख एकनाथ शिंदे दोन दोन हातानं देणारे आहेत, घेणारे नाहीत. सुपारी घेऊन त्यांना बदनाम करायला निघालास का? यापुढे गाठ शिवसैनिकांशी, मराठा समाजाशी आहे. मराठा समाजाच्या नेतृत्वाला संपवण्याचा प्रयत्न केला, तर मराठा समाज तुला संपवेल".

मुख्यमंत्रीपदाचे दावेदार एकनाथ शिंदेच होते

महाराष्ट्राच्या विधानसभा निवडणुका माजी मुख्यमंत्री एकनाथ शिंदे असताना त्यांच्या नेतृत्वात झाल्या. उभ्या महाराष्ट्राने एकनाथ शिंदेंचं नेतृत्व आहे, म्हणून युतीचे 232 आमदार निवडून दिले. मग आमचे आमदार कमी कसे? खरंतर मुख्यमंत्रीपदाचे दावेदार एकनाथ शिंदेच होते पण पुढे काय झालं मला माहित नाही, ते त्यांनाच माहिती असेल असं ते म्हणाले.