'एकनाथ शिंदेंच्या पक्षात तीन 'शिंदे', एकाला अमित शाह ताकद देतात, दुसऱ्याला फडणवीस तर तिसरा...'; राऊतांचा खळबळजनक दावा

उद्धव ठाकरेंच्या शिवसेनेचे खासदार तसेच प्रवक्ते संजय राऊत यांनी उपमुख्यमंत्री एकनाथ शिंदेंच्या शिवसेनेमध्ये तीन गट असल्याचं सूचक विधान केलं आहे. या तीन गटांना कोण कोण पाठिंबा देतंय किंवा त्यांचं काय चाललं आहे याबद्दलही राऊत यांनी भाष्य केलं आहे. तसेच राऊत यांनी अजित पवारांच्या राष्ट्रवादीसंदर्भातही महत्त्वाचं भाकित केलं आहे.

तात्पुरते निर्माण केलेले पक्ष

अजित पवारांच्या राष्ट्रवादीच्या काही नेत्यांनी दिल्लीत केंद्रीय गृहमंत्री अमित शाहांची भेट घेतल्याच्या मुद्द्यावरुन बोलताना, "शिंदे गट राष्ट्रवादी गट हे गट आहेत पक्ष नाहीत," असा टोलाही राऊत यांनी लगावला. "यांना भूमिका नाही. हे अमित शाह यांनी तात्पुरते निर्माण केलेले पक्ष आहेत. दाढीतल्या दाढी हसत असले तरी ते पाठीत वार करण्यासाठी असुलेले दिसतात.  आधी राष्ट्रवादीचा पक्ष कोसळेल, हे तर स्पष्ट दिसतंय," असं भाकित राऊत यांनी व्यक्त केलं आहे.

शिंदे गटात तीन शिंदे

"राष्ट्रवादी पक्ष जसा कोसळणार तसा शिंदे गट सुद्धा कोसळणार. एकनाथ शिंदेंच्या पक्षात तीन शिंदे तयार झालेत. आमच्याकडे एक एकनाथ शिंदे होता. शिंदे गटात तीन एकनाथ शिंदे तयार झालेत. एकाला अमित शाह ताकद देत आहेत. एकाला देवेंद्र फडणवीस ताकद देत आहेत. त्यातला एक शिंदे आम्हाला सुद्धा संपर्क साधतो दुःख व्यक्त करतो. हवा बदलतेय सांगतो. त्यांना व्यक्त व्हायला खांदा लागतो. त्यांना नक्कीच पश्चताप होत असेल," असं सूचक विधान राऊत यांनी शिंदेंच्या शिवसेनेमध्ये तीन गट पडल्याचा दावा करताना केलं.

फडणवीस विरोधी पक्षांत असते तर...

सरकारचे लोक रस्त्यावर मोर्चे काढत आहेत. महाराष्ट्रची लोकशाही सत्ताधाऱ्यांमुळे संकटात आहे.  25 पैकी 13 जागा गोकुळमध्ये सतेज पाटील यांचं समविचारी पॅनेल जिंकलं आहे.  त्यांचा अध्यक्ष होणं गरजेचं आहे.  देवेंद्र फडणवीस, चंद्रकांत पाटीलांसारखे बहुमताचा आनादर करून अध्यक्ष समविचारी पॅनेलला करू देत नाही. त्यात एक्स्पर्ट पॅनेल घुसवून गोकुळवर आपला ताबा ठेवण्याचा प्रयत्न करत आहेत. गोकुळ हे 'अमूल'ला विकायचं आहे. हा डाव शेतकऱ्यांनी हाणून पाडला आहे," असं राऊत यांनी म्हटलं आहे. तसेच, "फडणवीस यांना नैतिकनेते प्रश्न विचारतो. गोकुळ वाचविण्यासठी तुम्ही मोर्चा काढा. लोकशाहीच्या नावाने षंडगिरी मुख्यमंत्री करत आहेत.  लोकशाहीच्या नावाने तुम्ही मोर्चा काढता.  गोकुळ तुम्हाला गुजरातच्या घशात घालायचं आहे. मोदी, शाह फडणवीस यांचा तिरस्कार का करतात?" असा सवाल राऊतांनी विचारला. "मुख्यमंत्री रिक्षातून फिरतात, मंत्र्याचे कुटुंबिय कोणत्या गाड्यात फिरतात? तोंडाला येईल ते बोलू नका, तुम्ही मुख्यमंत्री आहे. फडणवीस विरोधी पक्षांत असते तर त्यांनी पाच हजार दिल्यानंतर तांडव केला असता," असा टोला शेतकऱ्यांना देण्यात येणाऱ्या आर्थिक मदतीवरुन राऊतांनी लगावला.  

महापालिकेला जास्त चरबी आली आहे

दिया मिर्जा प्रकरणावरुन न्यायालयाने व्हिडीओ पुन्हा अपलोड करण्याचे आदेश दिल्यासंदर्भात बोलताना राऊत यांनी, "कोर्टाने महापालिका सत्ताधाऱ्यांना चपराक मारली आहे. तुम्ही यात धर्म आणू नका असं कोर्ट म्हटलं. भाजपचे चाटम लोकांनी हिंदू-मुस्लिम वाद आणला.  तुमचं सरकार आहे महाराष्ट्रमध्ये आम्ही आहोत ना हिंदुत्ववादी! शिवसेना हिंदुत्ववादी आहे," असं म्हटलं आहे. तसेच, "महापालिकेला जास्त चरबी आलीये, हा शब्द माझा घ्या," असंही राऊत म्हणाले. "जर मुंबई उच्च न्यायालयने सांगितलं तर मग व्हिडिओ आपलोड करावा तर एवढी चरबी कशाला?" असा सवाल राऊत यांनी केला.