जरांगेंनी थेट ऑडिओ क्लिप ऐकवल्यानंतर रामदास कदम स्पष्टच बोलले; 'चौकशी झाली पाहिजे, आज एकनाथ शिंदे....'

उपमुख्यमंत्री एकनाथ शिंदेंवर 500 कोटींचा आरोप केल्यानंतर मराठा आंदोलक मनोज जरांगे यांनी आज पत्रकार परिषद घेत पुराव्यादाखल ऑडिओ क्लिप रिलीज केली आहे. एकनाथ शिंदे यांनी भाजपाकडून 500 कोटी घेतले आणि ते मला श्रीकांत शिंदेंच्या माध्यमातून दिले असं भाजपा नेत्यांना सांगितल्याचा खळबळजनक दावा मनोज जरांगे यांनी केला होता. यानंतर रामदास कदमांनी त्यांना बाप दाखव, नाहीतर श्राद्ध घाल असं आव्हान देत पुरावे समोर आणण्यास सांगितलं होतं. यानंतर मनोज जरागेंनी आज ऑडिओ क्लिप सादर केली आहे. तीन वर्षांपासून माझ्या विरोधात षड्यंत्र रचलं जात असल्याचा आरोप त्यांनी केला आहे.

"आपल्यावर तीन वर्षांपासून आरोप होत आहे. आंदोलन बदनाम करण्याचा प्रयत्न आहे. तीन वर्षांपासून माझ्या विरोधात षड्यंत्र रचलं जात आहे. मराठ्यांच आंदोलन त्रास देऊन बंद पाडण्याचा प्रयत्न आहे. हे षड्यंत्र किती मोठ्या स्वरूपाच आहे हे आता उघड होणार आहे. हा त्रास किती भयंकर आहे हे मी जनतेसमोर ठेवणार आहे. गरिबाने काम करणे किती अवघड आहे हे लक्षात घेणं गरजेचं आहे. माझ्यासोबत शत्रुसारखे का वागायला लागलेत, हे तुमच्या लक्षात येईल. शिंदे म्हणाले मी पैसे घेतले नाही आणि दिलेही नाही, मग षड्यंत्र का रचलं जात आहे याचा शोध पंतप्रधान मुख्यमंत्री आणि दोन्हीही मुख्यमंत्र्यांनी घ्यावा," असं मनोज जरांगेंनी म्हटलं आहे.

हे ही वाचा - 'जरांगे पाटील को ऑलरेडी 500 करोड रुपये श्रीकांत शिंदे के...'; जरांगेंनी ऐकवली खळबळजनक ऑडिओ क्लिप; थेट भाजपाचं नाव घेतलं

मनोज जरांगेंनी ऑडिओ क्लिप सादर केल्यानंतर रामदास कदम यांनी यावर प्रतिक्रिया दिली आहे. मनोज जरांगेंनी ऐकवलेली ऑडिओ क्लिप दोन वर्ष जुनी असल्याचं त्यांनी सांगितलं आहे. "मनोज जरांगे पाटील साहेब आज तुम्ही जी क्लिप ऐकवली ती 14/10/2024 ची आहे. तुम्ही ही क्लिप दोन वर्ष का ठेवली? आज एकनाथ शिंदे हे उपमुख्यमंत्री आहेत, मराठा समाजाला न्याय देण्यात त्यांचं योगदान आहे. विनोद पाटील यांना विचारून घ्या, सर्वोच्च न्यायालयाचा कायदेशीर अभ्यासाबाबत चर्चा कोणाच्या बंगल्यावर झाल्या. आज जी क्लिप आली ती भाजपचेच लोक आहेत. उद्या कोणीही बोलु शकतो हजारो कोटी दिले. दोन अडीच वर्ष का थांबला होतात?," अशी विचारणा रामदास कदम यांनी केली आहे.

"जरांगे तुम्ही एकनाथ शिंदेंच्या बाजुला उभे राहीले पाहिजे. तुम्ही तुमच्या गुप्त बैठकीत बोललात या बैठकीत एकनाथ शिंदे यांचे चमचे बसले आहेत, त्यावेळी इंगळे बोलले की योग्य नाही त्या बैठकीत भाजपचा आमदार होता. आम्ही आता असं म्हणायचं का आमचा मराठा समाजाचा नेताच मराठा नेत्याला संपवतो आहे. आपण समाजात फूट पडेल असं वागू नये. 
चमचे बसले असं बोलल्यामुळे मला वाईट वाटलं," असं ते म्हणाले आहेत.

"आज तुम्ही एकनाथजी बोललात , देवेंद्रजी बोलतात त्यामुळे मला मनापासुन बरं वाटलं. माझी मागणी आहे की, या क्लिपची चौकशी झाली पाहिजे. ही महिला कोण आहे हे पुढे आलं पाहिजे.  आज मी लेखी तक्रार करणार आहे. मी आज एकनाथ शिंदे यांना भेटणार आहे. ही क्लिप एकनाथ शिंदे यांना बदनाम करण्यासाठीच होती का? या क्लिपची चौकशी झाली तर सगळ्या गोष्टी पुढे येतील. तुमच्याकडे असलेल्या क्लिप असतील तर लवकर बाहेर काढा. जरांगे तुम्हाला लोकांनी डोक्यावर घेतलं आहे तुम्ही विश्वासघात करू नये," असंही त्यांनी म्हटलं आहे.