'हे खपवून घेणार नाही', शिंदेंकडून संजय गायकवाड यांच्यावर कारवाईचे आदेश; निलंबनाची शक्यता - सूत्र
शिवसेना आमदार संजय गायकवाड यांनी शेतकऱ्यांसंदर्भात केलेल्या वादग्रस्त विधानानंतर उपमुख्यमंत्री एकनाथ शिंदे नाराज असल्याची सूत्रांची माहिती आहे.
शिवसेना आमदार संजय गायकवाड यांनी शेतकऱ्यांसंदर्भात केलेल्या वादग्रस्त विधानानंतर त्यांच्याविरोधात रोष व्यक्त केला जात आहे. आपल्या या विधानाने संजय गायकवाड यांनी पक्षांतर्गत नाराजीही ओढावून घेतल्याचं समजत आहे. त्यातच आता त्यांच्यावर मोठी कारवाई केली जाण्याची शक्यता आहे. सूत्रांच्या माहितीनुसार, संजय गायकवाड यांचं निलंबन केलं जाणार आहे. उपमुख्यमंत्री एकनाथ शिंदे यांनी यासंदर्भात आदेश दिल्याचं सूत्रांकडून समजत आहे.
एकनाथ शिंदेंकडून कारवाईचा आदेश
सूत्रांच्या माहितीनुसार, शेतकऱ्यांविषयी केलेल्या वादग्रस्त वक्तव्यामुळे उपमुख्यमंत्री एकनाथ शिंदे नाराज आहेत. त्यांनी संजय गायकवाड यांच्यावर कारवाई करण्याचे आदेश दिल्याचं समजत आहे. सूत्रांनुसार, आमदार संजय गायकवाड यांच्यावर निलंबनाची कारवाई होणार आहे.
शेतकरी हा अन्नदाता असून त्याच्याविरोधातील वक्तव्य खपवून घेणार नसल्याचा इशारा एकनाथ शिंदेंनी दिला आहे. संजय गायकवाड यांच्या वक्तव्यामुळे शिवसेनेची प्रतिमा मलीन होत असल्याची पक्षातील नेत्यांची भावना आहे. शेतकऱ्यांच्या मदतीसाठी पक्षाचे प्रयत्न सुरू असताना गायकवाड यांच्या वक्तव्यामुळे पक्षांतर्गत नाराजी आहे.
संजय गायकवाड यांचं आत्महत्या करणाऱ्या शेतकऱ्यांबाबत वादग्रस्त विधान
शिवेसेनेचे बुलढाण्याचे आमदार संजय गायकवाड या ना त्या कारणाने नेहमीच वादात असतात. कोणत्याही विषयावर बेताल बडबड करायची आणि वाद ओढवून घ्यायचा ही गायकवाड यांची जुनी सवय आहे. आत्महत्या करणाऱ्या राज्यातील शेतकऱ्यांबाबत संजय गायकवाड यांनी वादग्रस्त विधान केलं आहे. आत्महत्या करणा-या शेतक-याच्या अंत्यविधीला कोणीही जाऊ नये. त्यांचे मृतदेह जनावरं खातील तेव्हा शेतकऱ्यांना समजेल, असं विधान संजय गायकवाडांनी केलं होतं.
संजय गायकवाड यांच्या या वक्तव्यानंतर राज्यभरातून संताप व्यक्त करण्यात येतोय.. शेतकऱ्यांबाबत असंवेदनशील वक्तव्य करणाऱ्या गायकवाड यांच्यावर शेतकरी नेत्यांनी टीकास्त्र डागलंय.. संजय गायकवाड यांच्या या विधानाबाबत उपमुख्यमंत्री एकनाथ शिंदे यांनी माफी मागावी अशी मागणी शेतकरी नेते राजू शेट्टी यांनी केली होती. तर शेतकऱ्यांबद्दल असा विचार करणारं सरकार राज्यात असल्याचं दुर्दैव असल्याचं म्हणत
ठाकरेंच्या शिवसेनेचे धाराशीवचे आमदार कैलास पाटील यांनीही गायकवाड आणि सरकारवर हल्लाबोल केला आहे.
शेतकरी नेते आणि विरोधकांसोबतच गायकवाडांना त्यांच्याच पक्षाचतील नेत्यांनाही फटकारलं आहे. लोकप्रतिनिधींनी अशी वक्तव्य करायला नको असं म्हणत आमदार निलेश राणे यांनी संजय गायकवाडांच्या वक्तव्याचं आपण समर्थन करत नसल्याचं म्हटलंय. तर आमदार कोणत्या पक्षाचाही असो शेतकऱ्यांच्या बाबतीमध्ये चुकीचं वक्तव्य करणं योग्य नसल्याचं म्हणत आमदार अब्दूल सत्तार यांनी संजय गायकवाड यांचे कान टोचले आहेत.
