महाराष्ट्र दूध दरवाढ : अमूल, मदर डेअरीनंतर महाराष्ट्रातील विविध दूध संघांनी देखील दुधाच्या दरामध्ये वाढ केली आहे. गाय आणि म्हशीच्या दुधाच्या दरात प्रति लिटर चार रूपयांनी वाढ करण्यात आली आहे. आज पुण्यातील कात्रज दूध संघ आणि व्यावसायिकांमध्ये बैठक पार पडली, या बैठकीत दरवाढीचा निर्णय घेण्यात आला आहे.
गायीच्या दुधात 4 रुपये प्रति लिटर तर म्हशीच्या दुधात 4 रुपये प्रति लिटर अशी दरवाढ करण्याचा पुणे जिल्हा दूध व्यावसायिक कल्याणकारी संघटनेने घेतला आहे. आज पुण्यातील कात्रज दूध संघात सहकारी आणि खासगी प्रमुख दुग्ध व्यावसायिक आणि डेअरी उद्योजक यांची बैठक पार पडली. यात सर्वानुमते 4 रुपये प्रति लिटर एवढी दरवाढ करण्यात आली आहे. येत्या 16 नोव्हेंबर 2026 पासून हे नवीन दर लागू करण्यात येईल. पूर्वीच्या किमतीवर अधिक 4 रुपये प्रति लिटर अशी किंमत आता ग्राहकांना मोजावी लागणार आहे.
अमूलने दूध विक्री दरात 2 रुपयांची वाढ केल्यानंतर आता गोकुळनेही त्यांच्या दूध विक्री दरात वाढ करण्याच्या हालचाली सुरू केल्या आहेत. उद्या गोकुळची नव्या कार्यकारिणीची पहिली बैठक होणार आहे. या बैठकीत दूध विक्री दरात वाढ करण्याबाबत प्राधान्याने चर्चा होणार आहे. सध्या दुधाचा तुटवडा सुरू असून दूध उत्पादन खर्च वाढला आहे. या पार्श्वभूमीवर अमूलने 2 ते 4 रुपयांपर्यंत विक्री दर वाढवले आहेत. गोकुळनेही याबाबतच्या हालचाली सुरू केल्या आहेत.
सध्या गोकुळची 14 लाख लिटरपर्यंत दैनंदिन विक्री आहे. विशेषतः मुंबई आणि पुण्यामध्ये गोकुळ दुधाची सर्वाधिक विक्री होते. दुष्काळाच्या पार्श्वभूमीवर दुधाचे उत्पादन कमी झालं आहे. त्या तुलनेत पशुखाद्याचे दर वाढले आहेत. त्यामुळे गोकुळ दूध संघानेही विक्री दरात वाढ करण्यासाठी पावले उचलली आहेत. सध्या गोकुळचे दूध हे मुंबईत प्रतिलिटर 78 रुपयांनी विक्री होते.. दुधाचे उत्पादन खर्च वाढल्यामुळे शेतकऱ्यांना देखील दर वाढवून देण्याची शक्यता आहे.
11 नोव्हेंबर रोजी अमूल आणि मदर डेअरीने दुधाच्या किरकोळ विक्री दरात वाढ केली आहे. अमूलचं दूध 2 ते 3 रुपयांनी महागलं असून मदर डेअरीनंही दूध दरात प्रति लिटर 2 ते 4 रुपयांची वाढ केली आहे. गुजरात को-ऑपरेटिव्ह मिल्क मार्केटिंग फेडरेशनने बुधवारी दरवाढीची घोषणा केली. अमुलच्या सर्वाधिक विक्री होणाऱ्या 'अमूल ताजा' टोन्ड दुधाच्या प्रतिलिटर दरात दोन रुपयांची वाढ करण्यात आली आहे. 'अमूल गोल्ड' दुधाच्या दरात प्रतिलिटर चार रुपयांची वाढ करण्यात आली आहे.. दूध खरेदी खर्च वाढल्यानं ही दरवाढ केल्याचं सांगण्यात आले.