'दादा, तुझ्याशिवायची ही पहिली भाऊबीज, आजच्या दिवशी तुझं नसणं...', सुप्रिया सुळे अजित पवारांच्या आठवणीने झाल्या भावूक
अजित पवारांच्या निधनानंतरही ही पहिलीच दिवाळी असून कालच दिवाळी पाडव्यानिमित्त बारामतीकरांनी लाडक्या अजित पवारांना अनोखी श्रद्धांजली अर्पण केल्यानंतर आज सुप्रिया सुळेंनी लाडक्या भावासाठी भावनिक पोस्ट केली आहे.
भाऊबीजेच्या दिवशी राष्ट्रवादी काँग्रेसच्या खासदार सुप्रिया सुळेंनी त्यांचे दिवंगत बंधू अजित पवारांच्या आठवणींमध्ये एक भावूक पोस्ट केली आहे. ही पोस्ट करताना सुप्रिया सुळेंनी दरवर्षी बारामतीमध्ये साजऱ्या होणाऱ्या भाऊबीजेचे मागील वर्षाचे काही खास क्षण असलेला व्हिडीओ पोस्ट केला आहे. अजित पवारांच्या निधनानंतरची ही पहिलीच दिवाळी असून सुप्रिया सुळेंनी आपल्या पोस्टमधून अजित पवारांच्या सर्व बहिणींच्या भावना व्यक्त केल्या आहेत.
"दादा, तुझ्याशिवायची ही पहिली दिवाळी आणि पहिली भाऊबीज. दरवर्षी या दिवसाची आम्हा सगळ्या बहिणींना किती ओढ असायची! यंदा मात्र भाऊबीजेचा दिवस उजाडला आणि आपल्या असंख्य आठवणींनी मनात गर्दी केली," असं सुप्रिया सुळेंनी पोस्टच्या सुरुवातीला म्हटलं आहे. सोबत जोडलेल्या व्हिडीओमध्ये सुप्रिया सुळे अजित पवारांचं औक्षण करताना दिसत आहेत.
जुन्या आठवणींना उजाळा देताना, "आपलं एकत्र येणं, गप्पा, हसणं… आम्हा बहिणींच्या घोळक्यात हरखून गेलेला तू आजही डोळ्यांसमोर उभा राहतोस. तेव्हा अगदी सहज वाटणारे ते क्षण आज किती मोलाचे वाटतात," असं सुप्रिया सुळेंनी म्हटलं आहे.
पोस्टच्या शेवटी सुप्रिया सुळेंनी, "दादा, आजच्या दिवशी तुझं नसणं मनाला चटका लावून जातं. आम्हा सगळ्या बहिणींना तुझी किती आठवण येतेय, हे शब्दांत सांगणंही कठीण आहे. तू आमच्या मनात कायम आहेस आणि कायम राहशील," असं म्हणत लाकड्या भावाच्या आठवणींना उजाळा दिला आहे.
बारामतीकराकडून अनोखं अभिवादन
बारामतीमध्ये दरवर्षी अजित पवार दिवाळी पाडव्याला बारामतीकरांची भेट घ्यायचे. मात्र दादांशिवायच्या यंदाच्या पहिल्याच दिवाळीमध्ये बारामतीकरही भावूक झाल्याचं दिसून आलं. दिवाळी पाडव्याच्या निमित्ताने बारामतीकरांनी बारामती येथील सनसेट पॉईंट 10 हजारांहून अधिक पणत्या प्रज्वलित करून दादांच्या स्मृतींना अभिवादन केलं. यावेळी अजित पवारांच्या पत्नी तसेच उपमुख्यमंत्री सुनेत्रा पवार सहकुटुंब उपस्थित होत्या.
"प्रत्येक पणतीच्या प्रकाशात दादांविषयीचे प्रेम, आदर आणि त्यांच्या असंख्य जिवंत आठवणी अनुभवायला मिळाल्या. दादांसोबत साजरा केलेला दिवाळी पाडवा, त्यांचा सहवास, त्यांचं प्रेमळ बोलणं आणि कार्यकर्त्यांशी असलेलं जिव्हाळ्याचं नातं आज प्रकर्षानं आठवलं. दादा आज आपल्यात नसले, तरी बारामतीकरांच्या मनामनात ते आजही आहेत. त्यांच्या आठवणींचा हा दीपोत्सव त्यांच्या प्रेमाची आणि त्यांनी जोडलेल्या माणसांच्या नात्यांची साक्ष देणारा आहे. दादा, तुमच्या स्मृतींचा प्रकाश सदैव आमच्या मनात असाच तेवत राहील!" अशा शब्दांमध्ये सुनेत्रा पवारांनी या कार्यक्रमानंतर फोटो पोस्ट करताना इन्स्टाग्रामवर आपल्या भावानांना वाट मोकळी करुन दिली.
अजित पवार यांचे 29 जानेवारी रोजी बारामती विमानतळाजवळ झालेल्या विमान अपघातामध्ये निधन झालं.