पुण्यातील एकाच कुटुंबातील तिघांचा मृत्यू, सौंदत्ती यल्लम्माच्या दर्शनासाठी निघाले, वाटेतचं मृत्यूनं गाठलं

बेळगाव  अपघात : सौंदत्ती यल्लम्माच्या दर्शनासाठी निघालेल्या पुण्याच्या कुटुंबावर काळाने घाला घातला आहे. भीषण अपघातात चिमुकल्यासह तिघेजण ठार झाले आहेत.  बेळगाव जिल्ह्यातील गोकाक तालुक्यात हा अपघात झाला आहे. कार आणि ट्रकची समोरासमोर जोरदार धडक झाली. या भीषण अपघातात  पुण्याच्या चिमुकल्यासह एकाच कुटुंबातील तिघांचा जागीच मृत्यू झाला आहे. 

बेळगाव जिल्ह्यातील गोकाक तालुक्यातील मालदिन्नी क्रॉसजवळ कार आणि ट्रकची यांची समोरासमोर धडक झाली. या भीषण अपघातात तिघांचा जागीच मृत्यू झाला आहे. पुण्याच्या चिमुकल्यासह एकाच कुटुंबातील तिघांचा जागीच मृत्यू झाला आहे. या अपघाताची तीव्रता इतकी भीषण होती की कारचा अक्षरशः चुराडा झाला असून, इतर तिघे गंभीर जखमी झाले आहेत.

ओंकार चंद्रशेखर मांडरे (वय २६), रेश्मा मांडरे (वय ३२) आणि देवांश मांडरे (वय ४) अशी मृतांची नावे आहेत. पुण्यातील मांडरे कुटुंब सौंदत्ती येथील श्री रेणुका यल्लम्मा देवीच्या दर्शनासाठी कारने जात होते. 

प्रवासादरम्यान यरगट्टीहून गोकाकच्या दिशेने भरधाव वेगाने येणाऱ्या ट्रकने त्यांच्या कारला समोरून जोरदार धडक दिली. धडक इतकी जबरदस्त होती की कारचा पूर्णपणे चुराडा झाला आणि आतील तिघांनी जागीच प्राण सोडले.

या अपघातात श्रीकांत मांडरे, वंदना मांडरे आणि हर्षदा मांडरे हे तिघे गंभीर जखमी झाले आहेत. स्थानिकांच्या मदतीने जखमींना तातडीने जवळच्या रुग्णालयात उपचारासाठी दाखल करण्यात आले आहे. घटनेची माहिती मिळताच गोकाक ग्रामीण पोलिसांनी घटनास्थळी धाव घेत पंचनामा केला असून पुढील तपास सुरू आहे.

पुणे जिल्ह्यातील शिक्रापूर-न्हावरे रोडवर भीषण अपघात

पुणे जिल्ह्यातील शिक्रापूर-न्हावरे रोडवर भीषण अपघात झाला.. उरळगाव परिसरात एका खाजगी ट्रॅव्हल बस आणि मालवाहू ट्रकची समोरासमोर जोरदार धडक झाली. या धडकेत दोन्ही वाहनांचा चक्काचूर झाला असून, अपघातात ट्रक आणि बस चालक असे दोघेही गंभीर जखमी झाले आहेत. ​खाजगी ट्रॅव्हल बसमध्ये एकही प्रवासी नव्हता, त्यामुळे मोठी जीवितहानी टळली. मात्र, दोन्ही चालकांची प्रकृती सध्या चिंताजनक असून त्यांच्यावर रुग्णालयात उपचार सुरू आहेत.

लातूर जिल्ह्यात भीषण अपघात

लातूर जिल्ह्यात भीषण अपघाताची घटना समोर आली आहे. तुळजापूरहून औसाकडे येत असताना टाका पाटीजवळ कार, दुचाकी आणि टेम्पो यांच्यात भीषण धडक झाली. पाठीमागून आलेल्या कारने दुचाकीला जोरदार धडक दिल्याची प्राथमिक माहिती आहे. या अपघातात दुचाकीवरील तायप्पा बंडगर आणि ओमकार बंडगर या दोघांचा दुर्दैवी मृत्यू झाला आहे. तर एक जण जखमी झाल्याची माहिती आहे.