मीनाक्षी शिंदेंच्या राजीनाम्यावर एकनाथ शिंदेंची पहिली प्रतिक्रिया, म्हणाले 'पूर्णेकर हत्या प्रकरणी त्यांनी...'

उद्धव ठाकरेंच्या शिवसेनेचे विभाग प्रमुख प्रदीप पूर्णेकर हत्येप्रकरणी होणाऱ्या आरोपानंतर मीनाक्षी शिंदे यांनी महिला आघाडी जिल्हा प्रमुखपदाचा राजीनामा दिला आहे. प्रदीप पूर्णेकर यांची ठाण्यात हत्या करण्यात आली. याप्रकरणी पोलिसांनी आरोपींना अटक केली आहे. मात्र या प्रकरणात मीनाक्षी शिंदे यांचाही सहभाग असल्याचा आरोप ठाकरेंची शिवसेना आणि पूर्णेकर कुटुंबीयांचा आहे. त्यांनाही अटक केली जावी अशी त्यांची मागणी आहे. दरम्यान या राजीनाम्यानंतर उपमुख्यमंत्री एकनाथ शिंदे यांनी प्रतिक्रिया दिला आहे. ते ठाण्यात माध्यमांशी बोलत होते.

"मीनाक्षी शिंदे यांनी माझ्याकडे त्यांच्या पदाचा राजीनामा दिला आहे. त्यात त्यांनी झालेली घटना दुर्देवी असल्याचं म्हटलं आहे. पूर्णेकर हत्या दुर्देवी आणि दु:खद असल्याचं मीदेखील सांगतो. पण इतर राजकीय पक्ष त्याचं राजकारण करत आहेत ते जास्त दुर्देवी आहे. त्यांचं नाव वारंवार या घटनेशी वारंवार जात असल्याने पक्षाला त्रास होत असल्याची भावना व्यक्त करुन त्यांनी राजीनामा दिला आहे," असं एकनाथ शिंदे म्हणाले आहेत. 

हे ही वाचा - मोठी बातमी! शिवसेना नेत्या मीनाक्षी शिंदेंचा राजीनामा, प्रदीप पूर्णेकर प्रकरण भोवलं, पत्रात म्हणाल्या ‘माझ्यामुळे...’

"कायदेशीर बाबी सुरु आहेत. पोलिसांनीही बुलेटिन जारी केलं की, आरोपींना अटक केली असून तपास सुरु आहे. मी पहिल्याच दिवशी पोलीस आयुक्तांना फोन करुन घटनेची गंभीर दखल घेतली. हा तपास निष्पक्षपणे झाला पाहिजे, कोणाला पाठीशी घालण्याचं कारण नाही असं सांगितलं. त्यामुळे इतक्या जलदगतीने आरोपी पकडले गेले आहेत, शस्त्रं जप्त केली आहेत," असं ते म्हणाले.

"कोणीही पोलिसांवर दबाव आणण्याचं किंवा जनतेला वेठीस धरण्याचं काम करु नये. त्यांनी त्याचं काम निर्भयपणे केलं पाहिजे. आणि जनतेला नाहक त्रास होणार नाही याचीही काळजी घेतली पाहिजे. आम्ही पूर्णेकर कुटुंबीयांच्या दु:खात सहभागी आहोत. पोलिसांनाही योग्य आणि निष्पक्ष चौकशी कऱण्यास सांगितलं आहे आणि जे दोषी असतील त्यांच्यावर कारवाई करा," अशी माहिती त्यांनी दिली. 

ठाण्यातील बाहेरचे लोक येऊन ठाणेकरांना त्रास देत असून, हे वारंवार सुरु आहे. परवा रात्री जाळपोळ केली, हायवे बंद झाला, पोलिसांवर दगडफेक झाल, पोलीस जखमी झाले. पूर्णेकर कुटुंबाच्या घटनेवर राजकीय पोळी भाजू इच्छित आहेत हे दुर्देवी आहे अशी टीका त्यांनी केली आहे.

कोणत्याही स्थितीत कायदा सुव्यवस्था अबाधित ठेवणं आपलं काम आहे.वाहतूक कोंडी होता कामा नये हे मी सांगितलं आहे. शिवसेनच्या वतीने कायदा सुव्यवस्थेला बाधा येणार नाही याची काळजी शिवसेना घेईन असं सांगत त्यांनी पक्षाच्या आंदोलनाला पाठिंबा दिला.