'त्यांच्या पार्श्वभागांमध्ये अ‍ॅसिड, लाल मिरची पावडर टाकली', राऊताचा गंभीर आरोप; थेट गृहमंत्री, पालकमंत्र्यांना सवाल! 'एका बाईसाठी आणि तिच्या...'
प्रदीप पूर्णेकरांना न्याय मिळावा म्हणून रस्त्यावर उतरलेल्या तरुणांपैकी दोघांसोबत पोलिसांनी क्रूर कृत्यं केल्याचा आरोप केला जात असून यावरुन आता राऊत यांनी संताप व्यक्त करताना काय म्हटलंय पाहा...
माजी मुख्यमंत्री उद्धव ठाकरेंच्या शिवसेनेचे ठाण्यातील मानपाडा येथील विभागप्रमुख प्रदीप पूर्णेकर यांच्या हत्या प्रकरणामध्ये ठाण्यातील राजकीय वातावरण तापलेलं असतानाच पूर्णकर समर्थक तरुणांवर पोलिसांनी अत्याचार केल्याचे गंभीर आरोप पीडित तरुणांनी केले आहेत. दोन तरुणांना पोलिसांनी बेदम मारहाण करुन त्यांना अश्लील गोष्टी करण्यास भाग पाडल्याचा आरोप केला जात असतानाच आता या प्रकरणावर खासदार संजय राऊत यांनी भाष्य करताना सत्ताधाऱ्यांवर निशाणा साधला आहे. राऊत यांनी राज्याचे गृहमंत्री देवेंद्र फडणवीस, ठाण्याचे पालकमंत्री उपमुख्यमंत्री एकनाथ शिंदे आणि ठाण्याच्या पोलीस आयुक्तांवर या प्रकरणावरुन निशाणा साधला आहे.
पोलीस ठाण्याच्या पालकमंत्र्यांच्या घरी भांडी घासत आहेत का?
पत्रकारांशी संवाद साधताना राऊत यांनी, "ठाण्यामध्ये पूर्णेकर हत्या प्रकरण जे आरोपी पकडले जावे यासाठी आंदोलन करत आहेत त्या तरुण मुलांना ठाण्याच्या पोलिसांनी अटक करून निर्दयपणे मारले आहे. त्यांच्या पार्श्वभागांमध्ये ऍसिड टाकले आहे. लाल मिरचीची पावडर टाकली. मी टीव्ही ऐकले आहे. कुठे आहेत मुख्यमंत्री? कुठे आहे संवेदनशीलता? ठाण्याचे पोलीस ठाण्याच्या पालकमंत्र्यांच्या घरी भांडी घासत आहेत का? आम्ही बोललो तर तोंडातली शब्द वळत नाही," असा घणाघात केला आहे.
त्या पोलिसांच्या घरी मोर्चे काढू
"ती मुलं काय सांगत आहेत नीट पहा. त्याला कशाप्रकारे मारले आहे. या पोलिसांची नावे आता आम्ही जाहीर करू. हे जे नराधम आहेत पोलीस खात्यातील, जे एकनाथ शिंदेंच्या घरी धुणीभांडी करत आहेत आणि त्या पोलिसांच्या घरी मोर्चे काढू," असा थेट इशारा राऊत यांनी दिला आहे.
कुठे आहे राज्याची सुव्यवस्था?
"पूर्णेकर कुटुंबाला न्याय मिळायला हवा. ठाण्याच्या पोलीस आयुक्तांना जर जमत नसेल तर त्यांनी राजीनामा द्यावा. गृहमंत्री इतके हतबल आणि दुर्बल झाले आहेत. ते नापास झाले आहेत. त्यांनीसुद्धा गृहमंत्रीपद सोडले पाहिजे. कुठे आहे राज्याची सुव्यवस्था?" असा सवाल राऊत यांनी उपस्थित केला.
पोलिसांनी एकनाथ शिंदेंचे गुंड म्हणून काम करायला सुरुवात केली
"पोलीस एक गुंडांच्या भूमिकेत आहेत. पोलिसांनी एकनाथ शिंदेंचे गुंड म्हणून काम करायला सुरुवात केली आहे. कोणीही सत्तेचा अमर पट्टा घेऊन आलेला नाही. जर तुम्ही खाकी वर्दी घालून गुंडगिरी करत असाल तर भविष्यामध्ये त्याच लोकांना गुंडा सारखं मारलं जाईल," असा इशारा राऊत यांनी दिला आहे.
एका बाईसाठी...
"या पोलिसांना देखील मुंबईत यायचं आहे. इतकी अमानुषता? ठाण्यामध्ये कोणासाठी? एका बाईसाठी आणि तिच्या नवऱ्याला वाचवण्यासाठी का? अशी ती आहे कोण? झाशीची राणी आहे की राणीचारमा आहे की ताराबाई आहे, मला कळत नाही," अशी टीका राऊत यांनी केली.
