ग्वालियरमध्ये नवरात्रोत्सवादरम्यान मोठा अपघात, 41 भाविकांचा ट्रकने उडवलं, 15 जणांचा मृत्यू

Gwalior Accident : मध्यप्रदेशच्या ग्वालियरमध्ये शीतला माता मंदिराच्या रस्त्यावर एक मोठा अपघात घडला. नवरात्रउत्सवाच्या दरम्यान मोठ्या संख्येने श्रद्धाळू मंदिरात दर्शनासाठी जात होते. यावेळी धान्याने भरलेल्या एका ट्रकने 41 श्रद्धाळूंना चिरडलं. ग्वालियरच्या SSP धर्मवीर सिंहने सांगितलं की यात 15 जणांचा मृत्यू झाला आहे. तर एकूण 39 श्रद्धाळूंना रुग्णालयात नेण्यात आले होते. त्यापैकी 15 जणांचा मृत्यू झाला आहे. या अपघातात जखमी झालेल्या रुग्णांमध्ये दोन पोलिसांचा सुद्धा समावेश आहे जे यावेळी तेथे ड्यूटीवर उपस्थित होते.

अपघात झाल्यावर SSP धर्मवीर सिंग यांनी सांगितले की छिनोरच्या दिशेकडून मंदिराकडे जाणाऱ्या रस्त्यावर उतार आहे. या मार्गावर जड वाहनांच्या वाहतुकीस मनाई आहे. पहाटे दीडच्या सुमारास भाताने भरलेला एक ट्रक तिथे थांबवण्यात आला होता. मात्र तो ट्रक पोलिसांचे बॅरिकेड्स तोडून अचानक अनियंत्रित झाला आणि उतारावरून खाली गेला. त्यानंतर तो मंदिराच्या बाहेरील भिंतीवर आणि प्रवेशद्वारावर जाऊन आदळला. या अपघातात रस्त्यावर उपस्थित असलेले भाविक ट्रकखाली अडकले.

41 जणांना रुग्णालयात केलं दाखल :

SSP ने सांगितले की, आतापर्यंत मिळालेल्या माहितीनुसार एकूण 41 जणांना रुग्णालयात नेण्यात आले आहे. त्यापैकी 15 जणांचा मृत्यू झाला आहे. पाच ते सहा रुग्णांना गंभीर दुखापत झाली असून त्यात हाडे मोडलेल्या रुग्णांचाही समावेश आहे. उर्वरित जखमींना किरकोळ दुखापत झाली असून त्यांच्यावर उपचार सुरू आहेत. या घटनेत कर्तव्यावर असलेले दोन पोलीस कर्मचारीही जखमी झाले आहेत. त्यांच्यावरही सध्या वैद्यकीय उपचार सुरू आहेत.

कसा झाला अपघात?

ग्वाल्हेरच्या जिल्हाधिकारी रुचिका चौहान यांनी सांगितले की, पहाटे दीडच्या सुमारास एक ट्रक अनियंत्रित झाल्याची माहिती मिळाली होती. ही बातमी मिळताच रुग्णवाहिका आणि इतर वाहने घटनास्थळी रवाना करण्यात आली. या अपघातात 15 जणांचा मृत्यू झाला असून सुमारे 39 जण जखमी झाले आहेत. त्यांनी पुढे सांगितले की, जखमींच्या दुखापतींचे स्वरूप समजून घेण्यासाठी सीटी स्कॅन आणि एक्स - रे चाचण्या केल्या जात आहेत. ज्यामुळे त्यांच्या वैद्यकीय उपचारांत मदत होईल.

ग्वाल्हेरच्या जिल्हाधिकाऱ्यांनी सांगितले की, नवरात्रीनिमित्त रस्त्यावर बॅरिकेड्स आणि पोलिसांची तपासणी नाके उभारण्यात आली होती. ट्रक या अडथळ्यांना तोडून मंदिराकडे जाणाऱ्या मार्गापर्यंत कसा पोहोचला, याचा तपास केला जाईल. ट्रकची तांत्रिक तपासणी करण्यासाठी आरटीओ (RTO) पथकाला पाठवण्यात आले आहे. हे पथक वाहनात काही तांत्रिक बिघाड होता का आणि डावीकडे वळताना वाहन कसे अनियंत्रित झाले, याची पडताळणी करेल. प्रशासन या अपघाताची कारणे तसेच सुरक्षा व्यवस्थेशी संबंधित बाबींचा तपास करत आहे.