SOCIAL MEDIA

Newsletter

PARTNER SITES
Select Language Select State

सोनिया गांधींच्या पुस्तक प्रकाशन सोहळ्यात भाजपाला मोठा धक्का... पहिल्या रांगेत BJP चा बडा नेता; लवकरच 'घरवापसी'?

सोनिया गांधींच्या पुस्तक प्रकाशनाला उपस्थित असलेल्या नेत्यांच्या आसनव्यवस्थेवरून राजकीय चर्चांना उधाण आलेलं असतानाच या सोहळ्याचा चक्क एक भाजपाचा नेता उपस्थित असल्याने अनेकांच्या भुवया उंचावल्या

Reported By Swapnil Ghangale Written By Swapnil Ghangale
Published: Nov 17, 2026, 08:56 IST | Updated: Nov 17, 2026, 09:10 IST
Image Credit: सोहळ्याला भारतीय जनता पार्टीच्या नेत्याचीही हजेरी (फोटो - राहुल गांधींच्या एक्स अकाऊंटवरुन साभार)
Join

काँग्रेसच्या ज्येष्ठ नेत्या सोनिया गांधी यांच्या आत्मचरित्राच्या प्रकाशन सोहळ्याच्या निमित्ताने दिल्लीत विरोधी पक्षांच्या नेत्यांची मांदियाळी पाहायला मिळाली. 'बिलॉन्गिंग : अ जर्नी ऑफ लव्ह' या पुस्तकाचं प्रकाशन करण्यात आलं. या सोहळ्याला राहुल गांधी, प्रियंका गांधी, काँग्रेस अध्यक्ष मल्लिकार्जुन खर्गे यांच्यासह इंडिया आघाडीतील अनेक प्रमुख नेते उपस्थित होते. विशेष म्हणजे या सोहळ्याला एका भारतीय जनता पार्टीच्या नेत्याने उपस्थिती लावली होती. त्यातही खास बाब अशी की या नेत्याला पहिल्या पंक्तीत स्थान देण्यात आलं होतं.

अखिलेश यादव यांना मानाचं स्थान

सोनिया गांधींच्या या आत्मचरित्राच्या प्रकाश सोहळ्यामध्ये आसनव्यवस्थेवरून राजकीय समीकरणांची चर्चा रंगल्याचं पाहायला मिळत आहे. अखिलेश यादव यांना सोनिया गांधींच्या बाजूला मानाचे स्थान देण्यात आलं होतं. पुढील वर्षी होत असलेल्या उत्तर प्रदेशमधील विधानसभा निवडणुकीमध्ये काँग्रेस आणि समाजवादी पक्ष एकत्र लढणार आहे. त्या पार्श्वभूमीवरच अखिलेश यांना थेट सोनिया गांधींच्या बाजूला स्थान मिळाल्याचं सांगितलं जात आहे. आजपासून या दोन्ही पक्षांमध्ये जागावाटपासंदर्भात प्राथमिक चर्चा सुरु होणार आहे. त्यापूर्वीच दिल्लीतील कार्यक्रमात हे दोन्ही पक्षांमधील बॉण्डींग मजबूत करणारं चित्र दिसून आलं. या सोहळ्याला अखिलेश यांची पत्नी डिंपल यादवही उपस्थित होत्या.

राहुल गांधींच्या बाजूला बसलेल्या नेत्यानं वेधलं लक्ष

याचप्रमाणे पहिल्या रांगेत राहुल गांधींही बसले होते. त्यांच्याच बाजूला पहिल्या रांगेत तामिळनाडूचे मुख्यमंत्री विजय यांना मानाचे स्थान मिळाले. तामिळनाडूमधील विधानसभा निवडणुकीनंतर निर्माण झालेल्या राजकीय गुंतागुंतीदरम्यान काँग्रेसनं विजय यांची मदत करुन त्यांना सत्ता स्थापन करण्यास मदत केली होती. यामुळे दक्षिणेत नवीन समीकरण जुळल्याचं दिसून आलं. भविष्यातही विजय आणि राहुल गांधींची युती अधिक मजबूत होईल असा विश्वास दोन्ही पक्षातील कार्यकर्त्यांकडून व्यक्त केला जातोय.

भाजपाचा नेता पहिल्या रांगेत

या सर्वापेक्षाही अधिक चर्चा राहिली ती पंजाबमधील भारतीय जनता पार्टीचे नेते आणि माजी मुख्यमंत्री कॅप्टन अमरिंदर सिंग यांच्या उपस्थितीची! अमरिंदर सिंग हे या सोहळ्याला पोहचल्यानंतर अगदी ते कारमधून उतरेपासून ते संपूर्ण कार्यक्रमादरम्यानही त्यांच्यावर सर्वांचं विशेष लक्ष होतं. अमरिंदर सिंग यांना या कार्यक्रमात पहिल्या रांगेत स्थान देण्यात आलं होतं. पूर्वी अमरिंदर सिंग हे काँग्रेसमध्येच होते. काँग्रेसचे नेते म्हणून 2002 ते 2007 आणि त्यानंतर 2017 ते 2021 अशा दोन कार्यकाळात त्यांनी पंजाबचे मुख्यमंत्रीपद सांभाळले. 2021 मध्ये काँग्रेसमधील अंतर्गत वादानंतर त्यांनी वादानंतर त्यांनी मुख्यमंत्रिपदाचा आणि पक्षाच्या सदस्यत्वाचा राजीनामा दिला. त्यानंतर त्यांनी स्वतःचा 'पंजाब लोक काँग्रेस' पक्ष स्थापन केला आणि पुढे 2022 मध्ये तो भारतीय जनता पक्षात (भाजप) विलीन करून भाजपमध्ये प्रवेश केला. सोनिया गांधींच्या पुस्तक प्रकाशन सोहळ्याला अमरिंदर यांनी हजेरी लावल्याने पुढील वर्षी होणाऱ्या पंजाबच्या विधानसभा निवडणुकींआधी ते काँग्रेसमध्ये घसवापसी करणार की काय अशी चर्चा राजकीय वर्तुळात सुरु झाली आहे.

इंडिया आघाडीचे इतरही अनेक नेत्यांची उपस्थिती

तृणमूल काँग्रेसचे अभिषेक बॅनर्जी, झारखंडचे मुख्यमंत्री हेमंत सोरेन, जम्मू-काश्मीरचे मुख्यमंत्री ओमर अब्दुल्ला, नॅशनल कॉन्फरन्सचे प्रमुख फारुख अब्दुल्ला आणि राष्ट्रवादी काँग्रेस (शरदचंद्र पवार) पक्षाच्या नेत्या सुप्रिया सुळे यांच्यासह अनेक इंडिया आघाडीचे नेते उपस्थित होते.

Add Zee News as a Preferred Source
TAGS:

About the Author

मोजक्या शब्दांमध्ये...स्वप्निल घंगाळे हे मागील 12 वर्षांहून अधिक काळापासून डिजिटल पत्रकारितेमध्ये सक्रीय आहेत. 'महाराष्ट्र टाइम्स', 'लोकसत्ता' यासारख्या नामांकित कंपन्यांमध्ये त्यांनी यापूर्वी काम केलेलं आहे. राजकीय बातम्यांबरोबरच ताज्या घडामोडी, ट्रेण्डींग/ व्हायरल, टेक्नोलॉजी, क्रीडा, मनोरंजन अशा सर्वच क्षेत्रातील बातम्यांमध्ये हातखंडा आहे. अवांतर वाचनाबरोबरच बातम्यांव्यतिरिक्त सोशल मीडियावर लिहायची आवड आहे. फावल्या वेळात चित्रपट पाहणे, भटकंती करायला आवडतं. बातमी अचूक असावी असा त्यांचा कटाक्षाने प्रयत्न असतो. सध्या ते 'झी 24 तास'मध्ये 'डेप्युटी न्यूज एडिटर' म्हणून कार्यरत आहेत.पत्रकारितेचा श्रीगणेशास्वप्निल यांनी पत्रकारितेच्या दुसऱ्या वर्षापासूनच 'ठाणे वैभव' या ठाण्यातील स्थानिक वृत्तपत्रामध्ये शिकाऊ पत्रकार म्हणून कामाला सुरुवात केली. सांस्कृतिक आणि गुन्हेगारी यासंदर्भातील वृत्तांकन यांनी या सहा महिन्याच्या कालावधीमध्ये केलं. बीएमएमच्या तृतीय वर्षाला ठाण्यातील जोशी-बेडेकर महाविद्यालयातील 'ऋत' या पत्रकारिता विभागाच्या महाविद्यालयीन वृत्तपत्रासाठी स्वप्निल यांनी उपसंपादक म्हणून काम पाहिले.डिजिटलमध्ये एन्ट्री'महाराष्ट्र टाइम्स डॉट कॉम'च्या माध्यमातून पहिल्यांदा डिजिटल क्षेत्रामध्ये काम करणाऱ्या स्वप्निल यांनी सुरुवातीला सोशल मिडिया व्यवस्थापक म्हणून काम पाहिले. त्यानंतर हळूहळू ते डिजिटल वृत्तांकनाकडे वळले. त्यांनी 'महाराष्ट्र टाइम्स' वृत्तपत्रामध्येही माहिती-तंत्रज्ञान या विषयावर लेखन केलं. मुख्य पुरवणीसोबतच अनेकदा रविवार विशेष अंकांमध्येही त्यांचे लेख छापून आले आहेत. 'मुंबई टाइम्स' या पुरवणीअंतर्गत विद्यार्थ्यांच्या विश्वातील अनेक विषय त्यांनी कॉलेज क्लब रिपोर्ट्सच्या माध्यमातून हाताळले. कॉलेज क्लब रिपोर्टर्ससोबतच्या कामासोबतच त्यांनी 'मटा सन्मान', 'मटा श्रावण क्विन' यासारख्या कार्यक्रमांसाठी डिजिटल आणि प्रिंटदरम्यान संयोजक म्हणून काम पाहिलं. जवळपास पाच वर्ष ते मटामध्ये कार्यरत होते.प्रगल्भतेची आसमहाराष्ट्र टाइम्सनंतर तितक्याच तोलामोलाच्या 'लोकसत्ता'मध्ये स्वप्निल यांनी काम केलं. या ठिकाणीही ते पाच वर्ष कार्यरत होते. 'मटा'पासून सुरु झालेल्या प्रवासाला 'लोकसत्ता'मध्ये प्रगल्भता लाभली. राजकीय बातम्या, ताज्या घडामोडी, ट्रेडींग बातम्या याबरोबरच त्यांनी डिजिटल आणि प्रिंटमधील समन्वयाचं (इंटीग्रेशन) कामही त्यांनी लोकसत्तामध्ये केलं. 'लोकसत्ता'मधील 'व्हिवा' या पुरवणीमध्ये तरुणाईसंदर्भातील विषयांवर त्यांनी लेखन केलं. तसेच 'लोकप्रभा'च्या माध्यमातून त्यांनी माहिती-तंत्रज्ञान या विषयावर लिखाण केलं. लोकसत्ता डॉट कॉममध्ये स्वप्निल यांनी चार ते पाच सेक्शनसची जबाबदारी पार पाडली.तो सध्या काय करतो?'लोकसत्ता'नंतर स्वप्निल यांनी पहिल्यांदाच टीव्हीशी संलग्न वेबसाईटसाठी म्हणजेच 'झी 24 तास'च्या वेबसाईटसाठी काम करण्याचा निर्णय घेतला. या ठिकाणी ते ताज्या घडामोडींबरोबरच, राजकीय बातम्या, ब्रेकिंग बातम्या, ट्रेडिंग बातम्या हाताळतात. बातमीमधील अचूक माहिती, व्याकरण, उत्तम मथळे यासारख्या गोष्टींकडे त्यांचं कटाक्षाने लक्ष असतं. लिखाणबरोबरच मॅरेथॉन पळणं, वेगवेगळ्या ठिकाणी खादडीसाठी जाणं, पुस्तकांसोबतच अवांतर वाचन यासारख्या गोष्टींना ते प्राधान्य देतात.
Read More

ZEENEWS TRENDING STORIES