भारतीय जनता पार्टीच्या एका खासदाराने शेतकऱ्यांबद्दल केलेल्या विधानावरुन नवीन वादाला तोंड फुटलं आहे. सदर खासदार मध्य प्रदेशमधील रेवा मतदारसंघाचं नेतृत्व करतात. जनार्दन मिश्रा नावाचे हे खासदार त्यांच्या स्पष्टवक्तेपणामुळे अनेकदा अडचणीत येतात. अनेकदा जाहीर भाषणांमध्ये त्यांनी केलेल्या विधानांवरुन वाद झाल्याचं दिसून आलं आहे. नुकतेच ते मौगंज जिल्ह्यातील राकरी ग्रामपंचायतीने कमल गोशाळेत आयोजित केलेल्या गोवर्धन पूजेच्या कार्यक्रमात सहभागी झाले होते. यावेळी त्यांनी शेतकऱ्यांबद्दल बोलताना, शेतकरी वर्षातील तीन महिने काम करतो आणि उतरलेले नऊ महिने पत्ते खेळण्यात आणि दारू पिण्यात घालतो, अशा कठोर शब्दांमध्ये शेतकऱ्यांवरच निशाणा साधला. सध्यांनी मिश्रा यांचे हे विधान सोशल मीडियावर व्हायरल झाले आहे.
भाजप खासदार शेतकऱ्यांबद्दल काय म्हणाले?
भाजप खासदार जनार्दन मिश्रा शेतकऱ्यांच्या कामाबद्दल बोलताना, "शेतकरी फक्त तीन महिने काम करतात. उरलेले नऊ महिने ते काय करतात?" असा सवाल उपस्थितांना विचारला. त्यावर एका व्यक्तीने उत्तर दिले की ते पत्ते खेळतात. त्यावर जनार्दन मिश्रांनी, "उरलेले नऊ महिने पत्ते खेळण्यात, बाटल्या, लहानसहान वस्तू आणि 'राजश्री, जय भोले'च्या घोषणा देण्यात घालवले जातात. नऊ महिने रिकामे बसून घालवले जातात. मग ते म्हणतात की शेतीला काही अर्थच नाही," असं म्हणत शेतकऱ्यांना सुनावलं.
खऱ्या कष्टाची किंमत नसल्याची टीका
मिश्रा यांचे हे वक्तव्य मौगंज जिल्ह्यात चर्चेचा विषय ठरत आहे. शेतकऱ्यांच्या कष्टाबद्दल खासदारांनी केलेल्या वक्तव्यावर अनेकांनी प्रश्न उपस्थित केले आहेत. या विधानानंतर मिश्रा यांच्या भूमिकेला विरोध करणाऱ्यांकडून शेतीतील खऱ्या कष्टाबद्दल खासदारांना कल्पना नसावी असं म्हटलं जात आहे. मिश्रांच्या विधानावरुन वादविवाद सुरू झाला आहे. मात्र एकीकडे हा वाद सुरु झालेला असताना दुसरीकडे या खासदाराने अद्याप आपल्या वक्तव्यावर स्पष्टीकरण दिलेले नाही. अनेकांनी खासदारही किती काम करतात असा सवाल केला आहे.
Indian Parliament runs for hardly 65 days in a whole year, and for the remaining 10 months.... BJP MPs like Janardan Mishra enjoy free Delhi bungalows, free business-class flights, and lifelong pensions... A politician who lives on taxpayer money for 10 months without work is standing on stage and telling the country that farmers only work for 3 months.
— Bayanbaazi (@Bayan__baazi) November 10, 2026
जनतेच्या संपर्कात असलेला नेता
खरं तर जनार्दन मिश्रा हे मध्य प्रदेशमधील भाजपचे ज्येष्ठ नेते मानले जातात. ते सलग तीन वेळा खासदार राहिले आहेत. त्यांनी 2014 मध्ये पहिल्यांदा रेवा मतदारसंघातून विजय मिळवला. त्यानंतर 2019 आणि 2024 मध्ये त्यांनी ही जागा कायम राखली. 2024 मध्ये, त्यांनी काँग्रेसचे नीलम अभय मिश्रा यांचा एक लाखांहून अधिक मतांनी पराभव केला. ते सतत जनतेच्या संपर्कात असतात आणि लोकांमध्ये वावरतात. तळागाळातील लोकांपर्यंत पोहोचलेला नेता अशी त्यांची ओळख असल्याने ते अनेकदा कठोर शब्दांमध्ये लोकांना चार शब्द सुनावताना दिसतात.
मस्कलाही दिलेली धमकी
जनार्दन मिश्रा त्यांच्या वक्तव्यांमुळे यापूर्वीही चर्चेत आल्याचं पाहायला मिळालं आहे. यापूर्वी, त्यांनी 'एक्स'चे (ट्विटरचे) मालक इलॉन मस्क यांना दोनदा बुक्की मारण्याची धमकी दिली होती. इतकेच नाही, तर भारतात मस्क यांना व्यवसाय करायचा झाल्यास तो पंतप्रधान मोदींच्या अटींवरच करावा लागेल, असेही त्यांनी मस्क यांना इशारा देताना म्हटले होते.