आयर्लंडमध्ये व्हिसासाठी AI ची मदत घेणं भोवलं, तब्बल 3300 भारतीय विद्यार्थ्यांचा व्हिसा रिजेक्ट

Ireland Indian Students Visa : परदेशात जाऊन शिकण्याची अनेकांची इच्छा असते. मात्र अशा भारतीय विद्यार्थ्यांसाठी एक हैराण करणारी बातमी समोर आली आहे. आधुनिक तंत्रज्ञान आणि AI चा गरजेपेक्षा जास्त वापर केल्याने परदेशात जाऊन शिक्षण घेण्याचं स्वप्न पाहणाऱ्या विद्यार्थ्यांच्या करिअरवर वाईट प्रभाव पडल्याची माहिती समोर आली आहे. आयर्लंडसाठी विद्यार्थी व्हिसा मिळवू इच्छिणाऱ्या हजारो भारतीय विद्यार्थ्यांचे अर्ज केवळ या कारणास्तव फेटाळले गेले की, कारण त्यांनी व्हिसा अर्ज आणि पर्सनल स्टेटमेंट लिहिण्यासाठी चॅटजीपीटी सारख्या एआय टूल्सची मदत घेतली होती.

5100 पैकी 3300 भारतीय विद्यार्थ्यांचा अर्ज रिजेक्ट :

ताज्या आकडेवारीनुसार यावर्षी आयर्लंडमध्ये उच्च शिक्षण घेण्यासाठी एकूण 5100 भारतीय विद्यार्थ्यांनी स्टुडंट व्हिजासाठी ऑनलाईन अर्ज केला होता. मात्र जेव्हा आयरिश दूतावास आणि त्यांच्या व्हिसा अधिकाऱ्यांनी या अर्जांची बारकाईने तपासणी केली, तेव्हा एक अत्यंत धक्कादायक सत्य समोर आले. एकूण प्राप्त अर्जांपैकी सुमारे 3300 विद्यार्थ्यांचे व्हिसा अर्ज पूर्णपणे फेटाळण्यात आले. याचा अर्थ असा की भारतीय अर्जदारांपैकी जवळपास 64 टक्के लोकांचे व्हिसा अर्ज सरसकट रद्द करण्यात आले कारण त्या अर्जांमधील मजकूर एआय द्वारे तयार करण्यात आला होता.

व्हिजा अधिकाऱ्यांनी कशी पकडली विद्याथ्यांची लबाडी?

आजकाल व्हिजा प्रोसेसिंग सिस्टमला आता खूपच आधुनिक आणि ऍडव्हान्स बनवलं गेलं आहे. परदेशी दूतावासांकडे एआय शोधणारी विशेष सॉफ्टवेअर आणि साधने असतात, ज्यांच्या मदतीने एखादा मजकूर माणसाने लिहिलेला आहे की संगणकाद्वारे आपोआप तयार केला गेला आहे, हे सहज ओळखता येते. जेव्हा व्हिसा अधिकाऱ्यांच्या लक्षात आले की हजारो विद्यार्थ्यांच्या अर्जांमध्ये एकसारखी भाषा, कृत्रिम शब्दरचना आणि लेखनाचे एकसमान नमुने आहेत, तेव्हा त्यांना त्वरित संशय आला. तेव्हा व्हिजा अधिकाऱ्यांचे असे मत झाले की एआयचा वापर करून लिहिलेल्या अर्जांमध्ये विद्यार्थ्यांच्या खऱ्या भावना, मौलिकता आणि प्रामाणिकपणाचा अभाव होता.

परदेशात जाण्यासाठी किती गरजेचं आहे पर्सनल स्टेटमेंट?

कोणत्याही देशाचा व्हिजा मिळवण्यासाठी सबमिट केल्या जाणाऱ्या स्टेटमेंट ऑफ पर्पस एप्लिकेशन हे महत्वपूर्ण दस्तावेज असतं. ज्याच्या माध्यमातून परदेशातील सरकारला समजून घेण्यास मदत होते की विद्यार्थ्यांना त्यांच्या देशात का यायचं आहे. विद्यार्थ्याची आर्थिक स्थिती आणि शिक्षण पूर्ण झाल्यानंतरच्या त्यांच्या योजनांच्या संदर्भात व्हिसा नियमांनुसार हे पत्र विद्यार्थ्याने स्वतःच्या भाषेत स्वतःच लिहिणे अनिवार्य आहे. मात्र स्वतः मेहनत घेण्याऐवजी अनेक भारतीय विद्यार्थ्यांनी शॉर्टकटचा अवलंब करून संपूर्ण अर्ज AI कडून तयार करून घेतला. दूतावासाने याकडे फसवणुकीचा गंभीर प्रकार आणि आवश्यक ती काळजी न घेतल्याचे प्रकरण म्हणून पाहिले आणि याविरुद्ध कठोर भूमिका घेत त्यांनी हे व्हिसा अर्ज फेटाळून लावले.