IPL 2027 पूर्वी CSK मध्ये मोठे बदल, मायकल हसी सह 5 कोचने सोडला संघ

IPL 2027 Coaching Staff Change : आयपीएल 2027 पूर्वी चेन्नई सुपरकिंग्सच्या कोचिंग स्टाफमध्ये मोठा बदल झाला आहे. सोमवारी 26 ऑक्टोबर रोजी फ्रेंचायझीने सोशल मीडियावर कोचिंग स्टाफमधील 5 सदस्य हे वेगळे होत असल्याची माहिती शेअर केली. ज्यात बॅटिंग कोच मायकल हसीचा सुद्धा समावेश होता. यापूर्वी 2026 सीजननंतर सीएसकेचा हेड कोच असलेला स्टीफन फ्लेमिंग याने सुद्धा आपले पद सोडले होते आणि संघापासून वेगळा झाला. त्यानंतर जहीर खान याला चेन्नई सुपरकिंग्सने मुख्य हेड कोच म्हणून नियुक्त केलं.

17 वर्षांपासून चेन्नई सुपरकिंग्सचा हेड कोच असणाऱ्या स्टीफन फ्लेमिंगनंतर आता सपोर्ट स्टाफमधील अजून 5 दिग्गजांनी संघ सोडला आहे. मायकेल हसीचे आभार मानत त्या पोस्टमध्ये म्हटले आहे. '2008 मधील पहिल्या हंगामापासून, तुम्ही चेन्नई सुपर किंग्स कुटुंबाचा एक अविभाज्य भाग राहिला आहात'. पुढे सीएसकेने म्हंटलं की, 'पिवळ्या जर्सीमधील तुमचा प्रवास केवळ तुम्ही काढलेल्या धावा किंवा तुम्ही घडवलेल्या खेळाडूंमुळेच नाही, तर अनेक वर्षांपासून या फ्रँचायझीसाठी तुम्ही दाखवलेली निष्ठा, नम्रता आणि अटळ वचनबद्धतेमुळेही ओळखला जाईल. आमच्या इतिहासात तुमचे स्थान नेहमीच खास असेल, थाला!'

गोलंदाजी प्रशिक्षक एरिक सायमंड्स यांच्यासाठीच्या लिहिलेल्या पोस्टमध्ये म्हटले आहे, 'एरिक सायमंड्स, जे 2018 पासून चेन्नई सुपर किंग्सच्या कोचिंग सेटअपचा एक अविभाज्य भाग राहिले आहेत, त्यांनी आमच्या गोलंदाजी विभागाला घडवण्यात आणि गेल्या काही वर्षांत संघाच्या यशात मोलाचे योगदान दिले आहे. तुमच्या समर्पित सेवेबद्दल आणि योगदानाबद्दल आम्ही मनापासून कृतज्ञता व्यक्त करतो. धन्यवाद, एरिक सिमन्स. तुमच्या भविष्यातील वाटचालीस खूप खूप शुभेच्छा'. विशेष म्हणजे, आगामी हंगामात मोहित शर्मा संघाचे गोलंदाजी प्रशिक्षक म्हणून काम पाहतील.

  संघाचा माजी सहाय्यक कोच असणाऱ्या राजीव कुमारबाबत पोस्ट करत सीएसकेने लिहिले की, 'चेन्नई सुपर किंग्सच्या कोचिंग टीममधील एक महत्त्वाचे सदस्य म्हणून, राजीव कुमार यांनी गेल्या काही वर्षांत संघाची तयारी, विकास आणि कामगिरी यामध्ये मोलाचे योगदान दिले आहे. खेळाडूंसोबत जवळून काम करणे, आपले कौशल्य त्यांच्यापर्यंत पोहोचवणे आणि संघाचा पाया अधिक भक्कम करणे, या गोष्टी आमच्या प्रवासाचा एक अविभाज्य भाग राहिल्या आहेत. धन्यवाद, राजीव कुमार! भविष्यासाठी तुम्हाला खूप खूप शुभेच्छा'.