मुंबई सह चेन्नई सुपरकिंग्सला मोठा धक्का! युवा स्टार क्रिकेटरला पुन्हा दुखापत, दोन महिने मैदानापासून दूर राहणार?

Ayush Mhatre Injury : भारताचा अंडर 19 वर्ल्ड कप 2026 चा विजेता कर्णधार आयुष म्हात्रे हा पुन्हा एकदा दुखापतग्रस्त झाला आहे. मुंबईच्या वानखेडे स्टेडियमवर 11 ऑक्टोबर पासून रणजी ट्रॉफी 2026-27 चा पहिला सामना चंदीगड विरुद्ध मुंबई यांच्यात खेळवला गेला. या सामन्यात आयुष म्हात्रे हा मुंबई संघाचा उपकर्णधार होता. तसेच आयपीएल 2026 मध्ये चेन्नई सुपरकिंग्सकडून खेळत असताना झालेल्या दुखापतीतून अनेक महिन्यांनी बरा होऊन तो रणजी ट्रॉफी सामन्यात पुनरागमन करत होता. मात्र या सामन्यात त्याला दुर्दैवाने पुन्हा दुखापत झाली. रणजी ट्रॉफी 2026-27 सीजनच्या पहिल्या सामन्यादरम्यान आयुषला उजव्या हॅमस्ट्रिंगमध्ये 'ग्रेड 4' ची गंभीर दुखापत झाली आहे. त्यामुळे प्राथमिक माहितेनुसार आयुष हा पुढील जवळपास दोन महिने क्रिकेट पासून दूर राहण्याची शक्यता आहे.

पुनरागमन सामन्यात पुन्हा दुखापत :

आयुष म्हात्रे हा आयपीएलमध्ये चेन्नई सुपरकिंग्सकडून खेळतो. आयपीएल 2026 मध्ये सामना खेळत असताना आयुषच्या उजव्या पायाला हॅमस्ट्रिंगची दुखापत झालेली. तो सध्या चेन्नई सुपरकिंग्सच्या संघासाठी खेळतो. दुखापतीमुळे त्याने आयपीएलचे फक्त 6 सामने खेळले. बंगळुरू येथील बीसीसीआयच्या 'सेंटर ऑफ एक्सलन्स'मध्ये तीन महिने पुनर्वसन प्रक्रिया पूर्ण केल्यानंतर तो नुकताच मैदानावर परतला होता. आता रणजी ट्रॉफी स्पर्धेतील पहिल्याच सामन्यात त्याला दुखापत झाली आहे.

मुंबई रणजी संघाचा कर्णधार सिद्धेश लाड म्हणाला की, 'तो काही काळ संघासोबत नसेल असे असं सध्या तरी दिसतंय. सामन्यादरम्यान तो ज्या प्रकारे लंगडत चालत होता, त्यावरून तो दुसऱ्या किंवा तिसऱ्या सामन्यासाठी उपलब्ध असेल असे वाटत नाही'.

कशी झाली दुखापत?

रणजी ट्रॉफी 2026-27 साठी आयुष म्हात्रेला मुंबईचं उपकर्णधार बनवण्यात आलं आहे. रविवारी मुंबईसाठी ओपनिंग फलंदाजी करताना म्हात्रेच्या उजव्या हॅमस्ट्रिंगला दुखापत झाली. त्यानंतर चंदीगडच्या दोन्ही डावांदरम्यान त्याने फिल्डिंग केली नाही. विकेट्सच्या दरम्यान धावताना त्याला ही दुखापत झाली. अखेरीस 48 धावा केल्यावर तो बोल्ड झाला. आपल्या खेळीदरम्यान धावा घेताना तो अनेकदा लंगडताना दिसला. मुंबईने वानखेडे स्टेडियमवर चंदीगडविरुद्ध डावाने विजय मिळवला. प्रथम फलंदाजी करताना मुंबईने 429 धावा केल्या. चंदीगडने पहिल्या डावात 78 धावा केल्या आणि फॉलोऑन खेळताना 196 धावांत ऑलआऊट झाले. मुंबईने एक डाव आणि 155 धावांनी विजय मिळवला.