क्रिकेटर रिंकू सिंहने पंतप्रधान मोदींना दिलं लग्नाचं आमंत्रण, रिंकू आणि प्रिया कधी अडकणार विवाहबंधनात?
Rinku Singh And Priya Saroj Wedding : क्रिकेटर रिंकू सिंह याने दिल्लीत पंतप्रधान नरेंद्र मोदींची भेट घेतली. स्टार फलंदाज रिंकू सिंह आणि खासदार प्रिया सरोज हे लग्नबंधनात अडकणार असून त्यांच्या विवाहाचे आमंत्रण रिंकूने पंतप्रधान नरेंद्र मोदींना दिले.
Rinku Singh And Priya Saroj Wedding : भारतीय क्रिकेट संघाचा स्टार फलंदाज रिंकू सिंह आणि खासदार प्रिया सरोज हे दोघे विवाह बंधनात अडकणार आहेत. तेव्हा क्रिकेटर रिंकू सिंह याने दिल्लीत पंतप्रधान नरेंद्र मोदींची भेट घेतली आणि त्यांना आपल्या विवाहाचे आमंत्रण दिले. पंतप्रधान मोदींची भेट घेतल्याचा फोटो रिंकू सिंहने आपल्या सोशल मीडियावर शेअर केला. यावेळी रिंकू सिंहची आई, बहीण सुद्धा यावेळी उपस्थित होते. याचवर्षी फेब्रुवारी महिन्यात रिंकू सिंहच्या वडिलांचं दुःखद निधन झालं, तेव्हा रिंकू हा टी20 वर्ल्ड कप संघाचा भाग होता. मात्र आता वडिलांच्या निधनाचं दुःख पाठीवर ठेऊन तो भारतीय संघात पुन्हा सामील झाला. या कारणाने रिंकू आणि प्रिया सरोजचे लग्न हे पुढे ढकलण्यात आलं.
4 डिसेंबर रोजी लखनऊमध्ये होणार विवाह :
रिंकू सिंह समाजवादी पक्षाच्या खासदार प्रिया सरोज हिच्याशी विवाह करणार आहेत. प्रिया सरोज उत्तर प्रदेशातील मछलीशहर लोकसभा मतदारसंघाचे प्रतिनिधित्व करते. रिंकू सिंहआणि प्रिया सरोज 4 डिसेंबर 2026 रोजी विवाहबंधनात अडकणार आहेत. हा विवाह सोहळा लखनऊमधील रामाडा हॉटेलमध्ये पार पडणार आहे. दोन्ही कुटुंबांमध्ये लग्नाची जोरदार तयारी सुरू असून, पाहुण्यांना आमंत्रणपत्रिका पाठवण्याचे कामही सुरू झाले आहे.
या समारंभाला क्रिकेट आणि राजकारणातील अनेक दिग्गज व्यक्ती उपस्थित राहण्याची शक्यता आहे. पंतप्रधान मोदींना निमंत्रण दिल्यानंतर, रिंकूने त्यांच्यासोबतचा एक फोटो शेअर केला आणि लिहिले, 'पंतप्रधान नरेंद्र मोदी यांची माझ्या कुटुंबासह भेट घेता आली, हे माझ्यासाठी सन्मानाची गोष्ट आहे. मी त्यांना माझ्या लग्नाचे निमंत्रण दिले आणि त्यांचे आशीर्वादही घेतले. हा आमच्यासाठी खरोखरच एक विशेष क्षण आहे'.
मीडिया रिपोर्ट्सनुसार भारतीय क्रिकेटपटू विराट कोहली आणि रोहित शर्मा टीम इंडियाचे मुख्य प्रशिक्षक गौतम गंभीर आणि बीसीसीआयचे उपाध्यक्ष राजीव शुक्ला यांना लग्नाचे निमंत्रण पाठवण्यात आले आहे. दरम्यान रिंकूच्या कुटुंबीयांनी उत्तर प्रदेशचे मुख्यमंत्री योगी आदित्यनाथ यांची भेट घेतली आणि त्यांना स्वतः लग्नाचे निमंत्रण दिले.
