'मी चांगला गोलंदाज नाहीये', भुवनेश्वर कुमारच्या टीम इंडियातील कमबॅकवर काय म्हणाला मोहम्मद शमी?

Mohammad Shami On Bhuvaneshwar Kumar : भारताचा स्टार गोलंदाज भुवनेश्वर कुमार जवळपास 4 वर्षांपासून टीम इंडियाच्या बाहेरच्या होता. त्याला संधी मिळत नव्हती, मात्र आगामी न्यूझीलंड विरुद्ध टी२० सीरिजसाठी त्याची भारतीय संघात निवड झालेली आहे. तर मोहम्मद शमी सारखा दिग्गज गोलंदाज अजूनही टीम इंडियात संधी मिळण्याच्या प्रतीक्षेत आहे. जवळपास 2 वर्षांपासून मोहम्मद शमी भारतीय संघात पुनरागमनाची वाट पाहत आहे. पण असं असलं तरी मोहम्मद शमी हा देशांतर्गत क्रिकेटमध्ये लागोपाठ चांगली कामगिरी करतोय. सध्या रणजी ट्रॉफी 2026-27 मध्ये मोहम्मद शमी खेळत असून येथे तो आपल्या जबरदस्त गोलंदाजीचं प्रदर्शन करत आहे. मोहम्मद शमीला त्याला टीम इंडियात संधी न मिळण्याबाबत प्रश्न विचारला असता शमी उत्तर देताना निराश दिसला आणि त्याने टोला लगावला.

कल्याणी येथे खेळल्या जात असलेल्या सामन्याच्या पहिल्या दिवशी 11 ऑक्टोबर रोजी मोहम्मद शमीने 17.3 ओव्हर गोलंदाजी केली, ज्यामध्ये नऊ ओव्हर मेडन होत्या. त्याच्या या कामगिरीवरून हे दिसून आलं की  तो देशांतर्गत क्रिकेटमध्ये सातत्याने कठोर परिश्रम घेत आहे आणि आपल्या गोलंदाजीच्या जोरावर प्रभाव पाडण्यास सक्षम आहे. पहिल्या दिवशीचा खेळ संपल्यावर पत्रकारांनी मोहम्मद शमीला त्याच्या फिटनेसबाबत प्रश्न विचारला, तेव्हा त्याने आपल्या अंदाजात उत्तर दिलं . मोहम्मद शमी म्हणाला की, 'तुम्ही माझी तंदुरुस्ती पाहू शकता, त्याबद्दल लिहा. तुम्ही माझ्याकडे लक्ष ठेवूनच आहात. मग मी काय म्हणतो याने काय फरक पडतो? मी मैदानात आहे, खेळत आहे आणि जिथे जिथे संधी मिळेल तिथे स्पर्धा करत आहे'.

मोहम्मद शमीला विचारण्यात आलं की सतत चांगली कामगिरी करूनही भारतीय संघात संधी का मिळत नाहीये? त्यावर मोहम्मद शमी म्हणाला की, 'नाही, नाही, मी काही चांगला गोलंदाज नाही'. त्याच्या या उत्तरावरून भारतीय संघातील निवडीबाबतच्या त्याच्या नाराजीची कल्पना येते.

भुवनेश्वरच्या पुनरागमनावर काय म्हणाला शमी?

मोहम्मद शमीने एकीकडे निवड समितीबाबत निराशा व्यक्त केली तर दुसरीकडे भुवनेश्वरच्या टी20 संघातील पुनरागमनाचे स्वागत केले. न्यूझीलंडविरुद्धच्या आगामी टी20 मालिकेसाठीच्या भारतीय संघात 36 वर्षीय भुवनेश्वरने स्थान मिळवले आहे. भुवनेश्वरला भारतीय संघात खूप आधीच परत बोलावले जायला हवे होते असे शमीला वाटते. भुवनेश्वर इतरांशी फारसा संवाद साधत नाही, हे खरे असले तरी, केवळ त्या कारणास्तव त्याच्या गुणवत्तेकडे इतका काळ दुर्लक्ष केले जाऊ नये, असे मत त्याने व्यक्त केले.

मोहम्मद शमी भुवनेश्वरच्या निवडीवर म्हणाला, 'भुवीची निवड खूप आधी व्हायला हवी होती. तो कोणाशी फारसा बोलत नाही, पण याचा अर्थ असा नाही की त्याच्यातील गुणवत्तेला इतका काळ डावलले जावे. ही भुवनेश्वरसाठी चांगली गोष्ट आहे. त्याने आयपीएलमध्ये सातत्याने चांगली कामगिरी केली आहे आणि तो या संधीस पात्र आहे'. मोहम्मद शमी पुढे असे सुद्धा म्हणाला की, 'जर एखादा खेळाडू कठोर परिश्रम करत असेल आणि त्याच्यात क्षमता असेल, तर त्याला नक्कीच पुढे जाण्याची संधी मिळायला हवी'.