गुजरातमध्ये जन्मला पण न्यूझीलंडसाठी खेळला क्रिकेट, 38 व्या वर्षी स्टार क्रिकेटरने जाहीर केली निवृत्ती

Jeet Raval Retired : न्यूझीलंडचा माजी क्रिकेटर आणि भारतीय मूळचा क्रिकेटर जीत रावलने 2026-27 च्या देशांतर्गत सीजनपूर्वी प्रोफेशनल क्रिकेटच्या सर्व फॉरमॅटमधून निवृत्ती घेतली आहे. 38 वर्षांच्या या डाव्या हाताच्या फलंदाजाने न्यूझीलंडच्या राष्ट्रीय क्रिकेट संघातून जवळपास 2016 ते 2020 दरम्यान 24 टेस्ट सामने खेळले. मैदानाला निरोप दिल्यानंतर रावल आता आपल्या दुसऱ्या इनिंग्जवर पूर्णपणे लक्ष केंद्रित करणार आहे. जीत रावल हा एका ऑडिटिंग फर्ममध्ये चार्टर्ड अकाउंटंट (CA) म्हणून काम करत असून आता क्रिकेटमधील निवृत्तीनंतर त्याचा पूर्णवेळ हाच व्यवसाय असणार आहे.

जीत रावलने निवृत्तीची घोषणा :

गुजरातमध्ये जन्मलेल्या जीत रावलचा क्रिकेटमधील प्रवास खूपच मजेदार होता. रावल यांनी अहमदाबादमधील विद्यानगर शाळेत भारताचे माजी विकेटकिपर -फलंदाज पार्थिव पटेल यांच्यासोबत शिक्षण घेतले. शालेय काळात ते पार्थिव पटेल यांचे सलामीचे जोडीदार होते. त्यानंतर त्यांचे कुटुंब गुजरात सोडून ऑकलंडमध्ये स्थायिक झाले. जीत रावलने न्यूझीलंडच्या अंडर 19 संघात आपली वेगळी ओळख निर्माण केली. डिसेंबर 2008 मध्ये त्याने वेस्टइंडिज विरुद्ध ऑकलँडकडून फर्स्ट क्लास क्रिकेटमध्ये पदार्पण केलं. जीत रावलने वर्ष 2016 मध्ये क्राइस्टचर्च येथे पाकिस्तान विरुद्ध पदार्पण केलं होतं. त्याने 24 टेस्ट सामन्यात 1 शतक आणि 7 अर्धशतक लगावले आहेत. 2021 मध्ये भारताचा पराभव करून पहिल्या 'वर्ल्ड टेस्ट चॅम्पियनशिप' स्पर्धेचे विजेतेपद पटकावणाऱ्या न्यूझीलंडच्या संघात ते सदस्य होते.

काय म्हणाला जीत रावल?

जीत रावलने निवृत्तीची घोषणा केल्यावर म्हटलं की, 'हा निर्णय घेणे ही माझ्यासाठी अत्यंत सन्मानाची आणि अभिमानाची गोष्ट आहे. मला पूर्ण समाधान आणि मानसिक शांतता लाभली आहे. ब्लॅक कॅप्ससाठी खेळणे हे माझे बालपणीचे स्वप्न होते आणि आज मागे वळून पाहताना मला अभिमान वाटतो. हे केवळ माझेच स्वप्न नव्हते, तर माझ्या वडिलांचेही होते. त्यांनी एक संधी हेरली आणि संपूर्ण कुटुंबाला न्यूझीलंडला आणले, जेणेकरून मी हे स्वप्न साकार करू शकेन.'

जीत रावलने ठोकल्या 10000 धावा :

जीत रावल हा न्यूझीलंडच्या देशांतर्गत क्रिकेटमध्ये एक विश्वासू आणि दिग्गज सलामी फलंदाजात गणला जातो. त्यांनी आपल्या 292 फर्स्ट क्लास इनिंगपैकी 285 डावांत ओपनर म्हणून फलंदाजी केली आणि 37.36 च्या सरासरीने 10127 धावा केल्या. यात 23 शतकांचा समावेश आहे. डिसेंबर 2025 मध्ये प्रथम श्रेणी क्रिकेटमध्ये 10000 धावा पूर्ण करणारे ते न्यूझीलंडचे 30 वे फलंदाज ठरले.

न्यूझीलंडची फर्स्ट क्लास स्पर्धा प्लंकेट शील्डमध्ये त्यांनी 8662 धावा केल्या. या स्पर्धेच्या संपूर्ण इतिहासात केवळ मायकल पॅप्स, मॅथ्यू सिंक्लेअर आणि पीटर फुल्टन यांनीच त्याच्यापेक्षा जास्त धावा केल्या आहेत. कर्णधार म्हणून त्याने 2024-25 च्या सिजनमध्ये 'नॉर्दर्न डिस्ट्रिक्ट्स'ला 'प्लंकेट शील्ड'चे विजेतेपद मिळवून दिले; एका दशकाहून अधिक काळानंतर त्यांना हे यश मिळाले.