पुन्हा मौका मौका! 8 नोव्हेंबर रोजी क्रिकेटच्या मैदानात भिडणार भारत-पाकिस्तान, वेळापत्रकाची घोषणा

U19 Asia Cup 2026 : एशियन क्रिकेट काउन्सिलने आगामी पुरुष अंडर 19 आशिया कप 2026 च्या वेळापत्रकाची घोषणा केली आहे. 9 दिवसांची ही रोमांचक स्पर्धा ओमानमध्ये खेळवली जाणार असून यंदा या स्पर्धेत एकूण 8 संघ सहभागी होतील. हे सामने ओमानच्या दोन मैदानांवर खेळवले जातील. डिफेंडिंग चॅम्पियन म्हणून पाकिस्तानचा अंडर 19 संघ मैदानावर उतरेल ज्यांनी मागच्यावर्षी डिसेंबर महिन्यात अंडर 19 आशिया कपचे विजेते म्हणून ट्रॉफीवर नाव कोरलेले.

पुरुष अंडर आशिया कप 2026 ची सुरुवात 5 नोव्हेंबरला होणार आहे. 14 नोव्हेंबर रोजी या स्पर्धेचा अंतिम सामना होणार असून स्पर्धेत भाग घेणाऱ्या आठ संघांना प्रत्येकी चार - चार अशा दोन गटात विभागण्यात येणार आहे. यातील ग्रुप ए मध्ये भारत, पाकिस्तान, यूएई आणि नेपाळचा समावेश आहे, तर ग्रुप बीमध्ये श्रीलंका, अफगाणिस्तान, मलेशिया आणि ओमान हे संघ असणार आहेत. या स्पर्धेच्या लीग स्टेजमध्ये एकूण 12 सामने होतील तर दोन ग्रुपमधील सर्वोच्च दोन संघ सेमी फायनलसाठी क्वालिफाय करतील.

भारत - पाक सामन्याकडे सर्वांचं लक्ष :

भारत आणि पाकिस्तान हे दोन संघ जेव्हा जेव्हा एकमेकांसमोर येतात तेव्हा त्यांच्या सामन्याकडे जगाचं लक्ष असतं. दोन्ही संघ हे ग्रुप ए मध्ये आहे. त्यामुळे दोघांमधील ग्रुप स्टेजचा सामना हा 8 नोव्हेंबर रोजी ओमानमध्ये ओसीए ग्राउंड 1 वर होईल. क्रिकेटप्रेमींच्या नजरा या अत्यंत चुरशीच्या सामन्यावर खिळलेल्या असतील. गेल्या वर्षी डिसेंबरमध्ये संयुक्त अरब अमिराती (UAE) येथील आयसीसी अकादमी मैदानावर खेळल्या गेलेल्या 2025 च्या अंतिम सामन्यात पाकिस्तानने विजेतेपद पटकावले होते. अंतिम सामन्यात फरहान युसूफच्या नेतृत्वाखालील पाकिस्तान संघाने 191 धावांनी विजय मिळवत आपले दुसरे अंडर-19 आशिया कप विजेतेपद पटकावले होते. यावेळी त्या पराभवाचा बदला घेण्याच्या आणि विजेतेपद जिंकण्याच्या उद्देशाने भारतीय संघ मैदानात उतरेल.

50 ओव्हरची असणार स्पर्धा :

गेल्या वर्षी संयुक्त अरब अमिरातीमध्ये झालेल्या स्पर्धेप्रमाणेच ही संपूर्ण स्पर्धा 50 ओव्हरच्या स्वरूपात खेळवली जाईल. सर्व 15 सामने भारतीय प्रमाणवेळेनुसार सकाळी 10:30 वाजता सुरू होतील.ओमान क्रिकेट अकादमीच्या ओसीए ग्राउंड 1 आणि ओसीए ग्राउंड 2 वर होणाऱ्या या सामन्यांमध्ये आशियातील युवा खेळाडूंची पुढची पिढी आपली गुणवत्ता सादर करण्यास सज्ज आहे. भारतीय संघ यावेळी आणखी एक विजेतेपद पटकावणार की पाकिस्तान आपले वर्चस्व कायम राखणार हे 14 नोव्हेंबर रोजी होणाऱ्या अंतिम सामन्याच्या दिवशीच समजेल.