नाव, नंबर, पत्ता... सर्व माहिती डार्क वेबवर लीक! SBI ने दिली सायबर हल्ल्याची माहिती; तज्ज्ञ पथक...
देशातील सर्वात मोठी सार्वजनिक क्षेत्रातील बँक, स्टेट बँक ऑफ इंडियाने ग्राहकांचा डेटा डार्क वेबवर लीक झाल्याची अखेर कबुली दिली आहे. या प्रकरणात आता तज्ज्ञ पथक चौकशी करणार आहे.
सार्वजनिक क्षेत्रातील सर्वात मोठी आणि प्रसिद्ध बँक स्टेट बँक ऑफ इंडियामध्ये तुमचं अकाऊंट असेल तर मोठी बातमी आहे. एका अज्ञात हॅकर गटाने सोशल मीडियावर दावा केला होता की त्यांच्याकडे एसबीआय ग्राहकांचा वैयक्तिक डेटा आहे. पण यावर एसबीआयकडून काहीही प्रतिक्रिया आली नव्हती. जेव्हा सायबर सुरक्षा देखरेख संस्थेनेही सदर दाव्याची माहिती पोस्ट केल्यानंतर बँकिंग क्षेत्रासह देशभरात खळबळ माजली आहे. दरम्यान अखरे बुधवारी बँकेकडून अधिकृतपणे सायबर हल्ल्या झाल्याचे कबुल करण्यात आलं आहे. 3897 ग्राहकांची वैयक्तिक माहिती डार्क वेबवर लीक झाल्याची कबुली एसबीआय बँकनेने दिली आहे.
हेसुद्धा वाचा - मोठी बातमी! SBI च्या 3.75 लाख ग्राहकांचा डेटा लीक झाल्याचा हॅकर्सचा दावा, KYC डॉक्यूमेंट आणि वैयक्तिक माहिती धोक्यात
एसीबीआयच्या या कबुलीमुळे बँकिंग क्षेत्रासह ग्राहकांमध्ये घबराटीचे वातावरण आहे. पण बँकेने त्यासोबत हेही स्पष्ट केलं आहे की, या सायबर हल्ल्यामुळे त्यांच्या कामकाजावर कोणताही परिणाम झालेला नाहीय. पण सोबतच त्यांनी आपल्या लाखो ग्राहकांना सतर्क राहण्याचे आवाहन केलं आहे.
बुधवारी बँकेने एक पत्र जाहीर केलं त्यात त्यांनी कबूल केलं आहे की, सायबर हल्ल्यादरम्यान सुमारे 3,897 ग्राहकांचा डेटा डार्क वेबकडे आहे. प्राथमिक तपासानुसार, ग्राहकांची नावे, मोबाईल क्रमांक, जन्मतारीख, ईमेल पत्ते, घराचे पत्ते, ग्राहक आयडी आणि कर्जाच्या नोंदी ही संपूर्ण माहिती लीक झाली आहे. बँकेने हे प्रकरण गांभीर्याने घेतल्याचेही त्यांनी स्पष्ट केलं आहे. त्यांनी स्पष्ट केलं आहे की, या प्रकरणाच्या तपासासाठी एका स्वतंत्र सायबर सुरक्षा एजन्सीची नियुक्ती करण्यात आली आहे.
ग्राहकांनी काय काळजी घ्यायची आहे?
एसबीआयमधील या सायबर हल्ल्यामुळे ग्राहकांमध्ये भीतीदायक वातावरण आहे. सायबर तज्ज्ञांनी ग्राहकांना सांगितलं आहे की, अशा स्थितीत आता ग्राहकांनी फोन कॉल किंवा बनावट मेसेज्स पासून सावध राहायचं आहे. कारण या माहितीच्या आधारे त्यांना आर्थिक फटका बसण्याची दाट शक्यता आहे. ही फसवणूक टाळण्यासाठी तुमचा OTP, PIN, पासवर्ड किंवा कार्ड CVV कोणत्याही अनोळखी व्यक्तीला देऊ नका. कोणतेही संशयास्पद फोन कॉल, कर्जाच्या ऑफर्स किंवा बँकेशी संबंधित ईमेल्सची पडताळणी केवळ SBI च्या अधिकृत साइडवर जाऊनच करा.
