तरुणपणीच होतोय केस गळतीचा त्रास? मग करा 'हे' घरगुती उपाय, घनदाट होतील डोक्यावरचे केस

Hair Care Tips : केस गळती ही सध्या खूप साधारण समस्या झाली असून आजकाल तरुणाईला सुद्धा ही समस्या मोठ्या प्रमाणात भेडसावत आहे. वातावरणात होणारे बदल, तणाव, आहार, झोप तसेच शरीरात इतर पोषकतत्वांची कमतरता इत्यादी अनेक हार्मोनल बदल हे सुद्धा यामागचं कारण आहेत. तेव्हा केसं गळती रोखण्यासाठी आणि पुन्हा घनदाट केसं मिळवण्यासाठी लोकं विविध प्रकारचे घरगुती उपाय करतात. जर केस वेगाने आणि सतत गळत असतील, तर त्यामागे आरोग्याशी संबंधित एखादी समस्या असू शकते. तेव्हा केस गळती रोखण्यासाठी कोणते उपाय करायला हवेत आणि कशी काळजी घ्यायला हवी याविषयी जाणून घ्या.

आहारात करा महत्वाचे बदल :

केसांच्या निरोगी वाढीसाठी शरीराला पुरेसे प्रथिने, लोह, झिंक आणि इतर पोषक घटकांची आवश्यकता असते. त्यामुळे आहारात मसूर, हरभरे, राजमा, दूध, दही, अंडी, पनीर, पालेभाज्या, फळे, सुकामेवा आणि बिया यांसारख्या पदार्थांचा समावेश केला जाऊ शकतो. शरीरात आयरन आणि प्रोटीनची कमतरता असेल तर केस गळतात.  आहाराचे प्रमाण खूप कमी करणे किंवा दीर्घकाळापर्यंत क्रॅश डाएट करणे हे देखील केसांच्या आरोग्यासाठी हानिकारक असते. त्यामुळे वजन कमी करण्याच्या नादात खूप कमी खाणं टाळा. जर तुम्हाला पोषक तत्वांची कमतरता असल्याचे वाटत असेल, तर कोणतीही चाचणी न करता सप्लिमेंट्स घेण्याऐवजी डॉक्टरांचा सल्ला घेणे अधिक चांगले. काही विशिष्ट जीवनसत्त्वे आणि खनिजांचे अतिसेवन केल्यानेही केस गळू शकतात.

केसांना तेल लावा पण... :

केसांना तेल लावल्याने केसं सॉफ्ट होतात आणि त्यात कोरडेपणा कमी होतो. मात्र तेल लावल्याने केस गळतीच्या समस्येवर समाधान मिळत नाही. गरजेनुसार खोबरेल तेल किंवा इतर सामान्य केसांची तेले वापरता येतात. तेल लावताना टाळू जोरात चोळणे टाळा. केस धुताना सौम्य शॅम्पूचा वापर करा आणि प्रत्येक वेळी कंडिशनर लावा. ओले केस जोरात चोळण्याऐवजी किंवा ओढण्याऐवजी ते हळुवारपणे कोरडे करा. तसेच अति उष्णता निर्माण करणाऱ्या हेअर ड्रायर्स, स्ट्रेटनर्स आणि कर्लिंग आयर्न्सचा वापर कमीत कमी करा, कारण यामुळे केस कमकुवत होऊन तुटू शकतात.

केस बांधण्याची पद्धत सुद्धा महत्वाची :

केस गळती थांबवायची असेल तर केस बांधण्याची पद्धत सुद्धा महत्वाची आहे. केस सतत खूप घट्ट बांधल्यानेही त्यांचे नुकसान होऊ शकते. घट्ट पोनीटेल, अंबाडा किंवा अतिशय घट्ट वेण्यांमुळे केसांच्या मुळांवर ताण येतो. दीर्घकाळ असे केल्याने एका विशिष्ट प्रकारची केस गळती होऊ शकते. त्यामुळे केस सैलसर बांधणे आणि हेअरस्टाईलमध्ये बदल करत राहणे अधिक चांगले असते.

जर तुम्हाला अचानक, मोठ्या प्रमाणात केस गळण्याचा अनुभव येत असेल, टक्कल पडल्याचे दिसत असेल, केसांची पुढची रेषा वेगाने मागे सरकत असल्याचे दिसत असेल किंवा दीर्घ काळापासून केस सतत विरळ होत असल्याचे लक्षात येत असेल, तर केवळ घरगुती उपायांवर अवलंबून राहू नका. केस गळण्याची अनेक कारणे असू शकतात आणि योग्य उपचारांसाठी मूळ कारण ओळखणे आवश्यक आहे. गरज भासल्यास, त्वचाविकारतज्ज्ञ तपासणीद्वारे जीवनसत्त्वे किंवा खनिजांची कमतरता, संप्रेरकांशी (हार्मोन्स) संबंधित समस्या किंवा इतर मूळ कारणे शोधू शकतात. त्यामुळे, दाट केस टिकवून ठेवण्याचा सर्वात सोपा मार्ग म्हणजे सकस आहार घेणे, केसांची काळजीपूर्वक निगा राखणे आणि कोणत्याही घरगुती उपायाकडे 'चमत्कारी उपाय' म्हणून न पाहणे.