दररोज व्यायाम करण्याची सवय कशी लावायची? जाणून घ्या 5 सोप्या ट्रिक

Health News : फिट राहण्यासाठी अनेकजण एक्सरसाइज सुरु करतात मात्र काही दिवसांनी मात्र त्यांचं हे रुटीन सुरु राहत नाही. कधी थकवा तर काही कामाच्या कारणामुळे दररोज व्यायामाची सवय राहत नाही. मग असा प्रश्न पडतो की रोजच्या आयुष्यात व्यायामाची सवय लावायची तरी कशी? मग एका प्रसिद्ध फिटनेस कोचने याचे 5 ट्रिक्स सांगितले आहेत.

मनात असो वा नसो सुरुवात करा :

व्यायामाची सवय लावण्यासाठी सर्वात महत्त्वाची गोष्ट म्हणजे तो सातत्याने करत राहणे. तुम्हाला दररोज व्यायाम करावासा वाटेलच असे नाही. काही वेळा तुम्हाला उत्साही वाटेल तर काही वेळा प्रचंड थकवा जाणवेल. अशा दिवसांत व्यायाम टाळण्याऐवजी फक्त सुरुवात करण्याचा प्रयत्न करा. जरी तुमच्याकडे दीर्घ सत्रासाठी वेळ किंवा ऊर्जा नसेल तरीही थोडा वेळ नक्की काढा. अनेकदा एकदा का तुम्ही सुरुवात केली की, आपोआपच व्यायामाचा ओघ साधला जातो.

कमीत कमी 10 मिनिटांची मुमेंट नक्की करा :

दररोज खूप वेळ व्यायाम करणं आवश्यक नाही. जर तुम्ही खूप व्यस्त असाल किंवा एखाद्या दिवशी तुम्हला व्यायाम करावासा वाटत असेल तर किमान 10 मिनिटे तरी तुमचे शरीर सक्रिय ठेवण्याचा प्रयत्न करा. तुम्ही चालणे, स्ट्रेचिंग किंवा घरीच हलके व्यायाम करू शकता. दुसरीकडे, एखाद्या दिवशी तुम्हाला विशेष उत्साही वाटत असेल, तर तुम्ही तुमचा पूर्ण व्यायाम करू शकता. थोडक्यात सांगायचे तर, दररोज कोणत्या ना कोणत्या प्रकारे हालचाल करत राहणे महत्त्वाचे आहे.

आधीपासून ठरवा तुम्हाला करायचं आहे :

अनेकदा आपण व्यायामाची गोष्ट आपल्या मनस्थितीवर सोडून देतो. म्हणजेच इच्छा असल्यास व्यायाम करायचा आणि नसेल तर तो टाळायचा. याच कारणामुळे तो दररोजचा व्यायाम खंडित होत राहतो. तेव्हा असं करण्याच्या ऐवजी व्यायामासाठी वेळ राखून ठेवा.व्यायाम पूर्ण केल्यानंतर, दुसऱ्या दिवशी पुन्हा व्यायाम करण्याचा निर्णय घ्या. असं केल्यास हळूहळू व्यायामाची सवय लागेल.

आपल्या मेहनतीला क्रेडिट द्या :

फिटनेसचा विचार करताना, केवळ तुम्ही किती वजन कमी केले किंवा किती वेळ व्यायाम केला एवढेच महत्त्वाचे नाही तर त्या दिवशी तुम्ही व्यायामासाठी वेळ काढला, ही गोष्टही लक्षात घेणे महत्त्वाचे असते.

हेच रुटीन पुन्हा :

फिटनेसच्या बाबतीत दररोज परिपूर्ण असण्याची गरज नाही. सातत्य राखणे म्हणजेच प्रयत्न सुरू ठेवणे हेच महत्त्वाचे आहे. एखाद्या दिवशी व्यायाम कमी झाला, तर दुसऱ्या दिवशी पुन्हा सुरुवात करा.