'शेतकऱ्यांचे लचके तोडण्याची...', ठाकरेंच्या शिवसेनेचा हल्लाबोल; संजय गायकवाडांचा 'लांडगा' असा उल्लेख करत म्हणाले, 'विधान भवनाबाहेर...'

"हिंदुहृदयसम्राट बाळासाहेब ठाकरे यांच्या विचारांचे आम्हीच खरे वारसदार वगैरे असल्याच्या थापा ‘मिंधे’ सेनेचे लोक मारत असतात. बाळासाहेब ठाकरे हे हिंदुत्ववादाचे सेनापती होतेच, तरीही मानवता धर्म हा सर्व धर्मांच्या वर असल्याचे ते सांगत. या मानवता धर्माचाच गळा घोटण्याचे काम ‘मिंधे’ सेनेचे लोक करत असतात. मिंधे पक्षाचे बुलढाण्याचे आमदार संजय गायकवाड यांनी महाराष्ट्रातील दुष्काळ, त्यात होरपळलेला शेतकरी आणि आत्महत्या करणाऱ्या शेतकऱ्यांची क्रूर थट्टा केली आहे. त्यांनी केलेली विधाने महाराष्ट्राच्या मानवी संस्पृतीला काळिमा फासणारी आहेत," असं उद्धव ठाकरेंच्या शिवसेनेनं म्हटलं आहे. "मिंधे यांचे हस्तक आमदार संजय गायकवाड अत्यंत निर्घृणपणे म्हणाले, ‘‘आत्महत्या करणाऱ्या शेतकऱ्यांच्या अंत्यसंस्काराला कोणी जाऊ नये. त्यांच्या मृतदेहांचे लचके जनावरांनी तोडले तरच त्यांना धडा मिळेल व आत्महत्या थांबतील.’’ आमदार गायकवाड यांनी असले अमानुष संशोधन मांडून भारताच्या शेतकऱ्यांना कोणता ‘चैतन्य’ मंत्र दिला? या संशोधनाबद्दल मुख्यमंत्री फडणवीस हे गायकवाडसारख्यांना ‘कृषिभूषण’ पुरस्कार देतात की पंतप्रधान मोदी त्यांना ‘पद्म’ पुरस्काराने सन्मानित करतात, एवढेच आता पाहायचे," असा टोला 'सामना'च्या अग्रलेखातून लगाव्यात आला आहे. 

सरकारचे हे अपयश

"गायकवाड यांचे वक्तव्य दुष्काळग्रस्त शेतकऱ्यांच्या वेदनेवर मीठ चोळणारे आहे, आत्महत्याग्रस्त शेतकऱ्यांच्या कुटुंबांची थट्टा उडवणारे आहे. शेतकऱ्यांचे मृतदेह जनावरांनी खावेत अशी इच्छा व्यक्त करणारा आमदार हा नराधमी वृत्तीचाच असू शकतो. गायकवाड यांनी त्यांच्या पक्षाचे विकृत चरित्रच लोकांसमोर मांडले. ठाण्यात पूर्णेकरांचे हत्याकांड करणाऱ्यांना पाठीशी घातले जात आहे व बुलढाण्यात गायकवाडसारखे आमदार शेतकऱ्यांची प्रेते जनावरांना खाऊ घालत आहेत. पुन्हा हेच लोक ‘आम्हीच खरी शिवसेना, बाळासाहेब ठाकरे यांचे वारसदार’ असेही बोंबलत फिरत आहेत. महाराष्ट्रात भयंकर दुष्काळ आहे. पिकांची राखरांगोळी झाली आहे. कर्जाच्या ओझ्याने शेतकरी मेटाकुटीस आला आहे. सरकारची मदत म्हणजे घोषणांचे बुडबुडे आहेत. ते बुडबडेही शेतकऱ्यांपर्यंत पोहोचत नाहीत. त्यामुळे शेतकरी आत्महत्या करीत आहेत. महाराष्ट्रात रोज आठ ते दहा शेतकरी आत्महत्या करीत आहेत. हजारो शेतकऱ्यांनी तीन वर्षांत आत्महत्या केल्या. महायुती म्हणवून घेणाऱ्या सरकारचे हे अपयश आहे," असं ठाकरेंच्या शिवसेनेनं म्हटलं आहे. 

50-50 कोटींचा माज आणि अहंकार

"या संकटावर मात करणे व त्यासाठी लागणारी इच्छाशक्ती फडणवीस सरकारकडे दिसत नाही. उलट सत्ताधारी आमदार दुष्काळग्रस्त शेतकऱ्यांनाच दोष देत आहेत. ‘‘त्यांची प्रेते जनावरांना खाऊ द्या,’’ असे सैतानी उपदेश करून सरकारची संवेदना ठार मेल्याचे सिद्ध करीत आहेत. गुरांच्या चारापाण्याचा प्रश्न बिकट होत आहे, पण हिंसक जनावरांना शेतकऱ्यांची प्रेते खाऊ घाला असे सांगून मिंधे गटाचे आमदार जंगली प्राण्यांच्या पोटापाण्याची व्यवस्था करीत आहेत. यावरून एक स्पष्ट होते, मिंधे यांनी आमदार, खासदार पाळले नसून ‘लांडगे’ पाळले आहेत. त्यामुळे ते स्वतःही लचके तोडत आहेत व ‘शेतकऱ्यांचे लचके तोडा’ असे जंगली प्राण्यांना बजावत आहेत. यापूर्वीदेखील आमदार गायकवाडांनी त्यांच्या हिंसक वृत्तीचे उद्योग अनेक प्रसंगी दाखवले आहेत. ‘डाळ’ थंड आहे म्हणून आमदार निवासात दंगल करणारे हेच महाशय होते. संजय गायकवाड वगैरे आमदारांची भाषा म्हणजे 50-50 कोटींचा माज आणि अहंकार आहे," असा उल्लेख अग्रलेखात आहे. 

ही भाषा फडणवीस यांना मान्य आहे काय?

"बाळासाहेब ठाकरे यांच्या विचारांचा आणि राजकारणाचा केंद्रबिंदू सामान्य कष्टकरी माणूस होता. तो मुंबईतला कामगार होता व शेतात राबणारा शेतकरी होता. या कष्टकऱ्यांना स्वाभिमानाने जगता यावे व मरणानंतरही कष्टकऱ्यांचा सन्मान राहावा ही शिवसेनाप्रमुखांची भूमिका होती. आज शेतकरी जिवंतपणी आणि मरणानंतरही अपमानच सहन करत आहेत व आता तर मृत्यूनंतर त्यांची प्रेते लांडग्यांनी खावीत अशी इच्छा संजय गायकवाड या मिंध्यांच्या आमदारांनी व्यक्त केली. हा उपदेश क्रूर आहे. एका बाजूला आम्हीच शेतकऱ्यांचे ‘मदतगार’ हे दाखवण्यासाठी दुष्काळी भागात अन्नधान्याचे ट्रक पाठवून ‘फोटोगिरी’ करायची व त्याच वेळी शेतकऱ्यांचे लचके तोडण्याची भाषा करायची. आमदार गायकवाड यांना एकतर पद्मभूषण पुरस्कार द्या, कृषिभूषण द्या, नाहीतर मग आपण शेतकऱ्यांचा सन्मान राखतो हे सिद्ध करण्यासाठी या लांडग्यालाच विधान भवनाबाहेर जोड्याने मारा. शेतकऱ्यांचे लचके तोडण्याची भाषा फडणवीस यांना मान्य आहे काय?" असा सवाल लेखाच्या शेवटी विचारण्यात आला आहे.