सिंहगड टेक्निकल एज्युकेशन सोसायटीला मुंबई उच्च न्यायालयाने मोठा दणका दिलाय. न्यायालयाच्या आदेशांचे वारंवार उल्लंघन केल्याने सात महाविद्यालयांवर प्रशासक नियुक्त करण्यात येणार आहेत. सात कायम विनाअनुदानित महाविद्यालयांचे व्यवस्थापन तीन वर्षांसाठी शासनाच्या ताब्यात असणार आहेत.
प्रभारी उच्च शिक्षण संचालक डॉ. शैलेंद्र देवळाणकर यांची प्रशासक म्हणून नियुक्ती करण्यात आलीय.
शिक्षकांचे वेतन थकवणे, निवृत्त कर्मचाऱ्यांची देणी न देणे आणि संस्थेच्या निधीच्या वापराबाबत गंभीर प्रश्न उपस्थित झाल्याने पुण्यातील सिंहगड टेक्निकल एज्युकेशन सोसायटी म्हणजेच एसटीईएस अडचणीत आली आहे. मुंबई उच्च न्यायालयाने संस्थेशी संबंधित 44 शैक्षणिक संस्थांच्या आर्थिक व्यवहारांची सीबीआय, ईडी आणि प्राप्तिकर विभागामार्फत चौकशी करण्याचे आदेश दिले आहेत.
या प्रकरणात सुमारे 13 शिक्षकांनी आत्महत्या केल्याचे न्यायालयाने नमूद केले आहे. या प्रत्येक घटनेचे स्वतंत्र कारण मागविण्यात आले आहे. संस्थेतील तांत्रिक शिक्षण संस्थांचा ताबा प्रशासकाकडे देण्याचे आणि विद्यार्थ्यांचे शैक्षणिक नुकसान होऊ नये यासाठी आवश्यक ती व्यवस्था करण्याचे निर्देशही देण्यात आले आहेत. शिक्षण विभागाला काही संस्थांचा ताबा घेण्याचे किंवा विद्यार्थ्यांना अन्य शाळांमध्ये सामावून घेण्याचे पर्याय तपासण्यास सांगितले आहे.
सिंहगड टेक्निकल एज्युकेशन सोसायटीअंतर्गत पुणे आणि परिसरात विविध शाळा, महाविद्यालये आणि व्यावसायिक शिक्षण संस्था चालवल्या जातात. या संस्थांमधील शिक्षक आणि शिक्षकेतर कर्मचाऱ्यांचे वेतन, निवृत्तिवेतन आणि इतर सेवा लाभ दीर्घकाळापासून थकले असल्याच्या तक्रारी न्यायालयात दाखल झाल्या होत्या. काही संस्थांमध्ये जवळपास आठ वर्षांपासून वेतन देण्यात आलेले नाही. कर्मचाऱ्यांची एकूण थकबाकी ४०० कोटी रुपयांपेक्षा अधिक असल्याचे न्यायालयीन आदेशात नमूद आहे. न्यायालयाने यासंदर्भात निरीक्षण नोंदविले आहे.
संस्थेच्या निधीचा वापर इतर व्यवसायांसाठी झाला आहे का?, आर्थिक व्यवहारांत गैरव्यवहार झाला आहे का? आणि मनी लॉन्ड्रिंगचा प्रकार आहे का?, याची चौकशी करण्याचे निर्देश न्यायालयाने दिले. सीबीआय संस्थेच्या कारभारातील आर्थिक अनियमितता तपासणार आहे. ईडीकडून मनी लॉन्ड्रिंगच्या शक्यतेची चौकशी करणार असून प्राप्तिकर विभाग संस्था आणि विश्वस्तांनी दाखल केलेल्या आयकर विवरणपत्रांची तपासणी करणार आहे.
सिंहगड विधी महाविद्यालय – आंबेगाव
श्रीमती काशीबाई नवले कॉलेज ऑफ एज्युकेशन – कुसगाव, लोणावळा
सिंहगड कला आणि वाणिज्य महाविद्यालय – नऱ्हे
निवृत्ती बाबाजी नवले वाणिज्य आणि विज्ञान महाविद्यालय – कुसगाव, लोणावळा
सिंहगड वाणिज्य महाविद्यालय – कोंढवा
श्रीमती काशीबाई नवले वाणिज्य महाविद्यालय – एरंडवणे
सिंहगड विज्ञान महाविद्यालय – आंबेगाव बुद्रूक